Апрель а 4 йгIашIарышвта апрель а 8-дза Согъвым апны йакIвшитI йгIвбахауа адуней кинофестиваль SIFF-2019.
Барганджиа Саид
Апщаша апрель а 4 атшын гвыргъьахъвыла йгIахъыртIытI йгIвбахауа адуней кинофестиваль. Афестиваль SIFF-2019 (ангьльыз аббревиатурапI: Sukhum International Film Festival – аредакция ррытаразга) адызгалыз Апсны чкIвынргIа руысла акъральыгIва комитет ракIвпI, ауи апрель а 8-дза йакIвшуштI.
СынчIва анкъвакъвра адгалагIвчва адуней акъральквала йгIарщтийыз тшазынархара швъа 3000 раъара гIарайдзатI, ауат йрыуата зурала йайшысу фильм 30 гIалырхтI. АсогIа хъада аноминантква йрылашватI Испания, Франция, Германия, ГIвадахь Корея, Польша, Косово, Иран, Эстония, Тунис, Италия, Румыния, Греция, Китай, Къазахстан, Андорра, Трыквшта, Россия, Белоруссия йгьи Апсны йрыуу аршIыйагIвчва. Акинофестиваль а-Гран-при ахча согIатпI, ауи сом зыкь 200 йнадзитI.
Афестиваль афильмква хвы рыквызцIуш пIатIу нкъвызгауа адуней жюри ракIвпI. Ажюри йрылапI Россия арежиссёрква Федорченко Алексей йгьи Сифулаева Нигина, афестиваль SIFF 2018 апхъагылагIв Волкова Ирина, Голландия йауу акиноцIбацIбагIв Майк Нафс, апсыуа режиссёр Квирая Ада.
Ажюри аунашвачпагIв Федорченко Алексей афестиваль ангIахъыртIуаз дгIачважвуата йшгIаликIгIазла, зура айшысу афильмква дара рылкIгIараква рымапI, дшхъвыцуала, ари ажанр зурала йабгу акино ацкIыс рыцIа йалачпапI.
«Сандрайгвара асхъан зура айшысу афильмква знархару афестивальква йсгвапата срылалитI, йауа ухIварыквын абараъа датша зджьара йуымбуш джьащахъвара, шIыцра щарда гIаншитI. Ари ажанр афильмква ррежиссёрква щцлрата йщаквгылу ацIасква гIадыршIыцхитI. Ари акинофестиваль йгIадыргалыз афильмква хIыхъазла шIыцра ду шгIахъыртIуаш багъьата йазхъасцIитI», – йхIватI арежиссёр.
Афестиваль ангIахъыртIуаз апрезидент Хаджимба Рауль йгIарайгвара тшазынархара йгIапхьатI. Апсны апрезидент йазхъайцIитI «акинофестиваль ахъазла йгIалырхыз акинопроект гIальаматква йырквнагауа ахв гIвхъатакIла йшрыквырцIуш апшыгIвчвагьи акиноцIбацIбагIвчвагьи». Хаджимба Рауль йшгIаликIгIазла, акинофестиваль адунейла Апсны аимидж бзи арыбагъьитI, араъа талант зму апсыуа режиссёрква, асценаристква, акинооператор шIаква рылшараква гIадырбарныс амаль щарда рзыгIаншитI.
СынчIва анкъвакъвыгIвчва дрылашватI апсыуа режиссёр шIа Цурцумиа Джанико, ауи йфильм «Сасы» Лакрба Михаил йновелла йгIахъыхпI. Афестиваль гIахъитIытI йбергьльу апсыуа режиссёр Аблотиа Вячеслав. Ауи йшихIвазла, йхъа рыладухитI Апсны акинематограф джьгарта йгIащаквзыргылхуа апсыуа режиссёр шIаква.
Анкъвакъвра апны йгIадырбуш афильм 30 цхъвыкIта йшапI, хъвыкIипхьадза хвфильмкI аланакIитI. Афестиваль апны йазалхта йгIадырбуштI ашвъаква йгIархъыху Яровская Марьянна лфильм «Гулаг апхIвысква». Ари афильм сынчIва Оскар ашорт-лист йаншвалтI.
Акинофестиваль ангIахъыртIуаз анкъвакъвра программа йаланамкIуата йгIадырбатI зурала йабгу арежиссёр Пинхасов Артур йкомедия «Маргарити айщчвари», ауи агIвгIвы Тополь Эдуард йсценарийла йхъыхпI.
Акинофестиваль SIFF-2019 Искандер Ф.А. йыхьыз зхьзу акъральыгIва урышв драма театр апны апрель а 4 йгIашIарышвта апрель а 8-дза йакIвшуштI, акиносеансква ансимшы асахIат а 17.00 йгьи асахIат а 20.00 йгIадырбалуштI. АпшыгIвчва хвыдъа йнаржьылитI.
Согъвым апны афестиваль SIFF йгIванхауата йакIвшитI. Йапхъахауата Согъвым адуней кинофестиваль Апсны апны асквш 2018 апрель а 2 йгIашIарышвта апрель а 6-дза йакIвшатI. Ауи агIан анкъвакъвра йалан Апсны, Мараташварта Европа, Россия, СНГ,
Марокко, Тунис, ГIвадахь Корея, Иран, Узбекистан, Венгрия йрыуаз арежиссёрква рынхараква 32 йнадзауата.
швталра йа тшаншвцIара атахъыпI.