Адуней апсуа-абаза конгресс чкIвыныргIи спорти руысквала Апсны Республика АкъральыгIва комитет ацта апхьагIвчва рыхъазла жвлара проектлыхрала апроект апкъ йтата йпщбахауа атшыбжьараква акIвнаршитI.
Базба Селма
Апроект апкъ йтата гIвымшкI йнайуа интенсив акIвшитI. Ауаъа жвлара проектлыхрала аъачIвагIагIвчва Чкадуа Лани Цквитариа Мати апхьагIвчва йгIартахъхуш дырра рыртитI, йъагIартахъхушгьи рархIвитI. Атшыбжьараква гIвымшкI йакIвшитI: йапхъахауа амш атеория рархIвитI, йгIвбахауа амш чкIвыныргIа гвып-гвып тшыршитIта дара-дара йапхъахауа рпроект рызлыхуазтын йапшитI.Апхьара сквшшIыц апны жвлара проектлыхрала апроект Дурыпщ аквтанай апхьарта апны йджвыквырцIатI. ГIвымшкI руацIа апхьагIвчва жвлара магIны зму ауысква рызгIауа, акврыдзраква рзыпхьадзауа, проект лырхта ауатыкв йырзыгIатацIахуа тшырбжьун. АбжьагIвы Чкадуа Лана йгIалылкIгIатI атшыбжьараква ъакIвшахьаз апхьартаква рпны апроектква йщаквгылу нархаракI шрыму гвы шаутуа.
«Ари хIара хIыхъаз йпщбахауа анйарапIта – гвы ахIтитI апхьагIвчва рапхьарта апны рыцIа магIны змата йырпхьадзауа ауысква ззынархазлауа. Ауи йгIаквхIхта хIаргьи хIхъа хачIвы азхIыргылитI, апхъахьыла чкIвыныргIа рыцIа йауацIыхта йшхIырхъвыцуаш апшта», – лхIватI ауи.
Йдырхъйара атахъу уыста йгIалырхтI: апхьарта апшцIа йа атшпсщарта тып аныргIалра, спорт ъамапсымала тшадгалра, апхьарта апны гIахIвра гвып гIаныршара.
Апроект йахъпшылуа АААК апны чкIвыныргIи физкультури тшауацIдрыхрала ахъвшара аунашвахъцIагIв Квициниа Есма апроект дахIврала йшхъйауа гIалылкIгIатI.
«Атшыбжьараква Ткъварчал къала, АдзыгIвбжьа, Мгвыдзырхва, Дурыпщ кытква рпны йакIвшахьатI. Акомиссия йгIалырхыз апроектква апхьагIвчва гвыпква йдырхъйитI. СгвыгъитI ауи зны йызчпаз ргвышхвагата йырзалта апроектлыхра рыцIагьи тшадрыщцарныс ртахъхушта, даргьи рахIа йыззыбжу йгIаквхта рыцIа йдуу ауысква рызгIащтIыхуа йгьи йырзынардзауа йцушта», – лхIватI Квициниа.
ЙгIвбахуз амш ацIыхъва агвыпква рпроектква ауатыкв йгIатарцIатI. ЙгIадрайгваз аъачIвагIагIвчва, апроект аунашвахъцIагIв, апхьарта аунашвачпагIвчва злаз акомиссия ауат йрылапшын йайгIайыз дгIалырхтI. Йшцауала, Дурыпщ апхьарта апны спорт хъвмарырта рчпуштI.
ЙайгIайыз агвып йрылу Арсалиа Владислав аинтенсив лахIварата йгIайыланацIаз хIыцагIвишатI.
«Ажвлара адкIылараква ансимшы йхIызгIайта йызлагIахIцхърагIуш йгьазцIгIум. Анчва дырзыразхатI атшыбжьара хIзадызгалыз. ГIвымшкI руацIа хIара йхIызбзийыз ауагIа хIрыцынхатI, ауат хIара хIгвы аущтта, йхIчпауа хIымагIальаматта хIшынхушыз апш зымгIва рчпатI», – йхIватI ауи.
Жвлара проектлыхрала атренингква – АААКи чкIвыныргIи спорти руысквала Апсны Республика АкъральыгIва комитети йацыта йдырхъйауа проектпI. Апроект Апсны акъалакви акыткви рпны акласс ахIбаква рапхьагIвчва апроектлыхра йаларжьырныс ахъазла йакIвдыршитI. АдгалагIвчва йырмурадпI асквш 2024 ацIыхъвадза ужвыгьи гIвтшыбжьаракI акIвдыршарныс.
швталра йа тшаншвцIара атахъыпI.