ТшгIазыршIыцыз Адуней апсуа-абаза конгресс Айкьангьашырта клуб «Апсуари абанпараква райчважвари» нархарала йгIвбахуз алачIвара акIвшатI АААК апресс-квта апны.
Шазина Бганба
Апсны апхьартаква рпны «Апсуара» арыпхьара гIаджвыквцIахра шатахъу йазынархаз Адуней апсуа-абаза конгресс Айкьангьашырта клуб алачIвара экспертта далан Апсны ауагIа рартист, амакъымршIыйагIв, адирижер, акомпозитор Чанба Нодар (Апсны ауагIа р-Абашта айсра агIан культурали арыпхьарали ареспублика даминистрын – аредакция ррытаразга).
Чанба Нодар йгIайхIватI акультури арыпхьари данырминистрыз апсуа апхьахьакви арыпхьагIвчви ргвыпгьи рыцта Апсны апхьартаква рпны «Апсуара» зладдырдыруаш ацхърагIага гIаныршарала уыс баргвы шдырхъйаз. Ауи йшихIвазла, йхъатачIв архив апны йгIанхатI сквш 30 райхIа цIуата йлырхыз, сахIатипхьадза йызпхьуш йалыргата йгIазхIвауа апрограмма. Ауаса Апсны апхьартаква рпны «Апсуара» апхьарасахIатква гьазалхым. Ауи йашвхIаусыгIвата Чанба Нодар йбауа «арыпхьара аргIапсра ащата тамамта йъащаквгылам» акIвпI.
«Абызшва зхIчвыдзуа, хIъадаб-намыс злащаквгылу апсуара зхIчвыдзуа ауыс тамамта хIъадымгылуа акIвпI. Апсуара тшауацIнарыхра йузацрымхуашта йызпщылу апсуа бызшва арыпхьара апрограмма апсуа апхьахьаква адынхалра атахъыпI. СынцIра апны сара абызшва тшауацIнарыхрала апрограммаква рунашва щарда сапхьатI йгьи йызгIатI. УахьчIва сара сгьчкIвынхым, ауаса абызшва ауыси апсуара шынкъвыргауи рыцIа-рыцIа йайчвахитI. Ауи арыпхьара аргIапсща штамамым йаквшахIатхитI. ХIара бызшва щарда здыруа ацIайква ймачIымкIва йхIымапI. Йапшым агIвыма бызшваква анырзырдыруазара рцри бызшвала йчважварныс, апсуа цIаскви ахабзакви нкъвыргарныс збаргвхауайа? Ауатква атгIачва апны йанырзырбжьуз агIамтаква агIвсын акIвпI ауаса йызцауа. Ужвы датша заманпI хIызтагылу, ауи тшацчпара атахъыпI. Йгьи, ажва аламкIва, «Апсуара» апхьага йалыргата йчпара атахъыпI», – йхIватI ауи.
Чанба Нодар дацIачIвагъватI ари ауыс «йахъыргIвзылгIата» йъалапшуа хIмурад хIазынадзарныс прагылата йхIзалитI. Апсуара апсуа уагIа ръадаб-намыс йащатазтIхIва, ауи агIвычIвгIвара шабгу рчпащакви рэтики йузакъвымхуашта йырпщылапI.
«Урышв бызшвала «абхазство» – анхIхIвауа «апсуара» амагIны мыгIвхъыгIгитI. Йауа ухIварыквын, араъа ауагIахъара йгьахъазым ауыс зкву. Апсуара агIвычIвгIвыс дузырдыруа, агIвычIвгIвыс гIвычIвгIвыста дызчпауа йшгвынгIвыру тшазыгIдырра атахъыпI», – дацIачIвагъвитI Чанба Нодар.
Айчважвара ъадзакIвшуз аъачIвагIагIв «Апсуара» апхьага хъвыта йызлалазлара атахъыта йбауа йхIватI, Айкьангьашырта клуб ари анархарала йынхауа агвып дырцхърагIарнысгьи йыргвыгъатI.
АААК Айкьангьашырта клуб анхара гьашIанарысуам. ЙащтагIайуа анйара датша ъачIвагIагIвчва гIадрайгвата адиаспора руыскви абаза уагIа рпсадгьылла йгIацарпахри йрылачважвуштI.
швталра йа тшаншвцIара атахъыпI.