Адуней апсуа-абаза конгресси Инджгиа Джьамбули йацдырхъйауа апроект апкъ йтата Апсуара йазынарху йапхъахауа ателебара гIатра гIадырбатI.
Голандзиа Есма
Апсуара – апсуа уагIа сквшызкьпхьадзарала йынкъвыргауа аъадаб-намыс байараква, ауагIахъа цIаскви ахабзакви адызкIылуа йалачпу гвынгIвырапI. Адуней апсуа-абаза конгресс анхара анархара хъадаква йрыуазакIыпI йцIасу акультура гIащаквыжьра йгьи тшауацIнарыхра. Асквш 2022 агIан АААК ЙхIаракIу асовет аунашвачпагIв Эгьзакь Мусса а-Конгресс анхара апны йаргвану ахвысквша «Апсуари Абазари йрыгIамтата» йшаъазлуш гIайхIватI.
«Сара кьангьаш гьазгIазгуам Апсуари Абазари апсуа-абаза уагIа рбзазари ркъагIари йшрыщату йгьи йшыридеология хъаду. Азаман архъвыхраква йгIарылсыз ауат агвынгIвыраква уахьчIвагьи рмагIны гьымдзстI, йауа ухIварыквын, ауат анцIрала йынкъвыгIгауа, агIвычIвгIвара зымгIва хвы ззырбауа абайараква йрыцахъуа хIгвбайара гIадырбитI», – йхIвитI Мусса ХIабальа йпа.
Апроект Апсны акъральыгIва телебара апны йгIадырбуштI, йаргьи культура-арыпхьара нархара зму, йащтацауа агIатраквала йалазлуштI. ГIатрипхьадза апны атурыхдырыгIвчва, аэтнографква датшагьи аъачIвагIагIвчва йырдыруа гIархIвалуштI, уахьчIва йгIагылуа азцIгIараква джьауап рыртлуштI.
Апроект атурых наукаква ркандидат, АААК ЙхIаракIу асовет йалу Инджгиа Джьамбул йгIалайгатI. Апроект апхьахьакви аъачIвагIагIвчви анхара йгIаланаркIра, апсуа бызшва агIарысабапра тшауацIнарыхра, йхъадахугьи – йгIадзынгылуа абанпараква Апсуара ашвапхаквала йбжьара йырзынархапI.
«Апроект апсуаква йырцIасу агвбайара ауагIа йауацIыхта йрылжьра, сквшышвпхьадзарала йщаквгылыз хIкультура йауата магIын ду зму йапшым ахъатакви ахъвкви гIащаквыргылхра йазынхушта йаъапI», – йгIаликIгIитI Инджгиа Джьамбул.
«Ашьаҭамырӡга» йапхъахуз агIатра АГТРК апны май а 12 йгIадырбатI. ЗымгIва шалу абаркIыра йаланакIуата гIатра 24 ахъырхуаштI.
швталра йа тшаншвцIара атахъыпI.