Абызшваква рарыпхьара знархару апхьарта Capital School Center апны хабарргара ауысла йацыркIтI Адуней апсуа-абаза конгресс ахабарргарта портал аонлайн-проект «Апсышвала хIчважвитI/Абазала хIчважвитI».
Аинновация апхьарта Capital School Center апны йацыркIтI цри бызшва арыпхьара знархару Адуней апсуа-абаза конгресс ахабарргарта портал аонлайн-проект «Апсышвала хIчважвитI/Абазала хIчважвитI». Йджвыквлыз ацынхара йащтагIайуата апсуа йгьи абаза бызшваква рырдырра знархарата йхъыху апхьарасахIатква ужвы АААК апортали аканалкви рпны йахъазымкIва Capital School Center аинтернет уатыкв апынгьи уырпшы йауаштI.
Ахабарргарта портал аунашвачпагIв, абызшваква знархару апроект автор Лазба Амина йшылхIвазла, ауи щарда мцIуата апроект аунашва ралхIвтI Адуней апсуа-абаза конгресс йалу, Москва апны абызшваква дахIврала йъаддырдыруа йагъьу апхьартаква йрыуазакIу апхьарта агIаныршагIвчва Цушба Ирина йгьи Агрба Ролан. Лазба Амина ауат ахабарргара ауысла йацынхарныс тшырзыналырхатI.
«Ауат а-Конгресс амурадкви ахачIвкви абгата йрыцыркIитI, йалкIгIата, цри бызшва атшауацIнарыхра ауыс, ауи ахIатырла хIтшазынархара зынла йадгылын апроект «Апсышвала хIчважвитI/ Абазала хIчважвитI» йацыркIтI. Апсуа бызшви абаза бызшви рырдырра ргватра азынахIырхауата хIонлайн-проект ауагIа йрылагIгарныс ахъазла ари апш амаль ъагIаншаз швабыж хIайгвыргъьатI. Ауи ЙхIаракIу асовет аунашвачпагIв Эгьзакь Мусса а-Конгресс апахь йыргылуа ахачIвква рпны хъгалра змата йгIаликIгIаз йрыуазакIыпI», - лхIватI Лазба.
Ауи йшгIалылкIгIазла, Capital School Center асайт апны уахьчIвала уагIа мильуан райхIа тшанырцIахьатI, ажвлара медиа амальквала йгIацIанакIуа аудитория 10 мильуаныгIвкI раъара йнадзитI, ауи ахIатырла апхьарта аинтернет уатыкв «абызшва атшауацIнарыхри апхъахьыла ацынхари руыс апны цIагыла бзидздзата йхIзалуаштI».
Агрба Ролани Цушба Ирини хъапщылапI, ауат Capital School Center апхьарта хысквша рапхъала йгIандыршатI. Апхьарта ангIандырша йгIашIарышвта йапшым адуней бызшваква йрыдзхъагылата апрограмма йаларцIатI апсуа бызшвагьи.
Цушба Ирина дадгылитI цри бызшва арыпхьара йахъазымкIва ауи ауагIа йшрылаугуш уащтазара шатахъугьи.
«Цри бызшва арыпхьара апны магIны амата йхIпхьадзитI ауи ауагIа ркультура, ртурых байа шынкъвнагауа агIарбара. Ауи хIара йхцрийу къральпI ага сара йхIаракIу адырраква Европа апны йгIацIызгазтынгьи, ага ужвы Россия апны хIбзазаргьи. Ажва гьалам, хIара цри бызшва гьхIхъаштылуам, йалкIгIата ари хIбзибари хIпатриотизми ракIвпI хIзыргвышхваз хIапхьартаква рпны хвыдъа апсуа бызшва арыпхьара гIахъхIтIырныс», - лхIватI апхьарта агIаныршагIвы.
Ирина йшгIалгвалашвахуала, йапхъахауа апхьарта ангIахъыртIы ауаъа акабинетква зымгIва адуней акъала хъадаква йрыквыргIапста йадгалан, ауат йрылан «Согъвымгьи». Ауи акласс йапшыпхьадза апхьарта асасчва щардагIвы Апсны гIальаматра ду азырбауа йалагун, йрымагIальаматын апсуа бызшвагьи.
