АААК Ан-абачва рклуб сабап ду гIалцIуата йгIвбахауа анйара акIвнаршатI. Араъа анчва, абачва айъазагIв-педиатр Кварчиа Астанда йлынйатI.
Барганджиа Саид
Адуней апсуа-абаза конгресс Ан-абачва рклуб апны Москва йтагылу асабиква рзгIвадара анаука медицина рхъвыхра квта апедиатрия хъвшара апедиатр хъада Кварчиа Астанда йлынйатI.
Ари анйара гIвсахIаткI аъара йакIвшатI. Ауи азаман ауацIа анйара йалакваз, ащардагIв анын, асабиква рзгIвадара йазынархата азцIгIара щарда дыргылтI. Ауат рызбжа рыцIа йрызгIашыкъта быжь дула йрылачважватI. АйъазагIв-педиатр азцIгIараква зымгIвагьи йауацIыхта джьауап рылттI.
Кварчиа Астанда мчбжьыкIла лцришта Апсны дгIайтI. АйъазагIв шIа швабыж уыс лщардапI, ауаса тшахалырдзан Ан-абачва рклуб апны дсасытI. УахьчIвала ауи айъазара йахъазымкIва наука нхарагьи акIвлыршитI. АйъазагIв йшылхIвазла, Апсны дгIацапахта араъа лъачIвагIала дынхарныс лгвыгъапI.
АйъазагIв-педиатр Кварчиа Астанда лачважвара абгата араъа швапшы >>
Ауи Ан-абачва рклуб абзазара апны щарда цIуата швабыж йатахъдзу уыс бзита йшгIархъвыцыз гIалылкIгIатI.
«Ащарда ан-абачва рунагIва апны дара-дара асаби ддырбзихарныс йащтапI (датшата йухIвушызтын ауат швхIаусыгIва щарда йгIархъшахъыцIныс ауаш азгIва агIарбараква дрыдзырныс ргвыгъата – аредакция ррытаразга). Аклуб абзирала ан-абачва рыцIа йхъаду аддырраква рауашатI, ажва ахъазла, айъазагIв тшизынауырхара анатахъу, ауыс цIолата йхъатакIра анатахъу, асаби шыра йылазтын ауи ъазагIвата йыдгал йауаш. Ауатква удырырквын аунагIва апны гвыргIва ду гIауылазымцIауа азгIва рбзиха ауаштI. Ан-абачва рклуб анчва, абачва рбзира алата йспхьадзитI, йалкIгIата чIыдата йгвжвайлауа, гвыргIва гIазлашвалауа анчва шIаква», – лхIватI Кварчиа.
Анйара далан Апсны апны ООН ЮНИСЕФ Асаби фонд ауысхагIв Аргвын Нала. Афонд хнархаракIла йынхитI: арыпхьара, згIвадарахчара йгьи ажвлара цхърагIараква ртшауацIыхра. Ауи апроектква зымгIвагьи асабикви ан-абачви руысква йырзынархапI.
«ХIара йгIахIгвынгIвитI ан, аба руыс амагIны шдуу. Арат йрапшу анйараква йшгIадырбауала, ан-абачва йрылшитI аъачIвагIагIв йайкьангьашра йахъазымкIва дара-дара абабаларныс, йырзацапшу ауыс баргвква гIащтIырхта йрылачважварныс», – лхIватI Аргвын Нала.
Апсны апны йаныргIалу ООН ЮНИСЕФ Асаби фонд ауысхагIв Аргвын Нала лачважвара абгата араъа швапшы >>
Аклуб алачIвара далан щарда мцIуата йабахаз ачкIвын, Адуней апсуа-абаза конгресс архъйагIв секретарь Гицба Инар. Ауыгьи асабиква ргIадзныргылра ауысла йгвгIанаграква гIайхIватI, ауи йахъазымкIва АААК аклуб зхъа йадынхалырныс, здырраква ауацIызхырныс зтахъу ан-абачва рыхъазла йшгIаныршу гIаликIгIатI.
ГIвысабичва гIадзынзыргылуа ан Айба Саманта йшылпхьадзауала, уыжв азаман, йалкIгIата интернет апны, йаквымшвауа адырраква йъарынйалауа ашвхIаусыагIвала ан-абачва щардала йгIващитI, ауи ахIатырла аъачIвагIагIвчва рынйараква швабыж магIны рымапI.
