Барганджиа Саид

Адуней апсуа-абаза конгресс ашIыпIа хъвшараква рынхара агвынзыргIвуаши чкIвыныргIа йрыцынхуши нхагIвы дгIалырхра ахъазла анкъвакъвра шакIвшауа ахабар аргитI.

АААК аппарат аунашвачпагIв Таниа Кан йшихIвауала, уахьчIва АААК анхагIвчва йацасуа гвыпта йщаквгылтI, ауат рпахь йгылапI магIын ду зму ахачIвква: апсуа-абаза уагIахъа рацзакIыра рыбагъьара, Апсны апынгьи апсуа-абаза диаспора ъабзазауа акъральква зымгIва рпынгьи хIцри бызшва, хIцIасква, хIгвбайара гIащаквыжьра йгьи тшауацIдрыхра.

Ауи йгIаликIгIатI ансисквшагьи а-Конгресс йархъйауа ауысквагьи ауат уагIата йгIарыланакIуагьи рыцIа-рыцIа йшрылахIауа. Ауаса йанаъазара, ахачIвква рырхъйара рыласра ахъазла нхагIвчва шIыцгьи атахъхитI.

«ХIара зуагIа, зцIасква, зкультура бзи йызбауа агIвычIвгIвыс джьгарква хIырзыбжапI. Ужвы йгIахIахвуаш анхагIвы хачIв хъадата йыхъвда йхъазлуш Апсны апны йаъу ашIыпIа хъвшараква ргIаджвыквыцIараква рырхъйара адгалри ахъвшара шIыцква гIаныршари акIвпI», – йгIахIгвынйыргIвытI Таниа.

Ауи йгIацицIахтI АААК ЙхIаракIу асовет аунашвачпагIв Эгьзакь Мусса а-Конгресс анхара йхътIыта, зымгIвагьи йырбауата йадгалазара атахъыта йшщаквйыргылыз, ауи апкъ йтата анхагIв шIыц анкъвакъврала дшгIалырхуаш.

«ХIара кьангьаш гьазгIагIгуам ауаса хIара хIустав йану амурадква рырхъйара рыцIа йрыквыргIапсу нхагIвы дшхIызгIауаш», – йхIватI Таниа Кан.

АААК архъйагIв секретарь Гьыцба Инар а-Конгресс агвып анхагIв шIыц щардала йшйайгвгъауа, йаргьи «йнардзата, йкъару дамайгьдзауата» йхъвдаквцIараква йырхъйушта йшйыквдырпшуа.

«ХIшхъвыцуала, анкъвакъвра ъадзакIвшауа хIара анхара згвы рыцIа йазыщтIу дхIзыбуштI. ХIара йхIтахъу дгьахъазнхагIвым – зхъвыцщала агвып йрыквшвуш дгIвычIвгIвыспI. Сара йшызбауала, ауи аъанатIа зкIра атахъу згвы цхIауа, йджьгару, закъыль зрыпшгIауа, адахIвра ацIыхъва йтагылазлуш заджв йакIвпI», – йхIватI Гьыцба.

Ауи багъьата йазхъайцIитI анхагIв шIыц АААК агвып майрата дшрангIалуаш, ауат рынхара пшыхькI шгIалайжьуаш. Гьыцба йгIарахвлакIгьи йаларпу а-Конгресс агвып дрыцынхарныс шйымаджьащахъвазлушла дйыргвыгъитI.

АААК архъйагIв секретарь йгIаликIгIатI а-Конгресс анхара апсуа-абаза уагIахъа ргвбайара хчари йрыбагъьари йъазынарху йгIалцIла ауи акультура нкъвызгауа ауагIа урабадырра, урынйалара, урачважвалара шатахъхалауа.

«Ауи акIвпIта, хIара йгвалымсым, бзиракI гIансыршанда-хIва йхъвыцуа гIвычIвгIвыс хIизыпшгIитI. Анкъвакъвра ауи ауыс ззырцушызшва йызбауа, йзырцарнысгьи зтахъу ауагIа гIалалырныс лшара рымапI, хIаргьи ауат йрыуата згIвычIвгIвысщалагьи здырраквалагьи ауи рыцIа йазычпу, АААК амурадкви ахачIвкви рахIа йрыквыргIапсу нхара дхIызгIахвуаштI. Ауи акIвымкIвагьи анкъвакъвра йгIалалуаш ауагIа хIрылапшта апхъахьыла нхара йгIахв йауашта йызквуырпшуашгьи ашвъа йанхIцIуштI», – йхIватI Гьыцба Инар.

Анкъвакъвра шакIвшуш

Йапхъахауа ахъвы. Февраль а 10 йгIашIарышвта а 20-дза анкъвакъвра йалалра зтахъу сквш 25 зрыцкьахьаз Апсны акъральгIвчва ранкетаква азыркIкIуаштI. Анкета йатахъу зымгIва антаугIвра амщтахь АААК ауысхарта йуга (ауи асахIат а 9 йалагитIта асахIат а 18-дза йынхитI) йа info@abaza.org электрон адресла йущти йауаштI. 

ЙгIвбахауа ахъвы апны анкъвакъвра йалалуа онлайн-рхъвыхра рызпшитI. Ауат дакъикъа 30 руацIа азцIгIара 25 джьауап гIарыртра атахъхуштI. ЗакI гIазнух йауаш гIвыра, йуыцынкъвугауа абадыргаква йа информация зту антахьгьыт аргIапсгаква гIаурысабап йгьауам.

Йхпахауа ахъвы апны анкъвакъвра комиссия (ауи йалазлуш Согъвым апны йгIаныршу АААК ахъвшара анхагIвчва ракIвпI) анкъвакъвра йалакву кIьыда-кIьыда йрачважвуштI.

Анкъвакъвра комиссия анкъвакъвра йалакву рдырракви рхIаль-шани йанырпшуа ргватра ззынархазлуш аъанатIала уынхара ахъазла йатахъыта ашвъа йану акIвпI.

Ауи акIвымкIвагьи анкъвакъвра комиссия анкъвакъвра апны йамайгIайуата йгIанхаз, ауаса здырракви зхIаль-шани ргвапхаз, апхъахьыла нхара йгIахв йауашта йызквдырпшуа руысла щаквыргылра нарахвырнысгьи йахвитпI.

Йпщбахауа ахъвы – АААК ЙхIаракIу асовет аунашвачпагIв Эгьзакь Мусса онлайн амальла йачважвара.

Йпщбахауа ахъвы амщтахь анкъвакъвра йалаз гIвыджь гIарылырхта мызкIы ауацIа нхаша хIакъ гIаргуа йдырхъвыхуата йындырхуштI. Ауи амщтахь нхара йгIаныржьуаш заджвы дгIалырхуаштI.

Анкетаква ъанарахвуа йгьи анкъвакъвра йалалквауа йъагIарачважвауа ари адресла акIвпI: Апсны Республика, Согъвым къала, ЛакIоба йурам, 109, Адуней апсуа-абаза конгресс ауысхарта. Ари ауысла кIара гIаззырдырра зтахъу +7 840 226-25-26 телефонла йазцIгIа йауаштI.