Абараса Capital School Center апны хысквша цIитIта атшпсщара мшква рагIан хвыдъа апсуа бызшва йадрыпхьитI. Йазалхта ауи йапхьарныс зтахъу кIьыдата ахча ртиуамцара апхьара курсква рзадыргалитI. Асквш аурала апсуа бызшва, Апсны акультура, ацIасква йырзынархата уыс щарда дырхъйитI. Ужвы асахIат апхьарта асабиква рнархара атшауацIнарыхра йадынхалитI, асабиква апсуа бызшва зладдырдыруаш амальква адыргалитI. Цушба Ирина дшаквшахIатхауала, апсуа бызшва ззырдырныс зтахъу ауи зцрийу апсуаква йгьырхъазым, Россия абзазагIвчва рыуа щардагIвгьи йыртахъыпI».
Capital School Center Ирина йлыцгIанзыршаз Агрба Ролан йшихIвазла, апхьарта апны апсышвагьи рылапхьадзата абызшваква зымгIва шIырпшыра змам цифра амальла йадгалу, smart технология йалачпу автор методикала йадрыпхьитI. «ХIара апсуа бызшва
уыжвгIанчIви технология джыпха йтагылата йахIрыпхьитI. ЙцIыхъвахауа азама йгIаншаз аинтерактив амальква гIахIрысабапитI. ЙзачIвбызшвазлакIгьи, йалкIгIата апсышва апшта ймайрам, апхьагIвчва рыхъазла майрата, джьащахъвата, уыжвгIанчIви заман йаквыргIапста «йчпара» атахъыпI», - йпхьадзитI ауи.
Агрба Ролан йшгIаликIгIазла, апхьарта апны апсуа бызшва ащапIы дрыбагъьарныс ахъазла йазалырхуа агватра акIвпI аонлайн-проект «Апсышвала хIчважвитI/Абазала хIчважвитI» ауысла а-Конгресси дари рацынхара йашвхIаусыгIва хъадахаз.
«ХIара хIхIазырпI апсуа бызшва йапщылу йзачIвпроектызлакIгьи йзачIвгIаджвыквцIаразлакIгьи хIацхърагIарныс, абызшваква знархару Адуней апсуа-абаза конгресс апроектква ртшауацIнарыхра йхIылшауала йацхIкIырныс», - йхIватI Агрба багъьата.
Абызшваква знархару ари апхьарта агIаныршагIвчва хIазырпI АААК ауысхагIвчва гвып йрыцIагылата апсуа бызшва арыпхьара джьащахъвата, гвынгIвырата йакIвшарныс ахъазла шIырпшыра змам уыжвгIанчIви методика алыхра йадынхалуа йалагарныс.
Capital School Center апхьарта асквш 2017 агIан йгIаншатI. УахьчIвала Москва апны ауи хфилиалкI амапI, закIы-закI апхьарта гIаныршапI Калининград йгьи Новосибирск рпны. Асквш 2020 сентябрь мыз йгIашIарышвта йыргвыгъапI Россия ауацIала филиал 20 райхIа гIандыршарныс. Capital School Center апны йапшым адуней абызшваква йрыуата 20 йрыпхьитI, ауат йрыуапI апсуа бызшвагьи. Ужвы ауи апхьартаква рпны уагIа 1500-гIв апхьитI, мзигIадзапхьадза ауаъа ацIалра йазынархата ахIвара швъа 1000 райхIа гIарадзитI. АпхьагIвчва йрыуата 120-гIвы абызшва ауысла агIвыма къральква рпны практика йахъыстI. Capital SchoolCenter апхьарта «Аинновация агIамта – 2018» согIат йалауреатпI. Ауи араъа гIарбара бзи зму аинновация технологияква абзазара йшаларыжьуа йаквшахIатпI.
АААК ахабарргарта портал цри бызшва арыпхьара знархару аонлайн-проект «Апсышвала хIчважвитI/Абазала хIчважвитI» сынчIва июнь мыз агIан йджвыквнацIатI, ауи гIвысквша йымгIвайсуаштI. Апроект шIыц ахачIв хъадаква йрыуазакIыпI апсуа-абаза диаспора йъанызлакIгьи цри бызшва ддырдырныс ахъазла йауацIыху амальква рзыгIаныршара.
швталра йа тшаншвцIара атахъыпI.