Апсны Республика а-Президент йалхрадза жвамшкI ракIвпI йгIанхаз. Апрезидентра йазабакIквауа ралхра штабква джьгарта йынхитI, Апсны ауагIа йыртахъу дшалырхуаш тшаздрыхIазыритI.
ЙхIпыру агIаншараква хIрызхъвыцуата ари хIхIвара атахъыта йхIпхьадзитI:
«Адуней апсуа-абаза конгресс» жвлара адкIылара йгьполитика организациямта аполитика уысква йгьрылалуам. Ауаса хIара алых хIымчпауата ареспублика аполитика къаруква зымгIва ацынхара ауысла хIрачважварныс хIхIазырпI.
АААК мурад хъадата йаман йгьи йамапI апсуа-абаза йгьи убых уагIахъаква байарата йырпхьадзауата йынкъвыргауа рыбагъьара. ХIхачIв хъадаква йрыуазакIыта йхIпхьадзитI ажвлара рджьгарра йацкIра, ауагIа рбзазара аъаща бзи азыгIаныршара, акъральгIв жвлара рыбагъьара.
Арат ахачIвква рырхъйара йащтата а-Конгресс Апсны Республика акытква рпны ашIыпIа хъвшараква гIаныршарала нхара акIвнаршитI. АААК анхагIвчва Апсны акъалакви акыткви рбзазагIвчва йрыуата згвы рыцIа йцхIауа ауагIа йрынйитI, абзазагIвчва ргвы рыцIа йыззыбжу йалачважвитI, акыткви акъалакви ртшауацIыхрала чIвырхъа-чIвырхъа ахачIвква лырхитI. УахьчIвала ауи йапшу анхара ргIапсракI йтагылата кыт 37 рпны йакIвшитI.
АААК ашIыпIа хъвшараква ъанхауа акыткви акъалакви рпны баргвырата йаъу гIазырбауа ашвапхаква азнакIкIхьатI. Ауат зымгIва заман айшысла амалькI рызгIаура атахъыпI.
АуысквакI йара а-Конгресс агвып йдырхъйитI. Ауи апшта, Баслахв кыт апны абзазагIвчви АААК ауысхагIвчви тшадыркIылын ауаъа апхьарта асуратчпагIв йтгIачва рыхъазла тдзы дыргылитI. Гвада кыт апны тдзы 50-и апхьарти сквш 25 цIитIта дзы гьрызцум. УахьчIвала адзцага зларчпуш апкъыгIвасква шырхвгIушла йангIалхьатI. Анхараква абзазагIвчва дара рнапIквала йырчпарныс йхIазырпI.Араткви арат йрапшу датшагьи ашвапха жвабапхьадзаракви ареспублика абзазагIвчва ушрайгвыгIвуа злагIауырба йауаш уыспI.
ХIара йгIахIхIырдырыз абжаракви ахачIвкви Апсны а-Президент йалхраква шакIвшалакIгьи уыздынхалра атахъу уыста йгIанхуштI. Ауи йгIалцIла хIара хIхIазырпI алхраква йрылу зымгIва йазхIкIкIыз ахабарква рыцагIвхIшарныс.
ХIара йшхIпхьадзауала, ареспублика апны рыцIа йхIаракIу акъральыгIва ъанатIа йазабакIуа дзачIвызлакIгьи акъраль атшауацIыхрала стратегия анлихуа ауагIа рахIа йыззыбжу алайхIвара атахъыпI. Ауаса йанаъазара, а-Конгресс йакIвнаршауа анхара акандидатква зымгIва йрысабапызлуштI.
Хвы ззыгIбауа ареспублика абзазагIвчва, пIатIу зкву акандидатква!
ХIара хIпсадгьыл ауачIвымш шбзийызлуш йазхъахIцIитI. ХIара авласть ауагIа разыгIальаматраква йъарызгылу, йкъагIауа акъраль апны хIбзазарныс хIтахъдзапI.
ХIара кьангьаш гьазгIагIгуам акъраль абзазагIвчва, йызгIваду аполитика къаруква зымгIва хIрыцта Апсны акъральгIвчва зызпшуа ауысква хIырхъйара ахIатырла ацацхърагIари ауысхари рджыпха тамам хIшзытагылуаш.
швталра йа тшаншвцIара атахъыпI.