Июль а 23 Адуней апсуа-абаза конгресс ЙхIаракIу асовет аунашвачпагIв Эгьзакь Мусса абаза уагIахъа Апсны Республика АкъральыгIва баракъ амшла драйхIвахIвтI.
АААК ЙхIаракIу асовет аунашвачпагIв Эгьзакь Мусса апсуа-абаза уагIахъа АкъральыгIва баракъ амшла драйхIвахIвтI.
Эгьзакь Мусса Адуней апсуа-абаза конгресс ахьызлагьи йара йхъаталагьи "йгвы йгIатыцIуата зымгIвадзугьи Апсны Республика АкъральыгIва баракъ амшла драйхIвахIвтI!"
Ауи йгIаликIгIатI асквш 1992 июль а 23 атшын ажвлара-политика аъащаква шбаргвызгьи Ардзынба Владислав унашва зхъицIуз Апсны ЙхIаракIу а-Совет Апсны АкъральыгIва баракъи АкъральыгIва дамыгъи шарыбагъьаз.
"Ауи атурых йгIалахаз, ауагIахъа-хъахвитра азабакIра апны магIын ду змаз гIаншарата йалтI", – йгIацицIахтI ауи.
Эгьзакь Мусса зымгIвагьи йгIаргвалайыршвахтI асквш 2005 атшын Апсны йгIвыджьхуз рпрезидент Багапщ Сергей "Апсны Республика апны ахъмаштылра йгьи агвыргъьахъв мшква руысла" а-Хабза йаларцIаз апсахраква мачвы рыцIайцIата июль а 23 Апсны Республика АкъральыгIва баракъ йамшта йшщаквйыргылыз.
ЙхIвахIвра апны ЙхIаракIу асовет аунашвачпагIв йара ауи апшта дацIачIвагъвитI асквшква 1992-1993 рагIан Апсны ауагIа р-Абашта айсра анакIвшуз акъральыгIва баракъ АйгIайра йанып хъадата йшалыз, "уахьчIвагьи хIуыжвгIанчIви къральыгIва дахIврала тшауацIнарыхра апны ргвышхвага хъадата йшхIыму".
"ЙхIвара атахъыпI хIцри Абазашта апынгьи адуней зымгIва хIацзакIыра ддырбауата ари атшын Анып амши Абаза уагIахъа ркультура амши шдыртлапIауа. ХIара хIнып пшдзагьи апсуа-абаза уагIахъа йгIарыцIанакIуа зымгIва йъабзазалакIгьи йадызкIылуа дамыгъапI. Хвду ззызбауа сайщчви сахщчви, ари агвыргъьахъв мшы агIан шваргьи шваргванквагьи баракьати абагвынгIвыри швыгымхарныс швзыстахъпI!" – йхIватI Эгьзакь Мусса.
Апсны Республика ауыжвгIанчIви къральыгIва баракъ асквш 1992 июль а 23 атшын Согъвым (Акъва) къала апны йакIвшаз Апсны Республика ЙхIаракIу асовет асессия апны асквш 1978 агIан йнарахвыз Апсны АССР а-Конституция къару амахымкIва, ауи атарала асквш 1925 агIан йнарахвыз Апсны ССР а-Конституция шгIащаквдыргылхуа ауысла щаквыргылра аннарахв амщтахь йдрыбагъьатI. Асквш 2005 йгIашIарышвта Апсны Республика АкъральыгIва баракъ амш гвыргъьахъв мшыта июль а 23 агIан йдыртлапIалитI. Ауи атшын Апсны апны ауагIа агвхахIвара йалата ахъвмарраква адыргалитI.
швталра йа тшаншвцIара атахъыпI.