Лента событий ВААК
АААК агвып сынчIва йакIвшуш а-Конгресс айззараду штшаздрыхIазыруа йалачважватI
АААК анхагIвчва асквш 2022 декабрь а 7 йгIашIарышвта а 11-дза йакIвшуш а-Конгресс йагIбахауа айззараду йазынархата йауацIыху айчважвара акIвдыршатI. Анйара апны айззараду йаланакIуаш уыста йлырхуа йаквчважватI йгьи йаргвану азаман ауацIа йчпачIву адгалра уысква гIархIватI.
СогIвым апны Апсны асуратгIвгIвча-абджьарчпагIвчва ргIарбарта «Х-НАПЫ» гIахъыртIытI
Апсны АсуратгIвгIвча-абджьарчпагIвчва радкIылара анхара йаквшахIату агIарбарта «Х-НАПЫ» гIахъыртIытI Апсны Республика АсуратгIвгIвчва радкIылара Аквта гIарбарта пещ апны октябрь а 18 атшын. Асквш 2021 агIан ажьий ъаза Дзидзариа Тимур дзунашвачпагIвта йгIандыршаз адкIылара йаднагалуа ари йгIвбахауа гIарбартапI. Ауаъа адкIылара йалу абджьарчпагIвчва рнапIы йгIацIцIыз пкъыгIва 20 гIаквырцIатI. Аэкспонатква йрылапI дамасск йгьи трыкв айха йгIалху акъамаква, ахIваква, алабаща, алабаква, ашварацыгIвчва рыхъазла йырчпауа йгьи йанмацIауа йызланхауа ахIваспаква. «Х- НАПЫ» гIарбарта октябрь а 21-дза йынхуштI.
Аламиа Геннадий АААК анхагIвчва дрынйатI
АААК анхагIвчва 15 сквша райхIа МАААН (ужвы АААК) йасекретарь хъадаз апсуа уысагIв йгьи ажвлара-политика уыснкъвгагIв, «Ахьдз-Апша» орден II астепень зму Аламиа Геннадий йынйатI. Анйара агIан Аламиа Геннадий асквш 1995 йгIашIарышвта дызредактор хъаду ажурнал «Абаза» аномерква а-Конгресс агвып цифра ргIапсща йтадыргылхырныс йриттI.
