Апсуа ашвахIвагIв, асуратчпагIв, амультипликатор Квициниа Астамур апсуа бызшвала «АбраскIьыл йфыруысква» мультфильм гIанйыршан йгIайырбатI.
Апсуа мультфильм шIыц «АбраскIьыл йфыруысква» апрезентация Согъвым апны август а 27 атшын йакIвшатI.
Амультфильм гIанзыршаз йбергьльу апсуа опера ашвахIвагIв йгьи асуратчпагIв, апсуа шIалахIвара ащатала ауагIа швабыж йыргвапхауа акомиксква згIвыз Квициния Астамур йакIвпI. Амультипликатор ари азынгьи асюжет щатата йазичпаз апсуа хабарыжвква йгIарылихтI.
Ахабар йафыр хъаду заджвгьи дзамайгIайуа, зкърар мчу апельуан АбраскIьыл йакIвпI. Ауи йуагIахъа агIвымаква йырчвихчарныс анчва дгIайшатI, дбагъьата, йкъару мчыта, йчхIара дута дгIадзынгылтI. Атшы Араш гIайнапIыцIайкIын АбраскIьыл адуней дызгIаквлыз ауыс йырхъйауа дджвыквылтI. Ахабарыжв йшгIанахIвауала, гIамтакI анца ауи агъачва йырхъазымкIва анчваквагьи дырпшIагылуа далагатI, даргьи ауи йгIалцIла йызгвыжвкIын къарусызта дырчпатI. АбраскIьыл йагъачва ауи гIадрысабапын афыргьи йтшгьи ахIатшпы йкIыдшIархIвалтI.
Квициниа Астамур йызшIуырпшуаш аъам асаби комедия апны ауагIа йырдыруа ари атурых афырква гIабзайыргылхтI. Амультфильм актерква ШакIая Руслан, ЦкIуа Михаил, Хагба Кесоу, МикIаа Эрик, Аршба Тимур рбыжьква ацIарцIатI. Абыжьква анйыргIалтI йбергьльу апсуа актер Жорданиа Джьамбул.
Амультфильм пычIвта йгIадырбара апхъала апшыгIвчва рпахь арежиссер дгIачважватI. Квициниа амультфильм гIвысквша райхIа дшадынхалыз йхIватI.
«Сара ари амш щарда сазпшын ауи гIаталта спсы йгьхъанацIум. Ари апроект архъйара уагIа щардагIв йырбзирапI. Ари азаман ауацIа заджвзаджвыкIгьи йатахъым уыс хъатаскIыта гьгIасайымхIвтI. ЗымгIвагьи йсыцыркIуан», – йхIватI автор.
Ауи йымщтахь ажва назахвыз Жорданиа Джьамбул зымгIва драйхIвахIвтI.
«Ари йапшу апроектква злахIырхъйуш къаругьи лшарагьи анчва йгIахIитларгIатI, ауат зымгIва йрапхъата ауагIа апсуа бызшва рыцIа бзи йшырбуш йазынархапI», – йгIаликIгIатI актер.
АгIачважвараква рымщтахь апшыгIвчва апхъапхъа Хвынцариа Отар йыхьыз зхъу апсуа къральыгIва ансамбль йадыргалыз йдучвамыз аконцерт, уацIыхъван йара амультфильм ддырбатI.
АпшыгIвчва рчпащаква шаъазла ахвыцква йырхъазымкIва адуквагьи йызпшыз ргвапхатI.
Джьынджьуа Милана апремьера лпа дгIалдын дгIайтI. Ауи йшылхIвазла, амультфильм ларгьи гвалымста дгьгIаннамыжьтI.
«Ауи бзидздзапI Апсны апны апсуа бызшвала уыжвгIанчIви мультфильм ъагIаншауа – ахъаз йатаркIуа ракIвымкIва хIтурыхи хIшIалахIвари рыщатала йахъырхыз. Ари асабиква зымгIвагьи ауат ран-рабачвагьи йыргвапхуш уызгIвымсхыз комедияпI», – йылпхьадзитI апшгIвы.
АпшыгIвчва хъадаква – асабиква – напIы йамайгьдзауата йасуан. Амультфильм ъадзацуз ацIайква хъыччун, йызпшуа шджьарщауа, ргвгьи йшаланархIауа гIазырбуз абыжьква гIархъгун. Асабиква рлахIвараква гьцIарымкIуазтI.
«Амультик швабыжта йсгвапхатI. Джьащахъван, хъыччахъван. Ауи йащтагIайуаш сапшра стахъыпI!» – йгвала йхIвитI быжьсквша йырту Барцыц Богдан.
ИнапхIа Рамин рыцIа дахIбапI – 12 сквша дыртапI. Ауи йара штшихIвахуала, «америка комиксква бзи йбитI». Рамин йшипхьадзауала, амульфильм афыр АбраскIьыл адуней зымгIва йырдыруа афырхъацIаква закIылагьи дгьгIархьшвум.
«Амультфильм швабыж йсгвапхатI. Сара саба сйыхIвахьатI АбраскIьыл йгIайыквчважвауа акомиксква сызгIайауырныс», – йхIватI Рамин.
АбраскIьыл йгIайыквчважвауата Квициниа Астамур йапхъахауата йгIвыз акомикс асквш 2009 агIан йгIацIцIтI. Ауи агIацIщтра йацхърагIатI Апсуа бызшва атшауацIыхра афонд (асквш 2016 январь агIан ауи абызшва йазынарху аполитикала КъральыгIва комитетта йырчпахтI – аредакция ррытаразга). Акомикс апхьагIвчва гвы арымтуата йгьгIанымхатI, ласыла ауагIа йрылалтI. Квициниагьи йгIвбахуз акомикс гIацIищттI – ауыгьи апсуа хабарыжв «Киагуа НапхIа» ащатала йчпатI. Квициниа Астамур акомикс шIыцква дрыдынхалитI. АзджьакI хIазырхахьатI, ауаса ужвыгьи йгьгIацIымцIстI.
швталра йа тшаншвцIара атахъыпI.