Агвыргъьахъв ареспублика арайонквакI рпны январь а 3 йгIашIарышвта а 8-дза йакIвшуштI.
Голандзиа Эсма
Афестиваль ауагIа гIазызддуш квтата йгьи рахIа йдуу шта хъадата йазалуаштI «Апсны» этнопарк. Ауаъа апсуа напIъазаква йапшым апкъыгIваква ргIарбарта адыргалхьатI – ацIыквква, ахIваспаква, амакъым ъамапсымаква, ажвчIвква, ашвырква йгIарылху ахъагIараква, ауагIахъа фачIвква, йаргьи афестиваль йгIадгылуа дзачIвызлакIгьи арызкъква рхъагIара дапшырнысгьи хъмаштылгата йзалуаш асогIаква йхвгIарнысгьи йылшуштI.
Афестиваль апрограмма згIальаматраква апшым апшыгIвчва йыргвапхуш ауысквала йалазлуштI – амакъымршIыйагIвчва ргIахъвмарра, агIарбартаква, аджьармыкIьаква, атшыбжьартаква, рахIа йрымаджьащахъвадзахушгьи – ачырпIи дуквала апссгIара.
ЙъакIвызлакIгьи уыла дыргвыргъьитI агъын гвыргъьахъв йагIарбара хъаду амандаринква йгIарылху акомпозиция пшдзаква. Ауат ашвырква йгIарылху аршIыйара хъада СогIвым апны Апсуа драмтеатр апахь тшаннаргIалтI.
Асквш ШIыц ахъазла йабадыркIыз ауи «амзагIв цIла» джьащахъва рчпара ахъазла мачI-щардазтынгьи мандарин тоннбжакI атахъхатI. ХвметркI зхIагIару «ацIла» адуней апны зымгIва рацкIыс йдута йгIацIцIтI.
Афестиваль аднагалтI хъахIара гIалкIгIара знархарам автоном организация «АЦЛА» жвлара-культура проектква р-Квта.
«Афестиваль мурадта йаму закIгьи йапшым гъын гвыргъьахъв гIаныршара, адуней акультура уатыкв апны Апсны амагIны щтIыхра, апсуаква ргвбайари рцIаскви ауагIа йдырдырра, акыт млыкврхIара тшауацIнарыхра, агъын гIамта агIан туризми акъраль аэкономики ртшауацIыхра акIвпI», – йгIалылкIгIатI афестиваль адиректор Габуниа Светлана.
Ауи йшылхIвазла, апрограмма араъа йгIайуа дзачIвызлакIгьи йымагIальаматхуш закI шйауаш апшта йлырхтI.
«Мандарин» фестиваль январь а 8-дза йнайуаштI. Ауи ареспублика арайонквакI гIаланакIуаштI. Аэтнопарк йахъазымкIва алалраква акIвшуштI «София» совхоз йгьи «Марнеро» маратшашIарпхарта рпны. Асасчва апсуа эстрада йагъьу аршIыйагIвчва йырпшныс, хрихыцла йхысырныс, ацитрус уатраква, йапшым агIарбартаква, нархара зму ахъвлапынква йгьи атшыбжьараква йцарныс лшара рымазлуштI. Афестиваль апкъ йтата январь а 4 аэтнопарк апны Адуней апсуа-абаза конгресс йарыхIазырыз этнография нархара зму афильмква гIадырбуштI.
швталра йа тшаншвцIара атахъыпI.