АААК ЙхIаракIу асовет йалу, Москва апны йбзазауа апсуа диаспора рхъада, гвчIагIвчпара знархару «АМШРА» фонд йахъпшылуа Агрба Беслан Гвдауыта апны йгIахъыртIыз а-COVID-госпиталь мызпхьадзара руацIа ахчала дацхърагIун.
Барганджиа Саид
Апсуа-абаза конгресс ЙхIаракIу асовет йалу, Москва апны йбзазауа апсуа диаспора рхъада, гвчIагIвчпара знархару «АМШРА» фонд йахъпшылуа Агрба Беслан апсуа айъазагIвчва COVID-19 йанапшIагылаз агIан адзыни агъни рымызква руацIа Гвдауыта агоспиталь анхагIвчва ахчала дырцхърагIун. Ауи ацхърагIара йаланакIуата ауи ахчата йтйыз сом 5 879 000 йнадзитI.
Апсны Республика згIвадарахчарала а-Министерства ангIайыхIва абзихагIв йара йахчала коронавирус йабакIуа айъазагIвчва цхърагIара драдзарала апрограмма йырхъйатI. Ауи апрограммала акъраль йапшым айъазартаква рынхагIвчва йгIарылырхта Гвдауыта а-COVID-госпиталь апны йынхауа айъазагIвчва ргвып асквш 2020 октябрь а 1 йгIашIарышвта декабрь а 31-дза ргвышхвагата мзигIадза рынхаша йаланамкIуа ахча чIыда рытра атахъын.
АбзихагIв йшихIвазла, ахчала цхърагIара «ашта къапщы» апны йынхауа айъазагIвчва 361-джвы йрадзатI. Ауат йрылапI ауагIа рзгIвадара йалакIыта йахьпшуа айъазагIвчва, ареаниматологква, алаборантква, арентгенологква, амедицина ахщчва, асанитар нхагIвчва, «ацхърагIара ласы» амашинаква рынкъвцагIвчва йгьи Согъвым амбулатория айъазагIвчва 22-джь. Декабрь агIан зны цхърагIара радзатI Апсны апны закIзаджвыкIта йаъу ареспублика асанитар-бактериология лаборатория а-14-гIв нхагIвчвагьи.
«УахьчIвала COVID-19 апшIагылра апны Апсны айъазагIвчва ахчала цхърагIара драдзарала хымызкI гIазцIазкIуаз апрограмма абгата йхъйатI», – йхIватI Агрба Беслан.
Ауи йшихIвазла, Согъвым апны COVID-19 зхьуа ауагIа йырчпуш хъарачIвыла йразхIвуаз амбулатория айъазагIвчвагьи апрограмма апкъ йтата мзигIадза ахча рыртуан.
«Адгалра уысква зымгIва, апрограмма архъйара аныргIалрала анхара Москва йту апсуа диаспори ТшауацIыхрала Апсны ажвлара фонд «АМШРИ» йацнадырдзатI», – йгIацицIахтI Агрба.
Ауи «ансимшы зызгIвадара йамайгьдзауа, йырхауа ауыс рбзазара ахъазла йшшварагIвару йампшуата хIаргванчва рзгIвадара йазабакIуа, закIгьи йузашIмырпшуаш COVID-19 апшIагылра апны хIуагIахъа рзгIвадара гIазхчауа» Апсны айъазагIвчва йгвы йгIатыцIуата дрызхIвахIвтI, дшырзыразу йхIватI.
Ауи апхъала Апсны ателебара аэфир апны дгIачважвауата ареспублика а-Президент й-УнашвахъцIарта ахъада йтарагылыгIв Нанба Джансух пандемия гIаджвыквлищтара Апсны апны коронавирус апшIагылра сом мильуан 400 райхIа шаквдрыдзхьу гIайхIватI. Ауи ахча йауата сом мильуан 200 райхIа акъральыгIва йазалнахтI, анахьани йапшым анхартакви абзихагIвчви йаларцIатI.
УахьчIвала Апсны апны коронавирус гIаздысылта йщаквдыргылыз рпхьадзара 11469 йнадзитI. 170-гIвы псытI. 9782-гIвы бзихахтI.
Асквш 2021 январь а 11 йгIашIарышвта Апсны шабгу апны акъраль абзазагIвчва коронавирус згIва йачвырхчара йащтата карантин амальква щаквдыргылтI.
швталра йа тшаншвцIара атахъыпI.