АуагIа коронавирус згIва йачвыхчарала аоперштаб хабар аргатI Апсны апны COVID-19 шIыцта хгIвы йшгIарахвыз, ачымазагIвква рыуа заджвы дшпсыз.
Июль а 31 агIарбараквала Апсны апны коронавирус згIва шIыцта хгIвы йгIарахвтI. Ауи апхъала йчмазагIвхаз дрыуата заджвы Гвдауыта аквта район чымазагIвтара апны дпсытI. Ауи апш хабар аргатI ауагIа коронавирус згIва йачвыхчарала аоперштаб.
COVID-19 зхьуата йпсыз ачымазагIв сквш 79 дыртан, ауи Согъвым акъала чымазагIвтара акардиология хъвшара дгIацIырган июль а 26 атшын дхIатлата Гвдауыта агоспиталь дгIаргтI.
"Ауи йаъаща зхIатлахаз йымаз апневмония ковид йъазцаз, йаргьи йгвы акшаща алазырпIатIуз гвыхь ъайымаз йгIалцIла акIвпI. ЙцIыхъвахуз амш ауи псып йзымхъауа дцатI, рахIагьи далапIатIан йрапхIаква мчыла псып тадрысуа йалагатI, ауаса ареанимация амальквагьи гьйымхъвахтI. АчымазагIв псып ъайзымхъуз йгвгьи тамамта йъанымхуз йгIалцIла йпсы цатI", – гIанахIвитI ахабар зну агIвыра.
Аштаб ауысхагIвчва йшырхIвазла, йагIвсыз ацIхи амши руацIа коронавирус рыхьуи йрымхьуи ауысла 26-гIв дырхъвыхтI, COVID-19 диагноз хгIвы рпны йщаквдыргылтI. АзгIва зхьуа ауагIа йрыднагалкваз ужвыгьи йдырхъвыхыркIвитI.
"Ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 17-гIв щтIапI", – хабар аргитI аоперштаб.
Пандемия гIаджвыквлищтара Апсны апны зымгIва шалакIу 84-гIвы коронавирус рыхьуата йщаквдыргылтI, ауат йрыуата 37-гIв бзихахтI, хгIвы псытI.
швталра йа тшаншвцIара атахъыпI.