Согъвым йазалху агIарбарта апны апсыуа башлыкъ ашIахIваща квпшыраква щардата йгIадырбатI.
Барганджиа Саид
АгIарбарта «Абашлыкъ: атурых, ацIас, ауыжвгIанчIви аъаща» ахаша декабрь а 26 атшын Согъвым апны йакIвшатI. Арат ахъашIахIвагаква шгIадрысабапуа гIадырбарныс ахъазла апсыуа скульпторква рынхараква гIарахвтI. Ауат атурых апны йбергьльу ауысхагIвчва, актёрква, ашвахIвагIвчва йырскульптуран. Апроект йацыркIтI йапхъахауа апсыуа сота компания «Аквафон», ауат рцхърагIарала абзазара йаларыжьтI.
Ари агIаншара асуратлента апшра >>
Апроект авторква йрыуу асуратхъыхыгIв Чкадуа Ибрагим асасчва абашлыкъ ашIахIваща 12 квпшыракI йнадзауата йдйырбатI. Ауи йгIаргвынйыргIвытI ашIахIваща ахъацIа дъацуш йа дыздгылуаш ауыс, ауат швхIаусыгIвата йрыму йрыквыргIапста, йынгIалуата йаъазара шатахъыз.
АгIарбарта арахьари автор, афонд «АтшадкIылра ацхIа» агIаныршагIвы Лабахуа Елена сквшы 20 райхIа цIитIтта апсыуа уагIахъа чгIвыча атурых лырхъвыхитI. Ажурналистква разцIгIараква джьауап рылтуата ауи йшылхIвазла, абашлыкъ йхъаду ачгIвыча хъвква йрыуазакIыпI.
«Ауи магIны ду амапI, уызуу ауагIахъа ъагIанарбауа йахъазымкIва, агIвычIвгIвыс йтурасы щаквнаргылитI. ХIара абашлыкъ уахьчIвалагьи магIны шаму йгьи йынкъвга йшауаш гIахIырбарныс хIтахъын», – лхIватI Елена.
Ауи йшылхIвазла, апроект азъазара гIвнархаракI аднакIылтI, апшыгIвчва ацIасквагьи атурыхгьи йрыханаргIвазатI.
Апроект авторква дрыуапI апсыуа суратгIвгIвы Джапуа Баталгьи. Ауи йшгIайхIвазла, ахъачва башлыкъ анахъарцIуз швхIаусыгIвата йрымаз, аъащата йызтагылаз гIарпхьадзун, ауи йаццауата дара рхIальшан алкIгIараквагьи алагIадырбун.
АгIарбарта апны йаъан датшагьи Чкадуа Ибрагим йхъихыз асуратква. Ауат «Аквафон» компания ансисквша йгIацIырщтауа акалендарква рпны йгIадрысабапуа асуратква йрыуан.
«Аквафон» ареклама хъвшара аунашвачпагIв Барцыц Астан йшихIвазла, апроект «нцIра ауыра амазлуштI», йшпакIву ухIварыквын ауи ареспублика абзазагIвчва зымгIвагьи, КIавкIаз анахьанат ауагIахъаквагьи йырзынархапI, ауагIахъа цIаскви акультури йырпщылапI.
АгIарбарта гIальаматра ду азырбатI Согъвым абзазагIвчвагьи асасчвагьи.
«Швабыж йсымаджьащахъван хIуагIахъа фаша амальла хIкультура тшахасыргIвазарныс. ЙызбитI уыжв азамангьи абашлыкъ абзазара йшалымцIуа – йаъапI ауи нкъвызгауа ахъачваква. Сара уахьчIва акIвпI йанызба жвыгIв квпшыракI йнадзауа абашлыкъ ашIахIващаква», – йхIватI агIарбарта асас Мыквба Тимур.
Абашлыкъ (апсыуа бызшвала - ахҭарԥа) КIавкIаз апны уагIахъа щарда рфаша ахъв хъадаква йрыуата йынкъвыргитI, ауат йрыуапI апсыуаквагьи абазаквагьи. Ауи уыжв азамангьи щардагIвы йыргвапхитI. КIавкIаз ауагIахъа цIасква рырхъвыхыгIвчва йгIалыркIгIитI абашлыкъ ашIахIваща квпшыраква щардата. АшIахIваща аквпшыра ангIалырхуа ахъачва йъацуш йа уыста йыздгылуаш йаквыргIапста йазхъвыцитI. Ауи йара агIвычIвгIвыс йгвапхараквагьи йхIальшангьи йыргIарбагапI.
швталра йа тшаншвцIара атахъыпI.