Санкт-Петербург апны йаъу ауагIахъа адкIылараква ртурых йгIаквчважвауа, апсуа-абаза уагIахъа рхабаргьи зыншвалыз азкIкIра гIацIнащттI Петербург АуагIахъаква ртдзы.
Барганджиа Саид
Санкт-Петербург АуагIахъаква ртдзы «Санкт-Петербург ауагIахъа-культура адкIылараква, ахаквлагIвчва ргвыпква йгьи акъазакъ жвлараква» ахьызта азкIкIра арыхIазырын йгIацIнащттI. Ауи агIацIщтра АуагIахъаква ртдзы 15 сквша ъахъыцIуа йаквдыршватI. АзкIкIра йаншвалтI апсуа-абаза уагIахъа рхабаргьи.
Санкт-Петербург АуагIахъаква ртдзы ауагIахъа азазаъащаквала ахъвшара аъачIвагIагIв хъада Ачкасов Алексей ауи апаш азкIкIра дрыхIазырныс щарда цIуата ргвы йштаз, ауаса заман ауыра ауи агвтара шырзымырхъйуз гIахIайхIвтI.
«Анхара сквшыкI аъара йакIвшатI. Ауи агIамта ауацIа хIгватшныта, хIсакъуа хабар азхIкIкIуан, йхIрытамамуан, аъачIвагIагIвчва йдхIырбунта хIрайкьангьашуан. АзкIкIра Санкт-Петербург апны йаъу ауагIахъа-культура адкIылараква рунашвачпагIвчва йгIахIыртуаз аинформация ащатала йхIрыхIазыруан. ТшыззынахIырхаз йхIзыгIарщтийыз ахабарква азхIкIкIуанта уацIыхъван агIвыра йалахIцIуш гIалххуан», – агIацIщтра йшадынхалуаз даквчважватI Ачкасов Алексей.
Ауи йшихIвазла, азкIкIра Петербург апны ахаквлагIвчва радкIылараква шгIаншуз атурых, ауат уахьчIва йшбзазауа гIанарбитI. Акнига асуратквагьи архив швъаквагьи алапI.
«АзкIкIра России анахьанат акъралькви рпны йбзазауа уагIахъа 60 райхIа, ауат йрыуу агIвычIвгIвыс кIьыдаква рхабар аныпI. ХIыкъала апны ауат ркультура ауагIахъа-культура автономиякви ахаквлагIвчва ргвыпкви йгIадырбитI», – йхIватI ауи.
Санкт-Петербург апны йгIаныршу АААК ашта хъвшара асовет аунашвачпагIв Реквава Темур йшгIахIайхIвызла, азкIкIра адгалра АААК агвып ркъаругьи аларцIатI: йагIвсыз асквш шабгаз, аэпидемия аъащаква шбаргвызгьи, ауат азкIкIра йадынхалквуз апсуакви абазакви рхабарква рызгIарауан.
«ХIара швабыж хIайгвыргъьитI азкIкIра араса йъабзихаз, уагIахъа щарда ъату Санкт-Петербург акультура ахъазла ауи магIын дудздза амапI», – йхIватI Реквава.
Ауи йгIаликIгIатI АААК ашта хъвшари Санкт-Петербург АуагIахъаква ртдзи ауи апхъалагьи йшацынхуз, апхъахьыла йацырчпуш уысгьи йлыххьата йшрыму.
«ХIара хIкультура ауагIа йшрымагIальаматхуш, зигIва-зигIвата йалу Санкт-Петербург аэтнокультура шгIащаквхуш, ауагIахъа-культура адкIылараква ращтаныкъвари рацынхари шщаквгылуаш йгьи йшбагъьахуш йырзынарху проект щарда хIымапI. ЦIаста йалтI КIавкIаз ауагIахъаква ркультура афестиваль, «ХIара хIацыпI» гала-концерт, ауагIахъаква ргIахIвра ахъвлапын. ХIара ауат зымгIва хIрылазларныс хIтахъыпI, ауи тшазхIрыхIазыритI», – йхIватI ашта хъвшара асовет аунашвачпагIв.
«Санкт-Петербург ауагIахъа-культура адкIылараква, ахаквлагIвчва ргвыпква йгьи акъазакъ жвлараква» азкIкIра йапхъахауата йгIацIцIтI. Ауи атираж экземпляр 300 йнадзитI. Санкт-Петербург АуагIахъаква ртдзы ауи акъала апны йгIаныршу ауагIахъа адкIылараква зымгIва согIата йырнаттI, йгIанхаз аэкземплярква АуагIахъаква ртдзы абиблиотека апны йщтIазлуштI.
«Санкт-Петербург АуагIахъаква ртдзы» – асквш 2005 агIан Санкт-Петербург аунашвахъцIарта ащаквыргылрала йгIандыршаз къральыгIва нхартапI. АуагIахъаква ртдзы йахачIв хъадата йапхьадзитI «авласть ауысхартакви ауагIахъа-культура адкIыларакви апызщылуа цхIата» йалырныс.
швталра йа тшаншвцIара атахъыпI.