Бганба Щазина                                                                                                       

Апроект Апсны атурых йгьи акультура тынха ардырра йгьи ауагIа йрылагара йазынархапI. Ауи мурад хъадата йаргылитI йгIадзынгылуа абанпара патриотра рылата йбжьара, ауагIа дара руагIахъа атурых азыгIальаматрата йазрыму йалархIара, асабиква атурых-культура объектква рырдырра йгIаланаркIра. Апроект Апсны акытква рапхьартаква рапхьагIвчва акъалаква рпны йаъу амузейква йцарныс лшара рнатитI.

Апроект унашва ахъызцIауа ашIыпIа хъвшараква рыцынхарала АААК ахъвшара аъачIвагIагIв Симониа Херсон йшихIвауала, апроект ужвы йдырхъвыхырныс йауырщтитI, ауаса ауи йнардзата йдырхъйушта йаквдырпшитI.

«АААК ЙхIаракIу асовет аунашвачпагIв Эгьзакь Мусса йхIыцикIын хIара уахьчIва проект шIыц джвыквыгIжьитI. Мусса ХIабальа йпа запхъа дгылу а-Конгресс агвып апсуа чкIвыныргIа ргвы байата, рпсадгьыл бзи йырбауата йбжьара йазынарху апроектква йалкIгIу гватра рзалырхитI. Ари рхъвыхрата йджвыквхIцIитI, ауаса сара кьангьаш гьазгIазгуам апхъахьыла ауи дахIврала йнардзата йшхIырхъйуш», – йхIватI Симониа.

Йапхъахауата зджьара йыргарныс Уаквыми Арасадзыхьи кытква рапхьагIвчва гIалырхтI. АпхьагIвчва 45-гIви ауат рарыпхьагIвчви Гвдауыта йаъу Дбар Сергей йыхьыз зхъу асквшква 1992–1993 рагIан йакIвшаз Апсны ауагIа р-Абашта айсра АкъральыгIва музейи Мгвыдзырхва апны «Апсны» этнопарки йдырцатI.

Асасчва Гвдауыта амузей апещква зымгIва ддырбатI. БжьыкIгьи рхъымгауа ацIайква амузей адиректор Джьыкьырба Гвыгвыца айсра ахъазла, уахьчIва йгIадзынгылуа абанпара бзазарныс ахIатырла Апсны ахчагIвчва фыррата йынкъвыргаз рыхъазла йгIаралхIвуаз йаздзыргIвуан.

Аэтнопарк апны апхьагIвчва хIапхъанчIвиква рцIасквала йпсыпнкъвгатI, хIуагIахъа ргвбайара ахъвыкIипхьадза магIныта йаму рдыртI.

«Апхьарта апны хIапхъанчIвиква шбзазуз гIахIархIвлитI. Аэтнопарк апны хIара ауатква зымгIва хIылаквала йыгIбатI. Ари йапшу амдараква рымщтахь утурых рыцIагьи цIолата йудырра утахъхитI», – лхIватI апхьагIвчва йрыуу Амычба Миранда.

«Атурых амадзаква» проект апкъ йтата асквш 2025 ауацIа ужвыгьи амдаракI адыргалуаштI, асабиква СогIвым йаъу Апсны акъральыгIва музей йыргуштI.