Адуней
апсуа-абаза
конгресс

Адуней апсыуата, абазата йыкву адхIкIылитI

Rus Eng Tur Abk

Abq

Ara

07.02.2020 11:20

Апсны ачIвылацIахь: адуней шабгу йырдыруа Афон ШIыц ахIатшпы атурых

Афон ШIыц ахIатшпы асквш 1961-дза «цIгIва змам машан» – араса акIвын йшапхьуз ауи ауагIа. Ауи «амаша» ауагIа йгьи йарыхIун йгьи йхънахуан. Ауи амадза заджвгьи йгьизымдыруазтI – адырраква йрыздзышуаз чкIвынкI ахIатшпы гIайпшыхвырныс гвы йчпандзкIьа. Ауи йыхьзын Смыр Гиви, 16 сквша ракIвынгьи дызтаз. УацIыхъван ауи дсуратчпагIвхуштIта йгIачважваракI апны дхвыцищтара «псабарала дшчмазагIвыз» тшихIвахуаштI. Асквш 1961 агIан Смыр аркъан найахвын заджвгьи дызтамылсыз ахIатшпы йапхъахауата метр 40-ла дылбгIатI.

Йара ауи асквш 1961 агIан Афон ШIыц ахIатшпы гIарпшыхвырныс йадыргалыз йапхъахуз аэкспедиция агIыгIвспелеологчва алан. Ауат 18 сахIаткI йынхатI. Ауат рымщтахь ахIатшпы датшагьи апшыхвыгIвчва талуа йалагатI. Апхьахьаква рпахь тшгIахъызтIуаз ачIвылацIахь адуней байа-пшдза дырхъвыхырныс ахIатшпы ауацIа алагерква дыргылуан.

Жвыхвсквша йнайгвгъауатагьи йагIвсхын асквш 1974 агIан акIвпI Афон ШIыц апны Ивер бхъвы йацIачпу ауи ахIатшпы ауагIа апшырныс йтал йауата йанырчпа. Ауищтара ахIатшпы уагIа зкьышвыгIвпхьадзара талхьатI.

АгIамдагIвчва ахIатшпы ауацIа йазалху «атурист» гъба йтанагитI. ЙнапIылачпару акIынхIара дула ауи атуристква йапхъахауата асквш 1975 агIан йынкъвнагатI. Электрокъарула йынхауа апоезд «Турист» апш датша зджьарагьи угьанйушым. Ауи апроект рачвагIацIхрала СССР акъральыгIва проект институт «Гипроуглемаш» апны йлырхын Рига авагончпарта завод апны йырчпатI. Афон ШIыц аметрополитен ласы СССР апынгьи Апсны апынгьи йапхъахуз метрополитен ласыта йалтI. Ауи хгIашIасыртакI амапI, аура километркIи метр 300-и йнадзитI.

Асквш 2014 агIан йара ауи Рига азавод апны Афон ШIыц ахIатшпы ахъаз поезд шIыц рчпатI. Ауи шварагIварадали эргономикали ауыжвгIанчIви хабзаква зымгIвалагьи йрыквыргIапспI. МгIва тшвала йсагIу акIынхIара йкIылсуа апоезд аганлагьи ауралагьи йгIацIырщтквауа йгьрацъарам. Ауыгьи закIзаджвыкIта йырчпан апш адуней йгьыквым.

Афон ШIыц ахIатшпы сквшыкI ауацIа квтанайта турист зыкь 300-гIв талитI. Асурат апны: Афон ШIыц ахIатшпы ауацIа рахIа йпшдзата йырпхьадзауа «Апсны» пещ.

Афон ШIыц ахIатшпы жвбата йалапI, ауат ахъвшараква пещ-хIва йрыпхьитI. Атуристква зтарыжьуа ацба ракIвпI: «АмхIаджьырква рпещ», «Анакопия», «Нартаа», «Апхьарца», «Апсны» и «Аюхаа». Асурат апны «Аюхаа» пещ.

АхIатшпы ауацIа рахIа йдуу «АмхIаджьырква рпещ». Ауи аура метр 260, ахIагIара метр 50, аган метр 75 йнадзитI.

Асурат апны: «Апхьарца» пещ. Ауи концерт пещ-хIвагьи йапхьитI, йауа ухIварыквын, араъа зынзамыза Апсны акъральыгIва капелла злу аклассика макъымква рконцертква адыргалитI.

АхIатшпы ахпещкI рпны наука рхъвыхрагIвацапI йакIвшауа. Ауат «Аспелеологква рпещ», ахIатшпы гIахъызтIыз Смыр Гиви йыхьыз зхъу апещ йгьи «Гелиоктит хIатшпы» ракIвпI. Асурат апны: «АмхIаджьырква рпещ».

«Агвалква ргIвыга»-хIва йызпхьауа ахIатшпы ацIгIва амшын ъану ацкIыс метр 36-ла йщтIыхта йаъапI, ауи акв ашвпIара метр 200 йнадзитI. Асурат апны: «Анакопия» пещ.

АхIатшпы апны 100 айхIа квпшырата йызму кристалл гIаныршара зкьышвпхьадзара урынйитI, ауат рчпащалагьи рчвалагьи зигIва щардата йаъапI.

АхIатшпы ауацIа ахIауа апхара 14 градускI йнадзитI, адзы – 10-11 градускI, ахIауа абагIдзара процент 100 йнаднацалитI. Асурат апны «Нартаа» пещ.

77803

Сквшы 60 рапхъала, асквш 1961 агIан, апсуа суратчпагIв йгьи аскульптор Смыр Гиви Апсны ачIвылацIахь амадзакI гIайдырын запш аъам апсабара гIаншара – Афон ШIыц ахIатшпы – адуней шабгу йырзыгIахъитIтI.