АААК ЙхIаракIу асовет аунашвачпагIв Эгьзакь Мусса адуней апны абаза уагIа йгIарыцIанакIуа зымгIва йгIаталуа Асквш шIыцла драйхIвахIвтI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса апсуа-абаза уагIахъа Асквш шIыцла драйхIвахIвтI.
«Гвылагьи псылагьи йсцрийу абаза этнос йгIацIанакIуа хIтгIачва ду! Асквш шIыц 2020 йгIахIпыралуа ахъазла снашвайхIвахIвитI!» – арат ажваквала дгIалагатI йхIвахIвра Эгьзакь Мусса.
АААК ЙхIаракIу асовет ахъада йгIаликIгIатI йтыцIуа асквш йаргьи йыцызкIквауагьи «йгвыргъьауа» йшнардасуа, йауа ухIварыквын АААКгьи «Алашара» адкIыларагьи рпрограммаква йырну ауысква «ауагIа гIацIагылын пшдзата йщаквгылитI».
Ауи йгIацицIахтI йлырхыз амгIва ззынарху атгIачваква руысква шбзихуш, ахIбачва рынцIра шауырахуш, ахвыцква йгвыбзыгъата, йзгIвадата йшгIадзынгылуаш шакIву.
«ГIвычIвгIвыскIгьи дгIаныгIымжьуата, насыпта йбауата апрограмма дъалахIцIауа – ауыс ауаса йщаквхIыргылитI. Сквшипхьадза (апсуа-абаза уагIахъа – аредакция ррытаразга) рыцIа-рыцIа агвып тшгIадшвкIылитI, ауи швабыж хIгвы ардууитI. ЙхIчпуш, йхIхуш гIдыруата, рыцIа-рыцIа хIабадыруа, рыцIа-рыцIа хIадгылуа, абзибара рыцIа йхIырдууа, агвынгIвра рыцIа йхIрыбагъьауа, хIуыс ащайдза цIолата йхIчпауата, ауи хIзычпауата хIъабзазауа абаза этнос йгIацIанакIуа атгIачва – насып дупI», – йхIватI Эгьзакь Мусса.
Ауи йхIватI йапшым акъральква рпны йбзазауа апсуакви абазакви АААК ауысхагIвчва анрызцара гвышхвара ду шгIарылалуа.
«ХIаргьи къвадама гIахIшIалитI йыгIбапхьадзагьи. Турция хIхIварыквын, Иордания хIхIвума, Сирия хIхIвума, Европа хIхIвума, Египет хIхIвума – хIъацакваз зымгIвадзугьи хIащчваква, хIахщчваква аныгIбара агIан хIынасып рыцIагьи йдухитI. ЗаджвзаджвыкIгьи дгIаныгIымжьуата адуней йыкву зымгIва Апсуа-абаза конгресс а-Устав йану ащта хIтагылата – зымгIвадзугьи хIабайауаштI, зымгIвадзугьи хIацIагылуаштI», – йрыбагъьатI АААК ЙхIаракIу асовет аунашвачпагIв.
ЙхIвахIвра алйыргауата Эгьзакь Мусса йгIаликIгIатI Асквш шIыц йштгIачва гвыргъьахъву, йаргьи унагIвипхьадза, тгIачвипхьадза згIвадара, бзибара, абагвынгIвра, тынчра, пхара шырзитахъу йхIватI. Ауи йаццауата абаза уагIа асквш 2020 агIан «рыгвквагьи багъьата, ргвышхварагьи дута, рнапIквагьи багъьата йабаркIыта, рынасып амгIва йтагылата йымгIвайсырныс» дрызхIвахIвтI.
швталра йа тшаншвцIара атахъыпI.