Россия афутбол клуб «Зенит» апхьарта уыжвласыла Апсны апны ахъвшара гIахънатIуаштI
Барганджиа Саид
Йбергьльу асаби футбол апхьарта, Санкт-Петербург йауу «Зенит» футбол клуб (ФК) йачIву «Газпром» - Академия, Апсны апны ахъвшара гIахънатIуаштI. Ауи аныншуш атамам уыжвласыла йгIархIвуштI. Ауи бергьыльхатI ашвахьа, октябрь а 19 атшын Адуней апсуа-абаза конгресс ЙхIаракIу асовет аунашвачпагIв Эгьзакь Мусси апхьарта аунашвачпагIвчви ананйа амщтахь.
«Зенит» ФК академия абжьагIвчва ръачIвагIара йъаладырхIауа аквта адиректор Морозов Сергей йшихIвазла, ахъвшара агIахътIра ауатыкв йангIатал академия аунашвачпагIвчва Апсны афутболасчва ргвыпквакI рхъвмарща йанапшы амщтахь акIвпI.
«АчкIвынчва джьащахъваква аъапI. Апсны апны дгьзаджвым футболасыгIв мчыта йгIадзынгылыз», – йхIватI апсуа чкIвынчва рхъвмарща даквчважвауата Морозов йгьи йгIацицIахтI: «Араъа съанхауа афутбол клуб азыгIальаматраквагьи, Апсны йазсыму абзибарагьи, ари акъраль сацхърагIарныс ъастахъугьи аквшвата гIацIцIуаштI».
Морозов Сергей йгвы йшгIанагуала, Апсны апны спортсмен щардагIв атопасра йазычпата «йгIадрийитI», «агIвадахь шIыпIаква рпныла йауу ачкIвынчва зымгIва йрапшта» апсуа футболасчва «щаласпI, рчхIара бзипI, ркъару мчыпI, чвгьарагьи – бзира гIаныцIуата – йрылапI». Ауаса ауи йшипхьадзауала, уахьчIва Апсны апны афутболасчва ръазара йаздырхIарныс йъадзачкIвыну, 11-12 сквша йырталындзыкIьа, акIвпI лшара ъадзарыму, йауа ухIварыквын, ауи амщтахь ауат рнадзара йалазырхIуш зуыс йазъазу абжьагIвчва гьнахъум.
«Ауат рапхъала йыззычIвырхъуш закIгьи гьырбумта футбол рымагIальаматхымкIва йцитI, йгIашIаситI, рнапIква кIашвитI», – йгвгIанаграква хIыцагIвишатI Морозов.
Ауи йхIватI «Зенит» академия Апсны абжьагIвчва ръазара йалархIарала апхьараква шакIвнаршахьаз. Апсуа бжьагIвчва ауи швабыж азыгIальаматра азрымата йгIацIцIтI, 34-гIв апхьараква йгIаркIылстI. Ауат рыуа щардагIвы «Зенит» академия ужвыгьи йрыцынхуштI.
«Аттестация йахъысыз а 34-гIв йрыуата 14-гIв гIалхIкIгIатI. Ауи гIарбага бзипI», – йхIватI Морозов Сергей.
«Зенит» футбол клуб академия адиректор Давыдов Анатолий апхьарта апны атшыбжьараква ауыжвгIанчIви амальквала, уахьчIва футбол йгIалалуа ашIыцраква зымгIва гIацIанакIуата йшакIвшауа гIаликIгIатI. Ауи «Зенит» академия йалакву Апсны апны йазыркIкIларныс шыргвыгъугьи йхIватI.
«ХIара араъа аинфраструктурагьи аклиматгьи хIгвапхитI. ХIара Апсны хIызгIвадара хIрыбагъьарныс хIгIайлуштI, араъа уызцхъвмаруаш аъапI. Апсны абжьагIвчва рарыпхьара араъа йаъу атшыбжьарта апны йнахIырдзахуаштI», – йгвыгъакву гIахIайхIвтI «Зенит» ФК академия адиректор.
Апсны апны «Зенит» афутбол апхьарта агIахътIра магIныта йамазлуш ауысла йгвгIанаграква йхIватI Адуней апсуа-абаза конгресс ЙхIаракIу асовет аунашвачпагIв Эгьзакь Мусса. Ауи апроект архъйарагьи «Зенит» академия аунашвачпагIвчва рынйарагьи ъалшарахаз збзиру апсуа хIаракьатчпагIв Джергениа Борис шйакIву гIаликIгIатI.
«Джергениа Борис ДжотIа йпа афутболасчва дуква, абжьагIвчва, «Зенит» академия аунашвачпагIвчва бзита драбадыритI. Абарауат азазаъащаква Апсны апны асабиква йгьи чкIвыныргIа рфутбол тшауацIназрыхуаш щата гIаныршарала апроект гIальамат гIархъшахъыцIтI. Ауи футбол ащата тшауацIнарыхрагьи зъазара дуу абжьагIвчва ррыхIазыррагьи гIацIанакIитI. Йшцауала, ацIайкви ачкIвынчви апхъахьыла закIы йзайгвгъауата бзи йырбауа ауыс тшадыркIылырныс, йыззычпугьи гIадырбарныс алшара бзиква гIаншитI», – йхIватI Эгьзакь Мусса.
АААК ЙхIаракIу асовет унашвачпагIв Апсны апны щардагIвы футбол бзи йшырбауа йдыритI. Ауи багъьата йхъайцIитI «зымгIвагьи «Зенит» афутбол апхьарта йалашварныс йшащтазлуш».
«Апсны ауагIа футболасра зща йалу асабикви ачкIвынчви гIалыркIгIарныс ахъазла ари алшара гIальамат гIадрысабапуаштI, ари знархару акъральыгIва уысхартаквагьи «Зенит» академия ацхърагIарала апсуа футболасчва ззычпу Апсны, Россия, адуней ртопасыртаква рпны йшгIадырбуш апшта аъащаква гIандыршуштI», – йажва алйыргатI Эгьзакь Мусса.
«Зенит» ФК академия – Россия «алагъь къала хъада» Санкт-Петербург йауу йбергьльу афутбол клуб «Зенит» апны йгIаныршу асабикви чкIвыныргIи ъарбжьауа футбол апхьартапI. Академия мурадта йамапI аклуб акоманда хъада йрылата йзыхъвмаруаш афутболасчва гIадзыннаргылырныс. Апхьарта йара афилософиягьи амапI: ауаъа йгIацIцIквауа футболасчва бзихара йахъазымкIва здырраква цIолу гIвычIвгIвыс бзихарныс. Академия акомандаква «афутболасра йазгIашыкъта, уыла хънахуата йшхъвмаруаш» йащтапI. Ауаса йанаъугьи араъа «агвып арыхIазырра ацкIыс афутболасыгIв дрыхIазырра» апхъа йаргылитI. Апхьарта апны атшыбжьараква хпата йшапI: техники тактики, теории психологии тшырзыбжьара, амахъащахъаква рыбагъьара.
швталра йа тшаншвцIара атахъыпI.