Апсны р-Президент Бжаниа Аслани Адуней апсуа-абаза конгресс ЙхIаракIу асовет аунашвачпагIв Эгьзакь Мусси нхара уысла йанйатI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса нхара уысла гIвымшкIла Апсны дъадзаныз ареспублика а-Президент Бжаниа Аслан дйынйатI. Анйара апрезидент йунашвахъцIарта апны йакIвшатI йаргьи сахIаткIи бжакIи аъара йнайтI. Эгьзакь Мусси Бжаниа Аслани райчважвара пресса анхагIвчва гIвнамкIва йакIвшатI. Ауи аналга амщтахь Эгьзакь Мусса ажурналистква дгIарыдгылын разцIгIараква джьауап рыйттI.
«ХIара Апсны ргIапсщакI йтагылата, йащтацауата, ласыта тшауацIнахра ахъазла лшарата йгIаныршара атахъу хIалачважватI. Йлыхра атахъу запшпрограмму, ауи шлыхIхуаш – апсуа тгIачвипхьадза рпны хIшнадзуш, Апсны йту дзачIвызлакIгьи ажвлара агвныргIвра, акъральыгIва асоциал-экономика тшауацIыхра дшрылазлуш апшта», – йхIватI Эгьзакь Мусса.
АААК ЙхIаракIу асовет аунашвачпагIв Очамчыра район йаланакIуа Тамыш кыт апны йыруыхваз атурист адкIылара «Тамыш Village» (Россия йауу аинвестор далата йдыргылыз атурист тшпсщарта. Ауи адкIылара асквш 2021 июль агIан йгIахъыртIытI – аредакция ррытаразга) ашвапхала апсуа кытква тшауацIыхра рызтуаш аинвестиция проектква рхъйа йшауаш Бжаниа Аслани йари шрылачважваз гIаликIгIатI.
«Тамыш Village» йапшу апроектква акыт гIащтIырххитI, ауи йаргвану акытква рбзазагIвчва рыхъазлагьи нхарта тып гIандыршитI. Аинвестицияква шхчазлуш апшта алшараква гIаныршара атахъыпI. Аинвесторква Апсны йымшвауата йгIайра ахъазла ахабзаква рымчра шатахъу хIаквчважватI. Йара ауи апшта йалыргата хIаквчважватI апсуа хIаракьатчпагIвччваа рыжвлара гIанырша йшауаш, ауи асоциал-экономика программа алыхрагьи ауи архъйарагьи йалазлуштI», – йхIватI Эгьзакь Мусса.
Ауи йшихIвазла, анйара апны йгIащтIырхыз ауысква йрыуан апсуа бызшва агIащаквыжьри тшауацIнарыхри, апсуаква ртурыхи ргвбайари ауагIа йрылагара.
«ХIара апсуа бызшва атшауацIыхра, культурала йапшым апроектква рырхъйара, апсуара (апсуа-абаза уагIахъа ръадаб-намыс злащаквгылу ахабза – аредакция ррытыразга) рымчра йацхърагIуш щатакI гIанырша йауаш ауыслагьи хIхъвыцраква хIхIватI», – йгIаликIгIатI Эгьзакь Мусса.
ЙхIватI ауи апрезидент Адуней апсуа-абаза конгресс анхара хвду шаквицIауагьи.
«Бжаниа Аслан гватшныта Адуней апсуа-абаза конгресс анхара йырхъвыхитI, хвду аквицIитI, зымгIвалагьи йацикIитI», – йхIватI а-Конгресс аунашвачпагIв.
Эгьзакь Мусси Бжаниа Аслани йызлангIалыз ауысквала АААКи апрезидент йунашвахъцIарти руыснкъвгагIвчва уыжвласыла йанйарныс щаквдыргылтI. Эгьзакь Мусса йшипхьадзауала, ауи «а-Конгресс анхара асабапра рыцIагьи йаланархIуштI».
Адуней апсуа-абаза конгресс ЙхIаракIу асовет аунашвачпагIв Эгьзакь Мусси Апсны р-Президент Бжаниа Аслани ари гIванхауата йанйитI. Ауи апхъала ауат ранйара хIызту асквш мартI агIан йакIвшатI. Ауи анйара амщтахь Бжаниа Аслан йхъатала АААК анхагIвчва гвып драбадырныс йтахъхан СогIвым апны а-Конгресс ауысхарта дрызнашылтI.
швталра йа тшаншвцIара атахъыпI.