Адуней
апсуа-абаза
конгресс

АшIыпIа хъвшараква рыцынхарала АААК ахъвшара «Аимадара» проект апкъ йтата йызкьазууыз амдара мшы аднагалтI. Ари азын ауи йаланакIтI Мгвыдзырхва кыт аквтанай апхьарта апхьагIвчва. Дара ацIайква рахIварала ауи амш Апсны амарагIайыртала йаныргIалу Анчва йпщылу ашIыпIаква йырзалырхтI: Дранда, Мыкв, Елыр рпны йаъу акьльисаква йгIарыкIвшатI. ЧIыдата ауат Уатап апны Абраскьыл йхIатшпгьи ддырбатI. АмгIва аурала асабиква йырбуз йамагIну ралхIвуан Мгвыдзырхва апхьарта турыхдыррала арыпхьагIв Гвынба Саида. АщардагIв арат ашIыпIаква йапхъахауата йцатI, зынгьи йгьрымбасызтI. Даргьи джьащахъвара щарда рдыртI.
Ага амгIва йаквнащызтынгьи, апхьагIвчва амш ашвахIварали гIахIврали йалдыргатI.

Лыхни Цандрыпщи «АимцакIьачарала» атшыбжьараква ъакIвшушыз тып шIыцта йгIалырхтI. Апхъапхъа апхьагIвчва апсуаква ргвбайара апны ауагIахъа хъвмарщаква рмагIны рархIвтI, уацIыхъван ауат рхабзакви ракIвыршащи гIаргвындыргIвытI. Атшыбжьара анкъвакъвра джьащахъвала йалгатI. АпхьагIвипхьадза йщаласра, йкъвышра, йайрышра гIайырбарныс лшара йыман.
Амастер-классква аналгара апсуа уагIахъа хъвмарщаквала анкъвакъвра ду акIвшуштI. Ауи йагъьу агвыпква гIазнакIкIуаштIта айгIайыгIв дгIанарыбергьыльуаштI.

АААК апны йгIаныршу Апсны апхIвысква р-Координация совет СогIвым йаъу а-Конгресс ауысхарта апны алачIвара акIвнаршатI. Анйара йалан Очамчыра 4-хауа аквтанай апхьарта адиректор ПIапIаскьыр Льальа, Пицунда 1-хауа апхьарта арыпхьагIвчва Малиа Дони Трапщ Аиди, Джьгьарда кыт апхьарта арыпхьагIвчва Чвыджьба Белли Чиковани Наири, Дранда апхьарта адиректор Чвыджьба Мзия, Ткъварчал район аунашвахъцIарта апны ауысква унашва рхъызцIауа Берулава Минадора, КвтIол апхьарта арыпхьагIвчва Амычба Индири Чвыджьба Лолити, Лдзаа кыт апхьарта арыпхьагIвчва ЕныкIь Мимози Ванача Аниси, АААК ахъвшараква рунашвахъцIагIвчва.
АлачIвара йалан Къарча-Черкес йауу асасчвагьи – «Абазашта» газет аредактор хъада Къвыл Фардауыси «Черкес хеку» газет аредактор хъада Абидокъва Льусани. Айззара акIвлыршун апхIвыс совет аунашвахъцIагIв, ажурналист Бебиа Екатерина.
Анйара апны апхIвыс аполитика, анаука, ажвлара бзазара апны лтурасы, цри бызшва арыпхьаща, апсуара апхьартаква рпрограмма йалацIара ауыс йрылачважватI.
АлачIвара йалакваз апсуарала йалакIу ргIапсракI йтагылу апхьага лырхырныс йшазыхIазыру гIархIватI.

АААК арыпхьарали жвлара джьгаррали згIвадарахчарали ахъвшара арыпхьагIв ахIба, АГУ апны экологии апсауышвхIаква рморфологии ркафедра аметодист Цыбулевская Майа далата псабара хчарала атшыбжьараква акIвнаршауаркIвитI. Йызкьазууыз аинтерактив лекция акIвшатI АгIвдза Б.Д. йыхьыз зхъу Афон ШIыц аквтанай апхьарта апны.
Цыбулевская Майа ацIайква экология ззырхIвауа ралхIвтI, апсабари ауи агIалцIыртакви урызсакъра шатахъу, агIвычIвгIвыс дгIакIвзыршауа адуней псахрата йалайцIауа, зымгIвагьи йацыхIчIву хIтдзы – Адгьыл гIахIхчара ахъазла йчпачIву гIаргвынлыргIвытI. АпхьагIвчва айчважвара джьгарта йгIалалуан, ргвгIанаграква рхIвун. АхIауа рпIайра, ахъшвалква йшатахъу апш рыднымхалра, агIайыраква ыквхра, апестицидкви ахимия адгьылрбзигакви гIарысабапра – уахьчIва Апсны акъалакви акыткви рпны узынйауа экология проблема щарда гIащтIырхтI айчважвара ъадзакIвшуз. 
Анйара ацIыхъва апхьагIвчва апсабара тамамта йшазаъазлушла абжьагажваква зну агвынкIылгаква рырттI.