ХVII амузыка фестиваль «Герзмава Хибла швгIалрайгвитI…» Соткилава Зураб йхъмаштылра йазынархапI, ауи Москва аконсерватория азал ду апны йгIахъыртIытI.
Барганджиа Саид
XVII афестиваль «Герзмава Хибла швгIалрайгвитI…» апщаша мартI а 14 атшын Москва аконсерватория азал ду апны концерт балахIла йгIахъыртIытI.
Афестиваль йапхъахауа аконцерт аопера ашвахIвагIв ду, СССР ауагIа рартист, атеатр ду асолист, Герзмава Хибла йлынбжьагIвыз йгьи ахIба пшдзата йылзыъаз Соткилава Зураб йхъмаштылра йазынархан. Ауи асквш 2017 сентябрь мыз агIан йбзазара далцIтI.
«Сари ауи йтгIачви (Соткилава Зураб йтгIачва – аредакция ррытаразга) пхата хIащтаныкъвитI. Ауи сара дсхаквлагIвын, ауи йгIалцIла йсгвападзата афестиваль йапхъахауа аконцерт йыхьыз ахъсхIвалгIатI. ДабгаркIвазарквын уахьчIва хIара дхIылазлушын, афестивальгьи дгIалалуашын. Йпсы ъадзатаз ашвахIвара гьашIайымрыстI. Анчва квырмыш ду йзысчпитI ауи йапшу агIвычIвгIвыс джьащахъваква сынцIа йъалаз, йъалу», – араса лхIватI Хибла Герзмава аконцерт апхъала атшын «Россия-Культура» телеканал интервью рылтуата.
Аопера ашвахIвагIв лгвгIанагракви ллахIваракви хIыцагIвылшауата афестиваль магIныта йаму даквгIашIастI.
«Сара сыхъазла йахьчIва амш швабыж йтлапIапI, йшпакIву ухIварыквын аконсерватория азал ду хIыгIвнапI йгьи йакIвшауа афестиваль йжвыбыжьхитI. Афестиваль зынзаман Апсны апны йгIаншатI, ужвы адуней акъральква гIамнадауа йбзазитI. Сара ауи схъа аладупI йгьи йсмарамшыпI», – йгIалылкIгIатI ауи.
ЙалкIгIата Москва аконсерватория азал ду асцена апны акIвын асквш 1994 агIан Апсны йауу аопера ашвахIвагIв шIа Герзмава Хибла агвыргъьахъв гIатгара ду ъалызпшуаз. Ауи Чайковский Пётр Илья йпа йыхьызла йакIвшауа адуней анкъвакъвра далата аитальян композитор Россини йопера «Севиль ацирюльник» йгIалху Розина лария йгьи аурышв композитор Римский-Корсаков Николай йопера «АсхьырчIвачIва» йгIалху АсхьырчIвачIва лария лхIватI. Сквшы 24 зныбжьыз Герзмава анкъвакъвра апны лгIахъвмарра йджьащахъву гвыргъьахъв духатI йгьи анкъвакъвра акIвшауищтара йапхъахауата ажюри Гран-при гIандыршатI. Хибла лакIвымкIва лапхъалагьи лымщтахьгьи ауи апш согIа датша заджвгьи зынгьи йгьиквнадмыргатI. Ари артшхъвага ашвахIвагIв шIа лыршIыйара апны дщтIызхыз чIвырхъа хIагIата йалтI.
СынчIва Герзмава Хибла длыцта асцена дгIаквылтI йбергьльу Аргентина аопера ашвахIвагIв, атенор Хосе Кура, Светланов Евгений йыхьыз нкъвызгауа Россия акъральыгIва оркестр апультгьи ртшхъвара щардала йбергьльу аитальян маэстро Даниэле Каллегари дадзхъагылтI.
Йбергьльу арат амузыкантква афестиваль йгIалалырныс йгIазрайгваз лара Герзмава Хибла лакIвпI. Ауи лгвы йангIаташва цIыпх февраль мыз агIан Земпер йыхьыз нкъвызгауа Дрезден атеатр апны аопера «Отелло» далата дангIахъвмаруаз асхъан акIвпI. Ауи аопера длыцалан Хосе Кура, йдирижёрыз Даниэле Каллегари йакIвын. ЙалкIгIата ауи агIан акIвпI ауат ахыгIвгьи йанангIал Джузеппе Верди йопера «Отелло» йгIалху ариякви аргылчIвкви аконцерт апны йырхIварныс.
