Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны ауагIи акъраль аполитика къарукви ареспублика ауачIвымш шцуш йазхъвыцуата тшадыркIылырныс йаквгIазшIиттI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса Согъвым апны аполитика аъаща ауысла АААК гылартата йакIуа даквчважвауата ужвы ари асахIат йхъаду асквш 2020 мартI а 22 агIан йакIвшуш ареспублика аунашвачпагIв йалхра йхътIыта, ахабза йтымцIуата йадгалра акIвта йхIватI. Ауи йаццауата ауи Апсны ауагIи акъраль аполитика къарукви ареспублика ауачIвымш шцуш йазхъвыцуата тшадыркIылырныс йаквгIазшIиттI.
«АААК агвыргIва йалата йапшуан ареспублика апны йцIыхъвахауа амшква рагIан йгIацIсыз аполитика кризис (сынчIва январь а 9-13 рагIан йаъаз, апрезидент ХIаджьымба Рауль йъанатIа дахъыцIхра зцIыхъватшарахаз агIаншараква ракIвпI йыззихIвауа – аредакция ррытаразга). ХIара йыншази ауат агIаншараква йрылаз ауагIи хвы рыквхIцIауата хIгьрыквчважвум. ЙамгIанамакIыразлакI апынгьи ауи йалу дзачIвызлакIгьи йара йчпауа штамаму йрыбагъьауата йхIвуш йымапI. Ауаса амакIыраква зымгIва ахабза утымцIуата йхътIу айчважварала йалыргара атахъыпI», – дацIачIвагъватI Эгьзакь Мусса.
Ауи зымгIвагьи йгIаргвалайыршвахтI Адуней апсуа-абаза конгресс адуней шабгу апны йхъылапсу апсуакви абазакви ауат йраргвану ауагIахъакви радкIылра мурад хъадата йызму йшадкIылару. Зтурых ауацIа архъвыхра хьантакви алдзгIаракви йгIарылсуамца йгIамгIвайсыз ауагIахъа рацзакIыра акIвпI ауагIахъа шабгугьи йара а-Конгрессгьи рыхъазла зымгIва рацкIыс хвы змата АААК йапхьадзауа.
«КъральгIв жвлара багъьа щаквыргылра АААК амурад хъадаква йрыуазакIыпI. Апсны тшауацIыхри аъаща тынчи азтуаш зхъвыцраква йаразджьарала йнарху ажвлара ракIвпI», – багъьата йазхъайцIитI Эгьзакь Мусса.
Ауи дшхъвыцуала уахьчIвала зджьара йгIанымхауата магIны амапI Апсны апны агIаншараква ахабза апкъ йтаргылра. Эгьзакь Мусса йгIаликIгIатI йхIпыру алхраква рпны йхIаракIу аъанатIа йазабакIуаш дзачIвызлакIгьи зымгIва йрапхъата акъраль штшауацIнахуашла рхъвыцракви йалыргу ахачIвкви Апсны ауагIа йддырбара шатахъу. Йпрезидентхуш ауагIа адикIылта абзазаща бзи йазйырцара йборчпI, кьангьаш гьазгIайгуам АААК ЙхIаракIу асовет аунашвачпагIв.
«А-Конгресс гьполитика адкIыларам, ауаса, ажва аламкIва, хIара ареспублика абзазагIвчва разыгIальаматраква йрыквыргIапста акъральыгIва тшауацIнарыхра ауысла ащаквыргылраква рлыхра хIацхърагIарныс хIхIазырпI. Асквш 2020 агIан АААК Апсны, Россия, апсуа-абаза диаспора ъабзазауа анахьанат акъральква рпны анхара арымчырныс амурадпI. ХIара акультура, ажвлара йырзынархата йауацIыху апрограммаква хIымапI, нхара ду акIвшитI абызшва хчари тшауацIнарыхри ауысла. ХIара агIвыма къральква йырту хIабашталагIвчва адхIкIылра гIахIыдахIвуамцара хIымгIвайситI. ХIмурадкви хIхачIвкви йшаъаз йгIанхатI, хIуагIахъа руачIвымш йазхъвыцуа, рбзазара шпшдзахуш йащту Апсны аполитика къаруква зымгIва хIрыцынхуштI», – йхIватI АААК ЙхIаракIу асовет аунашвачпагIв.
Январь а 13 Апсны а-Парламент ареспублика апрезидент ХIаджьымба Рауль йъанатIа дахъыцIра йадгылтI. ЗаманкIдза апрезидент йхъвдаквцIараква апремьер-министр Бганба Валерий йыквырцIатI. Асквш 2020 мартI а 22 Апсны апны акъраль апхъагылагIв шIыц далырхуаштI.
швталра йа тшаншвцIара атахъыпI.