АуагIа коронавирус згIва йачвыхчарала аоперштаб хабар шаргазла, Апсны апны йагIвсыз амчыбыжь ауацIа коронавирус рыхьуата ужвыгьи 563-гIвы гIараутI, азгIва рыхьуи йрымхьуи ауысла 2594-гIв дырхъвыхтI.
Барганджиа Саид
ЙагIвсыз амчыбыжь ауацIа Апсны апны коронавирус рыхьуата ужвыгьи 563-гIвы гIараутI, азгIва рыхьуи йрымхьуи гIаддырдыруата архъвыхра 2594-гIв гIакIылстI. Ауи апш хабар аргатI АуагIа коронавирус згIва йачвыхчарала аоперштаб.
Аштаб ауысхагIвчва йшырхIвазла, ужвы ари асахIат Гвдауыта Аквта район чымазагIвтара апны 134-гIв щтIапI, ауат йрыуата 116-гIв коронавирус рыхьуата йщаквдыргылхьатI, 18-гIв коронавирус згIва гIаркIыта ргвы рзыбжапI.
19-гIв хIатлапI, 30-гIвы ауи апшта йгьхIатладзам. Амчыбыжь ауацIа ачымазагIвтара 60-гIв гIацIырщтхтI.
Аоперштаб хабар шаргауала, Согъвым йтагылу "Айтар" пансионат ахакв апны йандыргIалыз нархара щардала йынхауа йатдрыпауа агоспиталь апны коронавирус згIва рыхьуата йщаквдыргылхьата 64-гIвы щтIапI.
Россия Ахъахчара аминистерства йачIву йатдрыпауа агоспиталь коронавирус зхьуата йщаквдыргылыз ачымазагIвква райъазара йацхърагIарныс Апсны йгIарщтийтI.
АчымазагIвтара аъачIвагIагIвчва Ставрополь край йаланакIуа Буденновск къала йгIатыцIын йгIайтI. Ауи айсра къвырльыкъвхагIв 113-гIви айсыгIвчва йыртехниката 30 раъари аднакIылитI.
Йатдрыпауа агоспиталь йатахъхузтын чымазагIв 150-гIвы нанауахвырныс алшуштI.
Ауаъа йыцIу а 39-гIв ауи апшта йгьхIатлам, хIатлата йчмазагIвкву хгIвы йнадзитI.
Ауи акIвымкIвагьи аоперштаб хабар аргатI коронавирус зхьуа ачымазагIвква ашIашIкIгIара згIваква зхьуа йъарайъазауа Согъвым ачымазагIвтарагьи йщтIапI. УахьчIвала ауат 36-гIв йнадзитI. Ауат рыуа азаджв дхIатлапI.
"Пандемия гIаджвыквлищтара Апсны апны коронавирус зхьуата йщаквдыргылыз зымгIва шалу 4302-джь йнадзитI. Ауат йрыуата 2314-гIв бзихахтI, 36-гIв псытI", – хабар аргитI аоперштаб.
АуагIа коронавирус згIва йачвыхчарала аоперштаб ауысхагIвчва ауагIа азгIва тшачвыхчарала амальта йаъу шнарахвуаш йаквгIазшIыртитI.
Апсны апны COVID-19 ауыс уазцгIата аъачIвагIагIвчва рбжьагажва уаздзыргIвы йызлауаш йанакIвызлакIгьи йынхауа ателефон номерква аъапI.
Согъвым абзазагIвчви асасчви 995–02–07 йгьи 935–30–71 номерквала телефон йас йауаштI, Очамчыра – 925–10–09, Ткъварчал – 925–10–03, Гала – 925–10–07, Гагра – 925–10–05, Гвдауыта – 925–10–02, Агвдзера – 925–10–04 номерквала.
Щарда йнамихуата Согъвым апны йазакIу аномер 0303 уас йауата йырчпуштI, йазакIу аномер ареспублика шабгу апны йынхауата йырчпарнысгьи йащтапI.
швталра йа тшаншвцIара атахъыпI.