Апсны Республика аэкология а-Институт аунашвачпагIв Дбар Роман АААК а-Дискуссия клуб дасасын. Араъа йгIащтIырхын йалачважватI атема «Аэкология йгьи апсабара агIахчара».
Барганджиа Саид
Февраль а 28 атшын АААК а-Дискуссия клуб йалаквуи Апсны Республика аэкология институт аунашвачпагIв Дбар Романи ранйара апны адуней аклимат апсахраква рпны Апсны гылартата йаму йалачважватI.
Анйара йалаз рпахь дгIачважвауата Дбар Роман йшгIаликIгIазла, адуней аклимат апсахраква руыс акъральква зымгIвагьи гвыргIва гIарыланацIитI. Ауи ауыс хъатазаджвыкIла угьзадгылуам. Адуней аклимат апсахраква гIазхъшахъыцIуа ашвхIаусыгIваква руысла уахьчIвала апхьахьаква рхъвыцща гьаквшвум.
«АшвхIаусыгIваква йрыуазакIыпI – агIвычIвгIвыс йынхара йгIахъшахъыцIта ахIауа атемпература зпсахуа агазква, ауат атмосфера йаназынадзара апхара йаладырхIитI. Атмосфера апхара йаналахIара амшынкви аокеанкви рпны адзы гIвазырчитI, ауи квата йгIаквахитI. Ауи йгIахъшахъыцIуата адуней акъральква рпны пхаста щарда гIанзыршауа адзырква гIатыгIвритI. Арат агIаншараква атмосфера апхара йшалахIауа йагIарбагапI. ЙгIахIрахузтын «атмосфера апсахраква» - хIва акIвпI тамамта йхIвара шатахъу, йшпакIву ухIварыквын адуней ашIыпIаквакI рпны атмосфера рыцIа йхьшвашвахитI», – йхIватI апхьахьа.
Ауи йшихIвазла, Апсны аклиматгьи тшапсахитI. Ауи апшта, йцIыхъвахауа асквшква рурала Апсны апны атемпература градус 1,8-ла йхъалтI. ЙцIыхъвахауа агIвысквша руацIа абагIдзараква рквтаней гIарбарагьи йалахIатI: ажва ахъазла, Согъвым апны сквшы 20 рапхъала ауи агIарбара миллиметр 1,500 надзун, уахьчIвала ауи агIарбара гIванла йалахIатI ухIва йауашта йаъапI.
Аклуб алачIвара шабгу АААК YouTube канал апны швапшы йауаштI>>
«АдзыгIвква рпны адзы тшщтIнахитI, атшпква цIнажгIитI, аинфраструктура арыхъвашитI. Ауи шабгу аэкономика швабыж йазарархитI. ХIара йыгIбитI аква щарда адгьылрхарджьра лдзгIара щарда шазгIаргуа. ХIыжвлара бзазара, хIымлыкврхIара, хIэкономика аклимат апсахраква йрыквхIыргIапсра атахъхитI, йшпакIву ухIварыквын апсабара гIаншарква хIызларпшIагылуаш амаль гьхIщардам», – йгIаргвынйыргIвытI аздзыргIвчва аэкология а-Институт аунашвачпагIв.
Аэкология знархару датша уыс баргвыта йгIаншаз амышвкъвара ъащардахаз акIвпI. Ужвы аткванква йыртиуа афачIвква рщарда зту атараква апластмасса, аполиэтилен, апластик йгIарылхпI, ауат шабгу мышвкъварапI.
«Ауат апкъыгIваква апсабара йылата сквшышвпхьадзара йызнайуаштI, йкъва-йсгIарыгьи ауат амшын йтанагитI, ауаъа дзыгIвбжьа дута тшазыркIкIитIта адзы ацIахь йыцIанагитI, ауаъа псы зхъата йту зымгIва йрызарархитI», – йхIватI Дбар Роман.
АААК а-Дискуссия клуб аунашвачпагIв Турава Ирина аэкология сессия йаланакIуата йакIвшаз ари анйара швабыж йджьащахъвата йылпхьадзатI. Анйара йалан «ареспублика аэкология аъаща йазрыму агвыцхIара йаднакIылыз пщабанпаракI йгIарыцIанакIуа ауагIа».