Азал ду анашылырта адзхъа уыла йгIацIашвун гвып дукI Герзмава Хибла лконцерт йапшырныс зтахъыта билет зквымшвахыз.
«Абилетква лахъвгIахъасрала йамцIырчIвазшва акIвпI йшызбауа. Схъапщыли сари йхIхвгIарныс хIгьахамдзахызтI араъа амалькI гIахIыдахIвпIхIва хIгвыгъитI. Йшыжвбауа апшта хIара йгьхIхъазым араса йыззнийыз», – лхIвитI Москва абзазагIв Татьяна.
Афестиваль апшыгIвчва йрылапI ашвахIвагIв лыршIыйара бзи йызбауа Москва апсыуа диаспора ауысхагIвчва гвыпкI: Москва апсыуа диаспора ахъада Агрба Беслан, Россия апны йазалху хъвдаквцIара нкъвызгауа Апсны ргIащтийыгIв Ахба Игорь йгьи уыста йызчпата афестиваль ахъазла Москва йгIапссгIаз Апсны акультура йгьи атурых-культура тынха агIахчара рминистр лтарагылагIв Кобахиа Батал.
«ХIара 17 сквша цIитIта Герзмава Хибла лыршIыйара гIатгара дуква хIрыквшахIатпI. Хибла Апсны йбергьльу амузыканткви ашвахIвагIвчва дукви зрайгвалауа дгIвычIвгIвыспI. ХIара Хиблагьи ауи лфестивальгьи Апсны апны хIрызпшитI октябрь мыз агIан, ауи асхъан шIыцрагьи чIащыгIварагьи ймачIымкIва йгIаншуштI, ужвы амадзаква зымгIва гIахъстIырныс гьстахъым», – йхIватI Кобахиа Батал.
Аконцерт даъан Апсны Республика аэкономика аминистерства апресс-секретарь Берзениа Георгийгьи. Ауи щарда цIитIта Герзмава Хибла лыршIыйара абзибагIвчва тшрылайпхьадзитI.
«Сара Москва уыс сымата саъапI, ауаса хI-Хибла лконцерт агIвсщтырныс сгвы гьамуытI, ауи йанакIвызлакIгьи хIхъа лыладупI. Афестиваль «Герзмава Хибла швгIалрайгвитI…» Апсны апны йхъаду амузыка гIаншараква йрыуапI, абаружвы ауи афестиваль йхIчвыхъару акъральква рпынгьи йакIвшитI. Герзмава Хибла лбзирала хIреспублика йызнымкIва йгIайхьатI адунейла йбергьльу амузыкант дуква щардагIвы йнадзауата. Апсны апны афестиваль йанакIвызлакIгьи ауагIа йырзымчхIахуата йазпшитI, сынчIвагьи йара ауи акIвпI ауыс зкву», – йхIватI Берзениа.
Амузыка фестиваль «Герзмава Хибла швгIалрайгвитI…» аопера ашвахIвагIв ду асквш 2001 агIан Апсны апны йгIанлыршатI. Асквш 2014 йгIашIарышвта ауи агIвынаква тшауацIырхтI – Москва аконсерватория азал ду апны, Станиславский К.С. йгьи Немирович-Данченко Вл.И. рыхьыз нкъвызгауа амузыка театр асцена, Вена Мюзикферайн ахьапщ зал, Карнеги-холл, Швейцария акъала Санкт-Мориц рпынгьи йакIвшатI.
Афестиваль акIвшауищтара ауи йалан адуней музыка аршIыйагIвчва дуква – Спиваков Владимир, Образцова Елена, Мацуев Денис, Абдразаков Ильдар, Дебора Браун, датшагьи щардагIвы. СквшкъомкI рурала тшйымпсахуата афестиваль акIвйыршун азъазарадырыгIв Бэлза Святослав. ЙалкIгIата афестиваль магIны ду азырбитI Апсны амузыка бзибагIвчва зымгIвагьи, йшпакIву ухIварыквын ансисквша Герзмава Хибла лпсадгьыл апны йылрайгвитI зымгIва йрагъьу амузыкантква йгьи йадылгалитI зымгIва йрагъьу амузыка программаква.
швталра йа тшаншвцIара атахъыпI.