11 сквша рапхъала, асквш 2008 август а 26 атшын, Россия апрезидент (ауи асхъан – Медведев Анатолий – аредакция ррытаразга) мачвы рыцIайцIатI Апсны Республика йгьи ГIвадахь Осетия рхъахвитра ацкIра знархараз ащаквыргылраква. Йтшазынархара апны Медведев араса йгIаликIгIатI: «Асатин йгьи апсуа уагIахъаква ртахъыра гIапхьадзахауата, ЙадкIылу АуагIахъаква р-Организация а-Устав, асквш 1970 йгIан йдрыбагъьаз адуней акъральыгIваква рквтала айгвара азазаъащаква руысла ахвитнагIаква рпринципква, асквш 1975 агIан Хельсинки апны йнарахвыз СБСЕ АцIхъватра швъа, адунейла щата зму анахьанат ашвъаква апкъ йтата сара мачвы рыцIасцIатI Россия Федерация ГIвадахь Осетия ахъахвитра йгьи Апсны ахъахвитра йшацIыркIуа знархару ащаквыргылраква».

Медведев йтшазынархара Россия акъральыгIва каналквала йангIадырба амщтахь Апсны абзазагIвчва акъраль ашта хъада, асквшква 1992-1993 рагIан Апсны ауагIа р-Абашта айсра акIвшауата йырблыз йгьи йдрыхъвашаз аправительства атдзы апахь а-Хвитра ашта апны йгIайззауа йалагатI. А-Республика акъалаква йгIартыцIуа йгIайуамцара гIвба-хпа сахIатла жванзыкьыгIв пхьадзара йнадзуз ауагIа гвыргъьара ду рхъагылата ашта дырчвытI. АуагIа кьахвуан, йгIахIвуан, йырзымчхIахуата йыззпшуаз ауыс, адуней акъральква Апсны ахъахвитра йъадгылыз анысла тшакIвдыршауа азаджв азаджв йайхIвахIвуан. Ашта апны йгIайззаз ауагIа рпахь йгIачважватI ауи агIан Апсны апрезидент йъанатIа нкъвызгуз Багапщ Сергей, акъральыгIва уысхагIвчва, Грузия айдауараква рзаман Апсны ахъахвитра джьгарта йазабакIуаз ауысхагIвчва. Ауи атшын Согъвым а-Хвитра ашта анцIрала агвы йгIатахауата ауагIа рынасып агвыргъьахъвла йырчвын.