Кисловодск йачвыхъамкIва Къарча-Черкес апны Гвым дзыгIв йатшпынчIвалу абаза кыт Гвымлокт октябрь а 14 атшын йахъыцIуа асквш 280 дыртлапIитI. Акыт атурых, ауи ажвлара-экономика тшауацIнарыхра апрограмма абзазара йшалажьхауа ракIвпI нархарата йаму АААК ахабарргарта портал агIвыра.
Ардзынба Аста
Гвымлокт апны уахьчIвала уагIа хынзыкьыгIв райхIа табзазитI. Ари абаза кыт Къарча-Черкес республика йаланакIуа КъарчачкIвын район аквта кыт Учкекен амараташваратала километр 22-ла, ареспублика акъала хъада агIвадахь-марагIайыртала километр 53-ла, алагъь-мараташвартала километр 44-ла Кисловодск тшпсщарта къала йырчвыхъарапI. Ауи акIвпIта, ареспублика ауацIала ари акыт Абаза муниципал шIыпIагьи анахьанат абаза кытквагьи йырчвыхъарата йчIвапI, ауат зымгIвагьи амараташварта хъатала агала рыцIа йхъарапI. Ауи акIвымкIвагьи, акъарчаква ъайхIу КъарчачкIвын район апны абаза кытта йаъу ари закIзаджвыкI акIвпI.
Акыт абзазагIвчва абаза бызшва атIапIанта диалектла йчважвитI, ауаса лкIгIара зму дара рчважваща рымапI: «йшвшвитI» рхIвитI агвымква рыхъазла. Ауыла йгIалыркIгIитI агвым чважваща апны «йшвшвуа» абыжьква шмачIым.
Акыт асквш 1738 агIан йгIаншата йырпхьадзитI, ауи ахIатырла хIызту асквш 2018 апны Гвымлокт абзазагIвчва акыт асквш 280 аюбилей дыртлапIитI. Агвыргъьахъв йауацIыхта йщтIыхпI: акыт аунашвачпагIвчва аквта уатыкв апны агвыргъьахъв айззара адыргалтI, ауи йгIалалныс зтахъу зымгIвагьи гIадрайгвитI. Агвымква ргвыргъьахъв гвщтIыхла йапылтI, зымгIва йрапхъата йгIаншауа апсахраква йрайгвыргъьауата. Ауат хIрылачважвара апхъала атурых анапаквакI хIрыквгIацапахпI.
Турых зму акыт
«Апсны йангIатыцIх амщтахь агвымлоктква Гвым дзыгIв апсыхIва апны тшандыргIалуа йалагатI. Зны архъа гъвгъвараква рахьыла йайтыпун, уадыргIвана айсра акъазауатква ршвхIаусыгIвала ащхъаква рахьыла апсыхIвала йгIацапахуанта йчIвахуан. Рбзазарагьи ргIагвалашвахраквагьи зымгIва адзыгIв ахьыз йапщылапI. Ауат ауи «Гвым» - хIва йапхьитI, дара йахьырцIата йырпхьадзитI. Ари адзыгIв абазаква рапхъанчIвиква йгьахьрымцIамищтI апхъала Апсны апны йъабзазуз Гвым псыхIва йгIахъыхта».
Абараса Гвымлокт даквчважватI апсыуа апхьахьа Басариа Симон асквш 1929 агIан КIавкIаз ангIамидуз асхъан.
Акыт ахьыз «Гвымлокт» урышв бызшвала «Кумско-Лоовский» – хIва йапхьитI, йгIаныцIуагьи ари акIвпI: «Гвым дзыгIв йатшпынчIвалу Лоу кыт». ЛоургIа акыт апны хъгалра нкъвызгуз абаза ахIчва ткъвымпI. Октябрь революция апхъала акыт араса йапхьун. Асоветква рзаман акыт ахьыз рпсахын «Красный Восток» ахьырцIатI ахI ткъвымхьыз шгIанамырбуш апшта. Асквш 2004 агIан акыт астатус тшапсахтI.
Акыт ахабар шырхIвауала, абзазагIвчва рапхъанчIвиква ПсхIвы кыт йгIатыцIтI, Лагъь КIавкIаз ащхъаква рахьыла йгIайтыпауамцара йызнымкIва рчIварта рпсахтI, Теберда дзыгIв апны акIвызтынгьи, Эшканон дзыгIв атшпы акIвызтынгьи, йцIыхъвахауата уахьчIва йъабзазауа ачIварта апны йгIанхатI. Йшбергьльула, Гвым атшпы апны акыт хпата йшата йчIван – Локт, Трамкт, Джьантемыркт – зымч таз ахI ткъвымква рыхьызква йгIархъшахъыцIуата. Асквш 1880-ква рагIан ауат кыткIта йалалхтI.
