Адуней апсуа-абаза конгресси «Алашара» жвлара адкIылари йгIаджвыквырцIаз «Этноарт: йазакIу йгьи йузагIвымшуш апсуа-абаза уагIахъа» тема йазынархата йагъьу асурат агIаныршарала анкъвакъвра апIатла мчбыжьпхьадзарала йаладырхIатI.
Барганджиа Саид
АААК йгьи «Алашара» адкIылара йгIаларгаз анкъвакъвра «Этноарт: йазакIу, йузагIвымшуш» йгIалалуа анхараква ргIадгалра апIатла июль а 15-дза йаладырхIатI.
«Этноарт» - Апсны акъала хъада атдзыкI абльын граффити техникала йанырцIуш асурат ду эскизта йазалуаш йагъьу асурат агIалхра знархару анкъвакъврапI. Асурат темата йазалхпI «ЙазакIу йгьи йузагIвымшуш апсуа-абаза уагIахъа».
Апроект йахъпшылуа Санкт-Петербург апны йгIаныршу АААК ашIыпIа хъвшара аунашвачпагIв Реквава Темур йшгIаликIгIазла, апIатлаква рпсахра йашвхIаусыхIву асурат зквырчпушыз абльын рпсахырныс щаквыргылра ъагIаргыз акIвпI. Ужвы апхъагылагIв йэскиз аквырчпарныс ргвыгъапI Согъвым Воронов йурам 11 атдзы абльын.
Ауи атдзы абзазагIвчва йрыуу Джонуа Дамей йшихIвазла, йаргьи йыгвлачвагьи (Абзазарта пшвымаква рыжвлара «Университет» - аредакция ррытаразга) анкъвакъвра ахабар анырдыр дара-дара АААК тшырзынадырхатI аграффити ахъазла зквпшыра чIвагIвам ртдзы афасад бльын гIадрысабапырныс.
«ХIара а-Конгресс, ауыс йапщылу анхартаква зымгIва тшырзынахIырхатI, акъала ауысхарта йатахъу зымгIвала хIыргвынгIвын разыра джьауап хIаутI. ХIтдзы аквпшыра агъьхIчIвырныс хIтахъыпI, йалкIгIата, сквшкъомкI руацIа йырчIаджьым ауи абльын», – йрытамамтI Джонуа.
Асурат аквырчпара апхъала а-Конгресс абльын дырчIаджьуаштI, йгIацицIахтI ауи. «ХIаргьи джьгарта хIалазлуштI асурат агIалхра, хIгвыгъитI акъраль абзазагIвчвагьи ауыс джьгарта йгIалалырныс, эскиз щарда хIзыгIарщтийырныс», – йхIватI Джонуа Дамей.
АдгалагIвчва анкъвакъвра мурад хъадата йаму гIашвхIыргвалашвахпI: апсуа-абаза уагIахъа рэтнокультура ацзакIыра рыбагъьара йгьи Апсны акъала хъада аквпшыра агъьчIвра ауыс агIвычIвгIвыс гврыхваква ргIадкIылра. Анкъвакъвра йалу асуратква уагIахъа хцIара гIарныпщуата йаъазара атахъыпI. Анкъвакъвра йапщылу ауысква зымгIвагьи йауацIыхта йгIарбапI ауи акIвыршара ауысла Аъаща апны.
«Май а 15 йгIашIарышвта ауагIа рынхараква анкъвакъвра йазыгIарщтиуа йалагатI. Ауи дзачIвызлакIгьи – сквшыта дызтазлакIгьи, къральта дъабзазалакIгьи – дгIалалырныс дахвитпI. Асурат-эскизква швыга зигIвала йрыхIазырра атахъыпI, техниката йызлачпазлакIгьи ауитI. Асуратква зымгIва йызчпаз ртдзахьызква, рыхьызква, рныбыжь, ртелефон, йъабзазауа рыквыгIвзара атахъыпI», – йгIахIйыргвалашвахтI Реквава Темур.
Адгалра комитет июль а 27 асахIат а 10 йгIашIарышвта август а 5 асахIат а 10-дза Адуней апсуа-абаза конгресс асайт (www.abaza.org) апны йакIвшуш аонлайн-напIщтIыхра йалажь йауаш асуратква гIалырхуаштI.
Аконгресс апортал апны апычIв напIщтIыхра шакIвшауа гIарбазлуштI. РыцIа щардагIвы напIы ззыщтIырхуа йакIвпI анкъвакъвра апны йайгIайуаш. Ауи йыхьыз август а 8 атшын йгIархIвуштI. АйгIайыгIв сертификати асогIа хъади йыртуаштI: гвацчпа суратгIврали граффитили Россия апны йагъьу акомпанияква йрыуазакIу «Дари добро» («Бзира ха») аъачIвагIагIвчва ауи йэскиз Согъвым апны зганли зхIагIарали йгIауахвырквым квадрат метр 270 йнадзауа афасад бльын граффити квпшыра амата йакврыгIвуаштI.
ЙхIазыру асуратква Согъвым, Лакоба йурам, 109 атдзы адресла (Апсны Республика аналогквали ашвачIвквали а-Министерства атдзы – аредакция ррытаразга) ансимшы асахIат а 10 йгIашIарышвта а 18-дза а-Конгресс ауысхарта йрыт йауаштI, йа рнадзара бзита ари электрон адресла йгIащти йауаштI: info.abk@abaza.org. Анхараква сынчIва июль а 15 асахIат а 00:00-дза йнарахвитI.
АдгалагIвчва йшгIалыркIгIауала, анкъвакъвра дахIврала йакIвшузтын ауи агIаджвыквцIараква ауацIырхуаштI, йапымшвтуата апхъахьылагьи йымгIвайсуаштI.
Анкъвакъвра ахабар рыцIа йауацIыхта швапхьарныс йгьи ауи ауысла Аъаща тшахашвыргIвазарныс швылшуштI араъа.
швталра йа тшаншвцIара атахъыпI.