Апсны апны коронавирус згIва зхьуа шIыцта агIгIвы гIараутI, уахьчIвала ареспублика апны COVID-19 зхьуа 32-гIв йнадзатI. Ауи апш хабар аргатI ауагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, йагIвсыз ацIхи амши руацIа коронавирус рыхьуи йрымхьуи ауысла 134-гIв дырхъвыхтI.

"Ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 11-гIв щтIапI, 20-гIвы тшдыркIьыдан рпынква йаъапI", – гIанахIвитI ахабар зну агIвыра.

Апсны Республика абзазагIвчва COVID-19  коронавирус згIва йачвыхчарала а-Координация штаб ащаквыргылра ащатала асквш 2020 июль а 27 атшын Апсны Республика апрезидент Бжаниа Аслан Апсни России ркъральыгIва мажа анахъысра-гIахъысра ауысла йщаквгылу ашIакIраква асквш 2020 август а 4-дза йдрауата Унашва гIайгтI. АгIвыма къральква рбзазагIвчва коронавирус шрымхьуа гIазырбауа швъа рымамкIва Апсны йту ръахIыльчва аргванква зны йрызгIай йауаштI.

Пандемия гIаджвыквлищтара Апсны апны зымгIва шалакIу 71-гIв коронавирус рыхьуата йщаквдыргылтI, ауат йрыуата 37-гIв бзихахтI, гIвыджь псытI.