Адыгея Республика атеатр жвлара Цей И.С. йыхьыз зхъу АуагIахъа театр апны сынчIва культура гIатгарата йалуаш агIаншара гIадырбатI.
ЩынкIвба Баграт йроман «ЙтыцIхыз йрыуата йгIанхаз азаджвзаджвыкI» ащатала йдыргылыз аспектакль «Нышв напIыкI» алитература гIвыра ахъазыкI асцена йгьгIаквнамгатI – ауи адуней йыквчвгIаз ауагIахъа рхъмаштылра гIанарыцIсхтI.
АргылчIв пычIвта апрель а 23 адыгьа бызшвала, апрель а 24 урышв бызшвала йгIадырбатI. Зхабар хъара йгаз ароман Адыгея апны ари йапхъахауата атеатр йаквдыргIапстI, йаргьи агIвыра хвы азырбауата, швабыж цIолата йадынхалтI.
Аспектакль зыргылыз арежиссер Мишин Константин йгвы йтаз араса даквчважвитI:
«ХIара мурадта йгьхIымкIытI атурых хвы аквхIцIарныс, йзахву-йкъванчу хIырзыпшгIарныс. ХIара хIызщтаз датшан – апшыгIвчва рыуа дзачIвызлакIгьи уахьчIва йаъахым дшырпщылу ъайылайхIвуш хъмаштылра уатыкв гIанхIыршарныс. Ари аспектакль ауат задгьыл йтырцакваз ауагIа йрыцнарахвуаз анышв напIыкI йагIвызапI. ХIспектакль йгIайуаш дзачIвызлакIгьи йара йнышв напIыкI – ауи атурых ахъвыкI – йыцигахуаштI».
АгIахIвахра агвы далагылапI сквшышвкI нызцIхьу алыгажв Золак Зауыркъан – зышта йтыцIхыз аубыхква дрыуата йызхъаззаджвыкIта йгIанхахта йуагIахъа рхабар гIащаквызжьыз. Ауи йтдзы апхьахьа-бызшвадырыгIв КIвадзба Шварах дгIайитIта алыгажв йгIагвалашвахраква аницIитI. Ауат райчважвара йагIвсыз агIамти уахьчIвамши апызщылуа цхIахитI.
Зауыркъан йтурасыла дгIахъвмаритI Адыгея Республика ауагIа рартист Такахва Теучеж, КIвадзба Шварахи Заукыркъан данчкIвынызи Адыгея Республика апны гIатгара зму азъазара анхагIвы Ачмыз Рустам йгIайырбитI.
Ачмыз Рустам йлахIвараква хIыцагIвишитI:
«Сара, сфыр йапшта, псайспамцара ауи атурых саланахIвитI. ХIара хIпахь дчIвапI абызшва йцIыхъвахауа анкъвгагIвы, йагIвсыз агIамта йцIыхъвахауа ашахIат. Ауи йбжьы ашIасырквын дунейкI ыдзуаштI. Актер йыхъазла ауи рхъвыхра мчыпI».
Аспектакль йаквчважвауата йырхIвауа ажваква агвы йшгIатыцIуа, йшцIолу джьаущитI.
РСФСР апны гIатгара змаз культура анхагIвы, Адыгея Республики Краснодар шти рпны гIатгара зму азъазара анхагIвы Къвыл Амарби: «Ари ауи аъара ауыс йазъазата йдыргылын – хIтеатр йгIалхIвауа нхара шIыцкIла тшарбайатI. Щарда цIуата асцена апны запш угвы йнадзауата, йцIолата йсымбасыз йахьчIва сапшытI. Арежиссер йынхара ахъаз закI унардыруата гьакIвым йшаъу – ауи апшгIвы алахIвараква рнадзара шIыцкIдза дщтIнахитI».
Адыгея Республика ауагIа рартистка, Чачан Республика апны гIатгара зму азъазара анхагIвы Агыржанокъва Санйат:
«Ари аспектакль хIыбызшви хIгвбайари хIхъхIраштыл йшамуаш зымгIвагьи хIазнархъвыцитI. АргылчIв уанапшуа йгIаугвынгIвитI: абызшва учвыдзызтын – ухъата лкIгIара, ухъа учвыдзтI».
Адыгея Республика апны гIатгара зму артист, Къабард-Балкъар Республика апны гIатгара зму артист, Къарча-Черкес Республика апны гIатгара зму артист Апанасов Астемир:
«Ари аспектакль зымгIва йырзацапшу ашвага-загаквала йгьузалыргушым. Ауи аъарала абзазара йачIвыта, йцIабыргыта йырчпан – угвы рахIа йцIагIву атлахцква йырзынадзитI. Ауи уанапшра амщтахь ухъатала цIхъва змам закIы уадсылшва йубитI».
«Нышв напIыкI» «Федерация» фестиваль йцитI
Асквш 2025 сентябрь агIан Грозный апны йакIвшуш VI Россия ауагIахъа театрква рфестиваль «Федерация» Адыгея ари аспектакль йалагIадырбуштI. Афестиваль Россия шабгу ауацIала аъачIвагIагIвчва рсовет йгIалнахыз 12 спектаклькI аларцIатI.
«Нышв напIыкI» – агвтараква гIахъызтIуа спектакльпI. Ауи дуней абгаквакI майрата йшыдзуа йгьи укультура гIаухчарныс магIныта йаму уазнархъвыцитI. Ауи йгьахъазргылчIвым – ауи йаъахым йырбжьыпI.
Арежиссер Мишин Константин йшихIваз анахйа:
«Ауат ъадзахIхъмаштылуа – йгьымдздзастI».
Йаргьи ауи акIвзапI аспектакль уыс хъадата йархъйауа.
швталра йа тшаншвцIара атахъыпI.