Согъвым апны Трыквшта йауу апсуакви адгьакви ръамапсыма цIасква йгIарыквчважвауа акнига апрезентация акIвшатI.
Барганджиа Саид
Согъвым апны апрезентация акIвшатI акнига «Трыквшта апны апсуакви адгьакви рмузыка фольклор». АгIацIщтра апны йгIарбапI Трыквшта апсуа-адыгьа диаспора, амузыка фольклор йтагылата агIвуагIахъакI рашва-ъамапсыма цIасква йгьи апсуакви адгьакви рапхъанчIви, руыжвгIанчIви тацанадылра цIасква. Акнига даавторпI афилология наукаква ркандидат, Апсны акъральыгIва университет афилология факультет адоцент, Гулиа Дырмыт йыхьыз зхъу Апсны агуманитар рхъвыхраква ринститут афольклор ахъвшара анаука нхагIвы ахIба Чурей Тыжын Али.
Ауи йшылхIвазла, ари атема архъвыхра жвасквша райхIа дадынхалтI. Ауат асквшква руацIа жвкнигIакI гIацIылщтхьатI, ауат йрыуата ахвба Трыквшта йтабзазауа апсуакви адгьакви рмузыка фольклор рейша йазынархапI.
«Адиаспора амузыка бзазара апхъанчIви псадгьыл йакъвгата гIамта ауыра йгIамгIвайстI. Ари анархара йгIацIанакIуа рхъвыхра ужвыгьи йгьакIвымшастI. Йапхъахауа арат ачIвырхъаквала агIвайщчва уагIахъакI рмузыка фольклор архъвыхра уыс гIахIрыкIаптI. Архив щарда хIрыдынхалуамцара акIвпI акнига аматериал шадхIкIылыз. Акнига апны йгIарбу аматериал шабгу Трыквшта апны йазхIкIкIытI», – лхIватI автор.
Апсны акъральыгIва университет апсуа литература акафедра аунашвачпагIв Аджьынджьал Диана акнига даквчважвауата апрезентация йалаз ргватра азыналырхатI автор нхара ду шакIвлыршаз, ауи анхара йшанархараз ХIХ асквшышв ацIыхъва йщаквгылаз аэтнос музыка атурых ареконструкции апсуа-адгьа диаспора рмузыка тынха архъвыхри.
Ауи йшгIалылкIгIазла, архъвыхра ззынарху апсыуакви адгьакви агIвымашта апны йщаквгылыз ртурых нашхыйа акIвпI. Ауат агIаншараква «зынгьи йымйыхуаш удын чвгьата йырзалтI ауагIахъа культура, аэтнос аъаща, апсуакви адгьакви ргвбайари рбзазари разакIыра».
«Ари архъвыхра амагIны зладуу, шIыцрата йалу щатата йырзалитI апсуа-адгьа наука ахъазла йшIыцта йапхъахауата ауи апны йгIарбу йгьи йырзахву ажванахъаква. ЗымгIва рацкIыс йхъадата араъа йырхъвыхпI аэтномузыка культура агIалцIыртаква йгьи Трыквшта адиаспора ауагIахъа-культура арыпхьара шакIвшуз», – лхIватI Аджьынджьал Диана.
Акнига швабыж йрымагIальамтхатI анаука нхагIвчва йырхъазымкIва апрезентация апны щардагIвыта йаъаз чкIвынргIи астуденткви.
«Турыхдъа бзазара гьаъам. Ари акнига амузыки афольклори рыбызшвала хIтурых гIахIнахIвитI. ШIырпшыра амамкIва швабыж йджьащахъвапI, ажва аламкIва йгIасахвта сапхьуштI», – араса лгвгIанаграква хIыцагIвылшатI Апсны акъральыгIва университет апны йапхьауа апхIвыспачкIвын Симониа Мрамза.
Архъвыхра атираж экземпляр 150 йнадзитI. Акнига гьыртиуам, ауаса гIальаматра азызбауа зымгIвагьи Согъвым йтагылу Папаскири йыхьыз зхъу а-КъральыгIва библиотека апны тшахадыргIвазарныс рылшуштI.
швталра йа тшаншвцIара атахъыпI.