Асабикви чкIвыныргIи футболасра йъазырбжьауа йбергьльу апхьарта, Санкт-Петербург йауу «Зенит» футбол клуб (ФК) йачIву «Газпром» - Академия, декабрь а 1 Апсны апны филиал гIахънатIуаштI – Согъвыми Афон ШIыци рпны йаъазлуш ахъвшараква аланакIуата. Ауи апш хабар АААК ахабарргарта портал йгIадйырдыртI «Зенит» ФК академия абжьагIвчва ръачIвагIара йъаладырхIауа аквта адиректор, Россия афутбол адкIылара атехника комитет йалу Морозов Сергей.

Афилиал декабрь йалагата анхара джвыквнацIуштI, ауаса ауи агIахътIра йазынархазлуш агвыргъьахъв айззара асквш 2021 мартI агIан йадыргалырныс йаквдырпшитI. ЙгIайуа агIапын агIан "Зенит" академия ужвыгьи ахъвшараквакI гIандыршарнысгьи лырхитI, ажва ахъазла, Гагри Гвдауыти рпны. Ахъвшара шIыцква ргIахътIра ауысла щаквыргылра аннарахвуаш йапхъахауа агIвба рынхаща йанапшра амщтахь акIвпI.

"Ауи атлахан (агIапын – аредакция ррытаразга) хIара апхьара-тшыбжьараква рыхъазла хIфутболасчва араъа йгIагIгуаштI. "Зенит" ФК агенеральна директор Медведев Александргьи даъазлуштI", – йхIватI Морозов Сергей йгьи йгIацицIахтI агIапын агвыргъьахъв Апсны аунашвачпагIвчвагьи алазлушта йшазпшуа.

"Зенит" ФК академия аунашвачпагIв афутбол апхьарта йнарахвуаш асабиква шалырхуашгьи йхIватI.

"ХIапхьарта йаннахIахвуа зымгIва рапхъа хIызпшуаш асабиква рхъвмарща агъьырчIвырныс шыртахъу акIвпI. Араъа прагылакIгьи гьаъазлушым. ЗымгIва хвитызлуштI, закIгьи ахча гьазыртиуашым. РыцIа йгврыхву ацIайква академия апны йырпшырныс Санкт-Петербург йызшIыртуаштI, ауыгьи афутболасчва рпахь мгIва тыбгIа гIахънатIуаштI", – йхIватI Морозов.

Адуней апсуа-абаза конгресс ЙхIаракIу асовет аунашвачпагIв Эгьзакь Мусса "Зенит" аунашвачпагIвчва Апсны апны афутбол клуб академия афилиал ъагIахъыртIуа ахъазла дшырзыразу йхIватI.

"ХIара хIыла йабитI Апсны утыцIта йбзазауа хIабашталагIвчва ауи абзазагIвчва рхъатачIв тшауацIыхра, рынхаща йазхIара ахъазла алшара шIыцква шырзыгIандыршауа. Абизнесмен Джергениа Бориси "Зенит" академия анхагIвчви ъагIвзачву абзирала Апсны апны футбол тшазыбжьарта гIальамат гIахъыртIитI, апсуа футбол ахъазла ауи закIгьи йузашIмырпшуаш цхърагIарапI йгьи лшарапI, Апсны ауагIагьи ауи гIадымрысабапуата йгьагIвырщтуашым. Багъьата йхъасцIитI чкIвыныргIи спорти руысла Апсны Республика акъральыгIва комитетгьи ари ауыс йапщылу анахьанат ауысхартаквагьи хIаргьи хIацыта Апсны, Россия, адуней шабгу ртопасыртаква рпны тшыззыгIарбуш чкIвыныргIа гIалкIгIарала ргIапсща тамамкI шхIзыщаквыргылуаш, хIаргьи Апсны йауу футбол айачIваква ймачIгIвымкIва йшыгIбуш", – йхIватI АААК ЙхIаракIу асовет ахъада.

Санкт-Петербург, "Зенит" ФК академия апны футболасчва шIаквакI йырпшхьатI. ПщыгIвспортсменчва йнадзуз агвып ауаъа йгатI Афон ШIыц йауу асаби футбол команда рбжьагIвы, "Зенит" ФК а-Генеральна директор йунашвала Апсны афилиал даунашвачпагIвта йдыргылыз Капикян Армен. Согъвым апны ахъвшара абжьагIвчва рыхьызква уыжвласыла йгIархIвуштI, ауат «Зенит» ФК академия абжьагIвчва ръачIвагIара йъаладырхIауа аквта апны сынчIва сентябрь агIан йдрыхIазыркваз йгIарылырхуаштI.

Капикян Армен йшихIвазла, Апсны апны топасра зща йалу аспортсменква щардагIвыпI, ауаса футбол адгылща тшауацIнарыхра, абзазага-техника щата агъьчIвра атахъыпI.

"Ажва гьалам, сара хIцIайква ауат ("Зенит" ФК академия апны тшызбжьауа афутболасчва – аредакция ррытаразга) йгьызранкъвакъврым-хIва сахъгвыргIвун, ауаса сгвы ахъазгIваца йакъвсырпуан. ХIычкIвынчва швабыж бзита тшгIадырбатI", – йхIватI атренер.

АпщыгIвчкIвынчвагьи "Зенит" апхьарта йыцIашварныс шыртахъыз рхIватI.

"ЙуымхIвушта йгьаъам – араъа атшыбжьараква рнадзара рыцIа йхIаракIыпI. Швабыж йхIгвапхитI. Ауаса, йухIвушызтын, Апсны апны хIычкIвынчваквакI расщала араъа йаъакву йгьгIархьшвум", – йпхьадзитI афутболасыгIв шIа Лазба Анри.

«Зенит» ФК академия – Россия «алагъь къалахъада» Санкт-Петербург йауу йбергьльу афутбол клуб «Зенит» апны йгIаныршу асабикви чкIвыныргIи ъарбжьауа футбол апхьартапI. Академия мурадта йамапI аклуб акоманда хъада йрылата йзыхъвмаруаш афутболасчва гIадзыннаргылырныс. Апхьарта йара афилософиягьи амапI: ауаъа йгIацIцIквауа футболасчва бзихара йахъазымкIва здырраква цIолу гIвычIвгIвыс бзихарныс. Академия акомандаква «афутболасра йазгIашыкъта, уыла хънахуата йшхъвмаруаш» йащтапI. Ауаса йанаъугьи араъа «агвып арыхIазырра ацкIыс афутболасыгIв дрыхIазырра» апхъа йаргылитI. Апхьарта апны атшыбжьараква хпата йшапI: техники тактики, теории психологии тшырзыбжьара, амахъащахъаква рыбагъьара.