COVID-19 йапщылата аэпидемия аъащаква ъайчвахауа йгIалцIла Апсны апны ашIакIра шIыцква щаквдыргылтI.
Апсны апны коронавирус тшауацIнамхра ахIатырла ашIакIраква щаквдыргылтI. Ауат октябрь а 5 йгIашIарышвта къару рауитI, ауи ауысла аунашва Апсны р-Президент Бжаниа Аслан сентябрь аквта мачвы ацIайцIахьан.
Ащаквыргылра шIыцла октябрь а 5 йгIашIарышвта ареспублика апны акультура нхартаква ракIвмызтын апещ ауацIа уагIа щарда азырддауата спорт анкъвакъвраква, аларпшраква, агIарбартаква акIвдырша йгьауам. Акультура нхартаквагьи рынхара анадыргалуа анхагIвчва рхъа рхчара ахъазла йатахъу зымгIва гIадрысабапра, йазырддауа ауагIа рпхьадзара дырмачIра, ауат аргваныта йадзхъачIвамкIва, "гIвчIвартакI рызбжьата" йандыргIалра атахъыпI. Апещква руацIа ансимшы дезинфекция рчпара атахъыпI.
Атацанадылракви антахьгьыт агвыргъьахъв алалракви акIвырша йгьауам, йпсыз агIвычIвгIвыс йнадасра йапщылу ауысква рпны уагIата йазырддауа дырмачIырныс йрылабжьитI.
АшIакIраква ажвлара чартаквагьи йрыдсылтI.
"Ажвлара чартаква рпны айшваква ауагIа метркIи бжакIи ацкIыс ймачIымкIва йрызбжьата йшчIвазлуш апшта йаладыргылра, анхагIвчва хъахчагала йадгалазара атахъыпI", – гIанахIвитI ащаквыргылра.
Ашвъа йшгIанахIвауала, Согъвымгьи Апсны анахьанат арайонквагьи рпны фачIвы, кытмлыкврхIара пкъыгIва, хIапчып ъартиуа абазарква рунашвахъцIартаква борчта йрыздыргылтI абазаркви ауат ргьагьари ансимшы йдрыцкьаларныс. АтйыгIвчвагьи абазарква антахьгьыт рынхагIвчвагьи хъахчага гIадымрысабапкIва амаль гьамам.
АшIыпIа унашвахъцIартаква рыхъвда йхъарцIатI ансимшы ажвлара транспортква руацIаква гIадрыцкьаларныс, ауат рынкъвцагIвчва хъахчагала йадыргалырныс.
Аминистерствакви акъральыгIва уысхартакви рхъвдаквцIараква
Ащаквыргылра йшгIанахIвауала, Апсны згIвадарахчарала а-Министерства асквш 2020 октябрь а 15-дза Апсны Республика акъала хъади арайонкви рпны коронавирус гIаздысылыз ачымазагIвква кIьыдата йъащтIазлуш ачымазагIвтараква гIалнахра атахъыпI. Йара ауи амш йадахIвуата Гвдауыта Аквта район чымазагIвтара апны ашIашIкIгIа згIваква рхъвшара кислород райшата йшазгIайуаш апшта адгалра-техника нхараква алдыргарныс хачIвыта йдыргылтI.
Ареспублика афинансква р-Министерства згIвадарахчарала а-Министерства йаланакIуа АкъральыгIва санитар-эпидемиология къвырльыкъвхарта апны йынхауа ауагIа рпхьадзара агIгIвыдза йалархIара ахъазла ахча азалнахырныс ахъвдаквырцIатI. Йара ауи апшта ауагIа коронавирус згIва рыхьуи йрымхьуи злагIаддырдыруаш йазалху анхагакви йгIадрысабапуа апкъыгIвакви злархвгIуш ахчагьи азалырхра атахъыпI.
Арыпхьарали абызшва политикали а-Министерства ашIыпIа унашвахъцIартаква йрыцта апхьартакви асабигIзартакви хъахчагала, джвджвагала, термометрла йадыргалларныс рыхъвда йхъарцIатI.
АуагIа коронавирус згIва йачвыхчарала аоперштаб хабар шаргазла, Апсны апны йагIвсыз амш ауацIа коронавирус рыхьуата ужвыгьи 49-гIвы гIараутI, азгIва рыхьуи йрымхьуи ауысла 192-гIв дырхъвыхтI. Гвдауыта Аквта район чымазагIвтара апны 138-гIв щтIапI, ауат йрыуата 117-гIв коронавирус рыхьуата йщаквдыргылхьатI. 17-гIв хIатлап, 46-гIвы ауи апшта йгьхIатладзам. Амш ауацIа ачымазагIвтара 19-гIв гIацIырщтхтI.
УахьчIвала Апсны апны коронавирус зхьуата йщаквдыргылыз зымгIва шалу 1765-гIвы йнадзитI. Ауат йрыуата 640-гIв бзихахтI, 15-гIв псытI.
швталра йа тшаншвцIара атахъыпI.