Август а 1 агIарбараквала Апсны апны коронавирус згIва шIыцта жвипщыгIв йгIарахвтI. Ауи апш хабар аргатI ауагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, йагIвсыз ацIхи амши руацIа коронавирус рыхьуи йрымхьуи ауысла 222-джь дырхъвыхтI. АзгIва зхьуа ауагIа йрыднагалкваз ужвыгьи йдырхъвыхыркIвитI.

"Ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 26-гIв щтIапI", – хабар аргитI аоперштаб.

Август а 1 йакIвшаз ауагIа коронавирус згIва йачвыхчарала аоперштаб алачIвара амщтахь аштаб йалу зымгIва ареспублика апны коронавирус тшауацIнахра йапшIагылуата рыцIа пасата йнарахвыз амальква шнырххуаш йазгылуата йгIачважватI. Ауи апш хабар аргатI Апсны а-Министрква ркабинет апресс-къвырльыкъвхарта. АлачIвара апны йызлапшыз ауысква йрылан уахьчIвала аэпидемия аъаща, Апсни России ркъральыгIва мажа ахъысра шыргIапсу, атурист гIамта агIахътIра.

Апсны апремьер-министр АмкIваб Александр анхара адызкIылуа аштаб алачIвара апны август а 1 йгIашIарышвта Россия абзазагIвчва пырасдъа Апсны йгIатал йшауаш, Апсны абзазагIвчвагьи Россия йца йшауаш гIайхIватI

"Араъа Роспотребнадзори Россия згIвадарахчарала а-Министерстви Апсны апны асанитар-эпидемия аъаща йгьи атуристква гIазрайгвауа анхартаква шхIазыру ауысла рылкIгIараква гIахIпхьадзатI. Апсны Россия йшачпауа апшбыргта амажа хънатIитI, араъа прагылакIгьи гьаъазлушым. Ари ауыс ауырата хIаквчважван йаразакIы хIазгIайтI", – йхIватI апремьер.
Йара ауи апшта ауи йгIаликIгIатI ареспублика йгIаталквауа коронавирус шрымхьуала швъа рымазлара шатахъым.

Апсны а-Министрква ркабинет апресс-къвырльыкъвхарта хабар шаргазла, а-Координация штаб ауи ауысла а-Президент дызлапшуашыз швъа арыхIазыртI.

РыцIа пасата июль а 31 атшын Россия Федерация аоперштаб хабар аргатI Апсни России ркъральыгIва мажа август а 1 йшхъыртIуаш.

Пандемия гIаджвыквлищтара Апсны апны зымгIва шалакIу 98-гIв коронавирус рыхьуата йщаквдыргылтI, ауат йрыуата 37-гIв бзихахтI, хгIвы псытI.