Атурых апны йапхъахауата триатлонла IRONMAN адистанция апны апсыуа Барцыц Борис дайгIайтI.
Барганджиа Саид
Барцыц Борис, аспортсмен йгьи апсыуа компания А-Мобайл агенерал унашвачпагIв, атурых апны йапхъахауата триатлонла IRONMAN анкъвакъвраква рпны дахIврала афиниш дазынадзатI. Ауи 14 сахIаткIла километр 226 гIамидатI.
АААК ахабарргарта портал акорреспондент дгIайачважвауата аспортсмен йшгIаликIгIазла, арат анкъвакъвраква дрылалырныс гIвысквша рапхъала мурад йчпатI.
«Триатлонла Barcelona IRONMAN -2018 салалырныс щарда цIуата йсмурадын, афиниш дахIврала съанадзаз ауи схъа йазгIазгыз айгIайрата йспхьадзитI, – йхIватI ауи. – Скъару сырхъвыхырныс, схъа сзайгIайырныс акIвын сара сыхъазла магIны змаз. Ауи ахIатырла жвмызкIы рурала самайчуата тшсрыхIазыруан».
Барцыц Борис 14 сахIаткIла километр 226 йнадзуз адистанция амидатI, ауи йаланакIуата дзцарала 3,8 километркI, велосипед мгIвайсрала – километр 180 йгьи амарафон – километр 42,2.
«Ауи шабгу зынхIвынчIарала уырхъысра атахъыпI, гIашIасрадъа. АцIасква шаъула, аспортсменква адистанция йахъысырныс ахъазла йгIарнатитI 15 сахIаткIи минут 40. Йщаквгылу азаман йзытамгылквауа афиниш йгьазынадзум», – йхIватI Борис.
Анкъвакъвраква рпны йгIарбараквала апсыуа спортсмен, "Sport Apsny" спорт клуб аунашвачпагIв анцIрала йынкъвигауата йгIайквнадыргатI ачIахIныгIва хьзы IRONMAN (ангьльыз бызшвала йгIаныцIитI – айха йгIалху агIвыгIвыс» – аредакция ррытаразга).
IRONMAN – йауыру адистанцияла триатлонла йакIвшауа анкъвакъврапI, ауи триатлонла Адуней корпорация йакIвнаршитI (WTC). Анкъвакъвра адкIылрапхьадзагьи апышвтдъа йащтагIайуа ххъвыкIта йшапI: дзцара, амгIвала велосипед мгIвайсра йгьи марафон гIвра. IRONMAN триатлонла анкъвакъвра адуней апны мшкIыла йакIвшауа рыцIа йалачпу анкъвакъвраква йрылапхьадзапI.
Борис, Борис, Борис чемпион✊️
швталра йа тшаншвцIара атахъыпI.