Ханты-Мансийск апны йакIвшатI атачIв уагIахъа бызшваква руысла адуней айззара, араъа йалачважватI апхъахьыла абаза бызшва атшауацIнарыхра аъащата йызтагылу.

Барганджиа Саид

Россия акъала Ханты-Мансийск апны атачIв уагIахъаква рдуней мшы апкъ йтата мартI а 21 йгьи мартI а 22 рагIан айззара акIвшатI, араъа абаза бызшвагьи рылата ауагIахъа бызшваква баргвырата йзынйауа йгьи апхъахьыла ртшауацIыхра ауыс зкву ауатыкв йтата йрылачважватI.

Афорум адыргалтI Россия ауагIахъа уысквала акъральыгIва агентства (ФАДН). Ауи аунашвачпагIв Баринов Игорь йшихIвазла, атачIв бызшваква шварагIварарата йзынйауа адуней акъральква ргватра азынадырхарныс рмурадта ООН агенерал ассамблея асквш 2019 атачIв уагIахъаква рдуней сквшы ахьырцIатI.

Абаза бызшва ауысла афорум апны йауацIыхта дгIачважватI Абаза-апсуа уагIахъа ртшауацIыхра ацхърагIара знархару адуней адкIылара «Алашара» авице-президент, Адуней апсуа-абаза конгресс ЙхIаракIу асовет йалу Мыхц Рамазан. Ауи АААК ахабарргарта портал йшгIарайхIвызла, йгIачважвара апны йгIаликIгIатI абаза бызшва агIахчари атшауацIнарыхри руысла «Алашара» адкIылара магIны йгьи хъвдаквыщта змата йнарахвыз амальква.

«Сара цри бызшва зымдыруа абазаква рыхъазла хвыдаъа абаза бызшвала арыпхьараква шакIвхIыршауа срылачважватI, араъа цри бызшва зымдырдзауагьи мачIта йыздыруагьи шахIрыпхьауа, абаза бызшвала амультфильмква шатахIкIыз, асмартфонква рыхъазла йазалху апрограммаква шадыгIгалыз, апхьартаква рпны абаза бызшвала апхьарасахIатква рпхьадзара йшаладырхIушла ауыс хIшацхърагIаз», – йхIвитI Рамазан.

«Алашара» авице-президент йгIачважвара ахъвыкI абаза абызшва адзри агIахчари руысла аэкспертква рырхъвыхра гIарбараква йырзынайырхатI. ЙгIайгыз апхьадзараква йшгIадырбауала, Черкесск апхьартаква рпны йапхьауа саби 1500-гIв йрыуата процент 40 ракIвпI цри бызшва здыруа, арахьарат урышв бызшвапI йызлачважвауа.

«Алашара» афорум апны анхара агIарбараква гIайрахауата ауи йгIаликIгIатI апхъахьыла ацынхара ауысла атачIв уагIахъаква руысла ООН йапымшвтуа ауысхарта аунашвачпагIв йтарагылагIв Чжан Сяоань дшйынгIалыз.

«ХIара хIыхъазла ауи магIны ду амапI, хIгIальаматрагьи алапI. ХIацынхара штшауацIнахуашла хIгвыгъитI», – йхIватI Мыхц Рамазан.

Ауи йшихIвазла, афорум апны датшагьи йрылачважватI йапшым адуней къральква – Россия, Китай, Камерун, агьиква – рпны атачIв уагIахъа бызшваква ргIахчари ртшауацIнарыхри ауысла уызшIпшы йауаш нхарата йакIвшауа.

«Ахантква (Мараташварта Сбыр алагъьла йбзазауа зпхьадзара мачIу атачIв уагIахъа – аредакция ррытаразга) йгьи амансква (зпхьадзара мачIу Ханты-Мансийск автоном округ атачIв уагIахъа – аредакция ррытаразга), датшагьи зпхьадзара мачIу алагъь уагIахъаква рунашва гIадрахауата щарда рхIватI», – йгIацицIахтI ауи.

Афорум ъадзакIвшуз арыпхьара аджыпха йтагылата зпхьадзара мачIу атачIв уагIахъаква рыбызшваква, ауагIахъаква адызкIылуа аурышв бызшва цхърагIара драйдзара ауысла йагъьу апроектква йрылачважватI, гватра азынархан ауагIахъа бызшваква ргIахчари ртшауацIнарыхри руысла анаука амагIны шдуу.

Афорум ауатыкв апны хъадата йакIвшатI ауи йалаз зымгIвагьи рацалачIвара «Йара дунейкI – бжьы зыкь». Ауи анхара йалан адуней акъральква – Россия, Латин Америка йгьи Кариб шIыпIа къральква, Непал, Финляндия, Китай, датшагьи – акъральква йгIартыцIта йгIадгылыз уагIа 500-гIв раъара – апхьахьаква, ажвлара уысхагIвчва йгьи арыпхьагIвчва.