Адуней апсуа-абаза конгресси ашIыпIа унашвахъцIарти Гвдауыта апны асабиква рыхъазла гвыргъьахъв адыргалтI
Адуней апсуа-абаза конгресси Гвдауыта аунашвахъцIарти адуней апны йдыртлапIауа Асабиква рхчара амш йазынархата акъала апны асабиква рыхъазла гвыргъьахъв адыргалын йакIвдыршатI. Ауи Гвдауыти йаргвану акыткви йрыуата саби 100-гIвы райхIа азнаддатI.
Тшынла акультура атдзы апны агвыргъьахъв асасчва зымгIва апсуа бызшвала йатаркIыз амультфильм «Агәылшьап шыбжьатәу» (апсуа бызшвала «АтIкъва шубжьуш» гIаныцIитI – аредакция ррытаразга). Ауи атазкIызгьи йгIадырбарныс йгIарызтызгьи апсуа интернет-провайдер «Система» ракIвпI.
Амультфильм асабиква йырхъазымкIва ауат ран-рабачвагьи йрымаджьащахъвадзата йапшытI.
Гвдауыта абзазагIв Квирая Амина агвыргъьахъв лыгIвпачва АджьынджьалргIа Астани Исмети гIалдын дгIайтI. Ауат азаджв быжьсквша, азаджвгьи жвизсквша йыртапI.
«Амультфильм санапшуаз зныкI асабиквагьи шсуысхым тшазыздырхтI. Амультик ацIайква гьракIвымта саргьи схънахтI. Ауи бзидздзапI хIсабиква бзи йырбауа амультикква рфырква апсуа бызшвала йангIарачважвауа. Анчва дырзыразхатI ари адызгалыз», – ллахIвараква хIыцагIвылшатI ан шIа.
Амультфильм амщтахь асабиква апсуарала (апсуа-абаза уагIахъа ръадаб-намыс ахабзаква – аредакция ррытаразга) апхьара сахIат апны йрызпшуан, ауаъа ауат азцIгIараква джьауап рытрала анкъвакъвра рзадыргалтI. Тамамта йгIартуаз аджьауапипхьадза ахъазла асабиква АААК ахьызхIвага согIаква рытртуан.
Аконгресс агIвсогIакI гIалынхатI ТаркIьыл Анна. АпхIвыспа йшылхIвахызла, азцIгIараква джьауап анрылтуаз гвалагIваласра мачIкIгьи лылан, ауаса аджьауап шылдыруа кьангьаш гьазгIалымгуазтI.
«Швабыж йсгвапхатI, сайгвыргъьитI гIвсогIакI ъагIатызгаз. Анчва дырзыразхатI адгалагIвчва», – лхIватI агвыргъьахъв йалаз апхIвыспачкIвын.
Жвасквша йырту Базба Эмир авикторина рыцIа йызлабзийыз апсуа бызшвала йъакIвшуз, азцIгIараква зымгIвагьи Апсны йъапщылаз акIвта йпхьадзитI.
«Сара йсгвапхауата апсуа викторина салан. Швапсуадзата шваъазара швтахъызтын бзита швапхьа», – йыквлагIвчва дрылабжьатI ауи.
Авикторина аналга амщтахь асабиква ауагIахъа хъвмарщаквала йхъвмарырныс апахь йджвылырдатI.
«Сара йсзыджьамщахуата сырпшуан ацIайква ахъвмарраква йшрыланахIваз, ауат гвыргъьарата, хъыччарата йтарцIуз! Анчва дырзыразхатI ари апш гвыргъьахъв хIзадызгалыз а-Конгресс ауысхагIвчва. ХIгвква чIватI», – лхIватI хвысквша йырту лпхIа Нила йлыцта йгIайыз Сергегиа Эмма.
А-Конгресс ахьызла йгIачважваз Жьыба Дмитрий АААК анхара апны асабиква, ауат рбжьари ртшауацIыхри гватра ду шырзалнахуа гIаликIгIатI. Абараса йхъвмаруамца ауат руагIа рхабзакви рцIаскви ддырдыритI.
«ЗымгIва гIахIыдахIвла сгвыгъитI. Асабиква тхаджьтI. Швабыж хIразыпI ауагIа араса [джьгарта] йъахIыцыркIыз, йъагIайыз. ХIазыразпI хIгвы йтази ауагIа йыртахъызи
ъаквшвазгьи: ан-абачва щардагIв гIахIыдгылуанта агвыргъьахъв шыргвапхаз гIахIархIвауан», – ауыс шакIвшаз даквчважвауата йхIватI Жьыба.
Разыра ажва рзынайырхатI ауи акъала аунашвахъцIарта, Гвдауыта апны йгIаныршу АААК ашIыпIа хъвшара аунашвачпагIв ЛакIойа Амри ауи йлыцынхауа Хагба Софии НакIопIиа Софии, СогIвым чкIвыныргIа руысквала аунашвахъцIарта анхагIвы Квициниа Виктория, АААК йаланакIуа чкIвыныргIа рсовет йалу БытIба Денис, Цвижба Альйас, Ходжава Милана, Чачхалиа Наала.
Гвдауыта апны йгIаныршу АААК ашIыпIа хъвшара аунашвачпагIв ЛакIойа Амрагьи агвыргъьахъв шгIардахIвыз дадгылитI. Ауи йаквшахIатхатI асабиква а-Конгресс йырзаднагалыз ауысква джьгарта йшрылалуаз.
«Агвыргъьахъв бзидздзата йакIвшатI. Асабиква разхатI – ауи акIвпI зымгIва рацкIыс йхъаду. ЙхIызгIайыз зымгIва хIырзыразпI», – лхIватI ЛакIойа.
Агвыргъьахъв аналгуз, йшцIасхаз апшта, Адуней апсуа-абаза конгресс ауысхагIвчва асабиква зымгIва хъагIара рыларшатI, ауагIахъа хъвмарраква рпны йайгIайквазгьи асогIаква рырттI.
Асабиква рхчара адуней мшы рахIа щарда зхъыцIуа адуней гвыргъьахъвква йрыуапI. Ауи артлапIара ауысла щаквыргылра асквш 1925 агIан Женева апны асабиква йырзынархаз адуней конференция анакIвшуз йнарахвтI. Ауаса йапхъахауата ауи андыртлапIа сквш 25 анцIых акIвпI – асквш 1950 агIан, ауаъа йгIашIарышвта агвыргъьахъв ансисквша йакIвшалитI. Асабиква рхчара амш йгьсаби гвыргъьахъвгIвацам, ауи амш ажвлара асаби йхвитнагIаква хчара, асабиква зымгIва анасып йалата, йапхьауа, бзи йырбауа ауысква тшрыдыркIылуа йгIадзныргылра шатахъу гIаргваланаршвитI. Ауаса йцузтын уацIыхъван ауат аны-аба бзитагьи зджьауапкIра хIаракIу къральгIвтагьи йалуаштI.
швталра йа тшаншвцIара атахъыпI.