Акыт атшауацIнарыхра анархартала
ЙцIыхъвахауа асквшква руацIа Гвымлокт апны акыт ажвлара-экономика тшауацIнарыхра апроект абзазара йалажьхитI. Акыт аквпшыра агъьчIврала анхараква акIвшитI, нархарта щардала йынхауа аспорт комплекс руыхватI, этнография кытчкIвын дыргылырныс рмурадпI. Ауи «Гвымлокт ларпшырта» зхьзу атурист проект йахъвыкIпI.
Гвымлокт апны ймачIымкIва атуристква урынйалитI. КIавкIаз утыцIта хъарата рхабар гахьатI араъа йгIацIцIуа анарзан дзыхьква. Асоветква рзаман йгIашIарышвта адгьыл ауат адзыхьква шгIацIцIуаш апшта йыржуан. АъазагIва дзы йалапI кальцийгьи, натрийгьи, датша магIны зму апкъыгIваквагьи, ауи ахIатырла агIвычIвгIвыс йзгIвадара ахъазла сабап алапI, удзышгьи тнакъьитI. Йара акытгьи Кисловодски Черкесски апызщылуа афедерал трасса апны йаныргIалпIта араъа туризм тшауацIнахырныс ахъазла амаль щардапI.
Гвымлокт аквта йаныргIалта парк чкIвын гIандыршатI, араъа чкIвынргIагьи йранйартапI, аъазагIвадз назахвырныс йгIадсылуа атуристквагьи йыргIашIасыртапI.
Акыт атшауацIнарыхрала апроект абзазара йаларжьитI Абаза-апсыуа уагIа ртшауацIнарыхра ацхърагIара знархару Адуней адкIылара «Алашара», ауи даунашвахъцIагIвпI араъа йгIадзынгылыз ахIаракьатчпагIв, абзихагIв Эгьзакь Мусса ХIабальа йпа.
Ауи йакIвпI ареспубликала йагъьу йрылапхьадзу ауыжвгIанчIви спорт комплекс ауыхвара гIаджвыквызцIазгьи. Акомплекс ахъатачIв нхартакви акъральыгIви рацынхара абзирала йгIаншатI. Аспорт тдзы ангIахъыртIуаз, асквш 2018 февраль мыз агIан, Къарча-Черкес а-Хъада Темрезов Рашид Эгьзакь Мусса йквнайыргатI йхIаракIу артшхъвага – «Къарча-Черкес республика ахьыла агIатгараква рыхъазла». Ауищтара аспорт комплекс «Алашара» акыт рхъа аладухауата йынхитI: араъа йаъапI боксла, каратэла, хвитра абакIрала асекцияква. Ахореогграфия йгьи атренажёр пещ дуква аныргIалпI.
«ДзачIв чкIвынызлакIгьи йбзазара дахIврала йзыщаквыргылныс ахъазла»
АААК ахабарргарта портал Мусса ХIабальа йпа тшизынадырхатI Гвымлокт ажвлара-экономика тшауацIнарыхра апхъахьыла йыла йшгIацIалуа даквчважварныс.
Ауи йшихIвазла, араъа мачIмачIымцара акытмлыкврхIара тшауацIнахуаштI, арахврхIара, акыт абзазара ргIапсра ащапIы рыцIа-рыцIа йбагъьахуштI, шIырпшыра змам апроектква абзазара йалалуаштI, ауат йрыуазакIыпI аэтнография кытчкIвын ауыхвара, ахIаракьатчпара чкIвын, ахIаракьатчпара квтаней йгIарыцIанакIуа анхартаква гIаншуштI, асабиква ргIадзныргылра йазалху апроектква лыххуштI. Йазалхта абзазара йалажьхуш ажвлара программа агIвычIвгIвыс данчкIвыну йгIашIарышвта йгIвыра днайындзкIьара йбзазара шабгу штшауацIнахуа гIацIанакIуата йаъапI, ауи мурадта йархъйуштI агIвычIвгIвыс йбзазара айхIара йкъару тата, дызгIвадата, аспорти афизкультури дрыдкIылата йгIайгырныс.
«АуагIа, йалкIгIата чкIвынргIа, рталант дахIврала йгIахъызтIуа, ауи йзыргвышхвауа аршIыйари акультури рнархартаква тшауацIырхуаштI. Анхара шадгалазлушла, ауат апроектква йрылалуа дзачIв гIвычIвгIвыс шIазлакIгьи ауагIахъа цIасква нкъвигауата, цри бызшва йдыруата йбзазара дахIврала йзыщаквыргылуа дымгIвайсуаштI», – йхIватI Эгьзакь Мусса.
«Алашара» ахъада йшипхьадзауала, ауагIа акыт атурых, акультура, ацIасква рыцIа йауацIыхта йрыхаргIвазара атахъыпI, ауыла «Россия, агIвымакъральква рбзазагIвчва йрыуу атуристква рыцIа-рыцIа йщардагIвхауата йшгIахъыркъьалуаш апшта, ари ашта пшдза апны ауагIа рбзазара шаъу, йызлащаквгылу ауагIахъа цIас гIальаматква шыддырдыруаш апшта».
Поздравляем братский народ✊
Мира и благополучия.
швталра йа тшаншвцIара атахъыпI.