«Анйара гIвсахIаткI йакIвшатI, аэкология а-Институт аунашвачпагIв йгIачважвара абзирала йыгIдыртI адуней аклимат апсахраква рунашва, ауат йрыуата Апсны йазынарху аэкосистема абаргвыраква: апсабара йа агIвычIвгIвыс йынхара йгIархъшахъыцIуа. Анйара аэкологии апсабара агIахчари зъачIвагIу ауагIа йырхъазымкIва згвы цхIауа абзазагIвчви апхьагIвчви ъалаз апшырта йчпауата здырраква швабыж йцIолу Роман Саид йпа ауыс гвынгIвырата, йалыргата, швапха щарда гIайгуата даквчважватI», – лхIватI Турава.
Ауи гвы алттI уахьчIва аэкология ауысква асабиква гвыргIва шазрыму, ауыла ран-рабачва рпны йшшвапху.
«Анйара йалаз апхьагIвчва рыуа пхIвыспакI аэкология уысква джьгарта дрылапI, лангьи ларгьи ацыта йаъан араъа, ауи апхIвыспачкIвын лыгIвзачвагьи, лангьи, лабагьи аполиэтилен таракви апластики ргIарысабапра йалрайгIвджьхьатI. Анйара йалаз апхьагIвчва Гагра апхьарта йагIбахауа акласс йапхьитI, ауат Роман Саид йпа йынйарныс ахъазла уыста йырчпан рарыпхьагIвчвагьи рыцта Гагра йгIатыцIын йгIайтI», – лхIватI Турава Ирина.
Ауи йгIацылцIахтI АААК а-Дискуссия клуб анйараква рпны Апсны апхьартаква рапхьагIвчва апхъахьылагьи йшгIадрайгвалуш.
Гагра йтагылу йгIвбахауа аквтанай апхьарта географияла арыпхьагIв Гвынба Амина лапхьагIвчва а-Дискуссия клуб йшгIалалыз гIалрахатI.
«Аэкология ауысква сквшщарда йрыдынхалуа аъачIвагIагIвчва йанрыквчважвауа асабиква рыцIа бзита йрыларкIитI. Асабиква гIвсахIаткI руацIа йрымагIальаматта Дбар Роман йгIачважвара йаздзыргIвуан, азцIгIараква дыргылуан. Ауи йажвипхьадза шрыларкIыз кьангьаш гьазгIазгуам», – лхIватI арыпхьагIв.
Гагра район йаланакIуа Алахадзы кыт йауу апхьагIв «анйара дырра шIыц щарда шгIайнатыз, ауат адырраква нархара щардала йхъвыцща шырпсахыз гIаликIгIатI».
«Швабыж йсгвапхатI. ХIкъраль хIазсакъхара шатахъу, амышвкъвара кIапсара шатахъым, ауи апсабара швабыж йшазарархауа гIасгвынгIвытI», – йхIватI апхьагIв.
АААК а-Дискуссия клуб анхара ауралагьи йалалуа, ААУ апны йапхьауа апхIвыспачкIвын Агрба Аэлита тIакIв рыцIа йахIбу абанпара дрыуапI.
«Роман Саид йпа Апсны ахъазла йхъаду аэкология уысква гIахъитIын йара йхъвыцща гIахIйырбатI. Ауат ауысква йырчвыхъару чкIвынргIа абари йапшу анйараква рымщтахь йыхIчпауа, хIансимш бзазара апны йгIахIрысабапуа апкъыгIваква йрызхъвыцуа йалагитI. Абараса псейспамцара апсабара зарар азгIазгуа апкъыгIваква хIансимш бзазара йхIзалхуаштI», – лхIватI Аэлита.
АААК а-Дискуссия клуб аэкология сессия – а-Клуб апны йызлачважварныс йгIащтIырхыз атемаква йрапхъахитI. ЙащтагIайуаш рапшта ауи анхара алачIвара абаркIырала йалата мызпхьадзара йымгIвайсуаштI.
АААК а-Дискуссия клуб анхара йанархара хъадата аэкология йахъазымкIва рыцIа пасата йгIалырхтI апсуа бызшва гIащаквыжьри тшауацIнарыхри, цри бызшвала алитература ауагIа йшрылалуаш ацхърагIара, апсуа-абаза уагIахъа ртурых-культура тынха хчара, абашта наука тшауацIнарыхра, Апсуара ацIасква хчара. Ауат анархараквала айчважвараква аклуб апны мызкIы ауацIа гIван апщашаквала йакIвшитI.
швталра йа тшаншвцIара атахъыпI.