«Азаман апхъала йымгIвайситI, айъазара тшауацIнахитI, асаби психология тшауацIнахитI. ХIкъраль ахъахвитра къральыгIва щарда ъадымгылс йгIалцIла шIыцра щарда кIьасата йхIзыгIадзитI. Ауи ауысла ан-абачва интернет йгIатырхуа адырраквала акъраль нхартаква йанрапхъанысуа гIаншитI. ЙгIаншитI ауат адырраква анхъылапсу, йанаквымшвауа. АзджьакI ауи ашвхIаусыгIвала йырчпара рымдыруа йгIанхитI. Дара айъазагIвчва йырхIвауагьи гьаквшвалум. Аклуб ауи ауысла ан-абачва йырцхърагIарныс алшитI – уыжвгIанчIви заман йщардахаз адырраква шырзалыргуш апшта, дара-дара алачIвата йайкьангьашырнысгьи амаль гIарнатитI», – лхIватI Айба Саманта.
ГIвысабичва гIадзынзыргылуа датшагьи пхIвыскI, Апсны апрезидент йпротокол АунашвахъцIарта аунашвачпагIв Возба Хибла йакIвшаз анйара хвду аквылцIатI йгьи йгIалылкIгIатI магIны ду шаму ан-абачва асаби данчмазагIвхара йахъазымкIва йанакIвызлакIгьи тынчта айъазагIвчва йрайкьангьашларныс, йщаквкIыта разцIгIараква рджьауап йазыпшгIарныс.
«Аклуб амаль гIаннаршитI йазалхта аъачIвагIагIвчва урайкьангьашырныс, йауа ухIварыквын айъазарта йыгIвнамкIва ауат анубауа мачIпI, йчIвагIгIауа асаби чымазагIв дунапIыцIатагьи ауыс йшатахъу апш йгьузыбум», – лхIватI ауи.
Ан-абачва рклуб аунашвачпагIв Квициниа Кама йшгIалхIвазла, аклуб апны йгIаджвыквылгIвацата йакIвшаз анйараква йгIадырбатI айззара шIыц дрыхIазырпхьадза адгалагIвчва руыс рыцIа-рыцIа йшгIардахIвуа.
«ХIара хIыхъазла магIны аман йапхъахуз арат анйараква акIвхIыршата йтамаму джьыпхакI хIтагылырныс – хIаргьи ан-абачвагьи йхIгвапхауата. АуагIа разаъащала хIразыпI. ЙащтагIайуа асквш [2020] аклуб анхара рахIагьи уагIа щардагIв алазлуштI. Ауи ауысла щарда хIзыгIаргIвитI, телефон йхIызгIаситI. ХIтыпгьи ауацIыхIхырныс хIазхъвыцитI», – лхIватI Квициниа Кама.
АААК а-Дискуссия клуб йагIвсыз асквш агIвымызкI руацIа нхарата йакIвнаршаз даквчважвауата ауи аунашвачпагIв Турава Ирина апроект дахIврала йшджвыквлыз гIалылкIгIатI. Ноябрь ацIыхъва зынхара джвыквызцIагIвацаз Ан-абачва рклубгьи, ауи дшхъвыцуала, ахъа бзидздзапI.
«ЙакIвшаз анйараква йгIарыквухырквын ауыс уагIа щардагIв йрымагIальаматпI, йшпакIву ухIварыквын ауагIа хъызхуа ауысквала клуб щарда аъапI, ауаса зымгIва рацкIыс йщарду ан-абачва ракIвпI, датшата йухIвушызтын ари аклуб акIвпI Апсны апны рахIа йщарду ауагIа адызкIылуа. Араъа хIызлачвауа ауысква йанакIвызлакIгьи магIны рымазлуштI», – лхIватI Турава Ирина лажва далгауата.
Адуней апсуа-абаза конгресс йаланакIуа а-Дискуссия клуб йазалху проектта йгIаннаршатI Ан-абачва рклуб. Ауи анхара ноябрь а 30 атшын йджвыквылтI. Ан-абачва рклуб алалырныс рылшитI анчва, абачва зымгIвагьи. АдгалагIвчва йшырпхьадзауала, ауи ауысла йхъаду «азыгIальаматри, атахъыри» ракIвпI.
швталра йа тшаншвцIара атахъыпI.