Согъвым йтагылу Апсны акъральыгIва музей апны апсыуа хъвмаргакви абаза хъвмаргакви ргIарбарта гIахъыртIытI.
Барганджиа Саид
АуагIа хъвмаргаква рэкспозияция Апсны акъральыгIва музей апны ахаша май а 8 йгIашIарышвта йынхауа йалагатI.
Апсыуа уагIа хъвмаргакви абаза уагIа хъвмаргакви ртурых 18 сквша цIуата дадынхалитI акъральыгIва музей апны АпхъанчIви турыхи Аквтасквшышвкви рхъвшара аунашвачпагIв, азкIкIгIвы Ахба Диана. Ауи сквшкъомкI рурала йакIвлыршауа анхара абзирала ауагIа рхъвмаргаква ррыхIазырра йазынархата магIны ду зму адырраква гIащаквхатI. Лара Ахба Диана лакIвпI агIарбарта адызгалызгьи.
«ХIансабийыз хIара афабрикаква рпны йгIацIырщтуаз ахъвмаргаквала хIхъвмаруан, йалкIгIата, акIьанджьквала. Ауаса зынзамыза сангьи сандугьи йсдырбун кIьанджьы дара-дара йшырчпуз. Апхъала йзлахъвмаруаз ауат акIьанджьква швабыж йшсгвапхуз здырхитI. Ауи акIвхуштI апхъала йаъаз акIьанджьква азскIкIыта ргIарбарта адызгалырныс гвы зсчпаз», – лхIватI Ахба Диана.
АзкIкIгIвы асквш 2001 агIан акIвпI даналага адырраква адылкIылуа, дара акIьанджьква азылкIкIуа. Апхъапхъа ауат 25 йнадзун.
«ГIамта щардачва шхIчвагIвсыз сыласхIватI, апсыуа уагIа ахъвмаргаква шырчпуз пIатла амамкIва хIалагата йхIмырхъвыхуазтын уадыргIвана магIны зму ауат адырраква шхIмаухуаш гIасгвынгIвытI. Ауи амщтахь хIанчва, хIабачва, хIандучва, хIабадучва злахъвмаруаз ахъвмаргакви акIьанджькви азскIкIуа салагатI», – лхIватI ауи.
Лырхъвыхра нхара ъадзакIвлыршуз Диана сквшы 70 йгIашIарышвта сквшы 96-дза зныбжьыз уагIа щардагIв дрынйатI, ауат йрыуата щардагIвы уахьчIвала йгьабгахым. Апсны йапшым арайонква рпны йлызгIаутI акIьанджьква шаъаз, ауат шырчпуз бзита йыздырхуаз агIвычIвгIвыс ъазаква. АзкIкIгIвы лахIварала абзазагIвчва йыргвападзата акIьанджьква апхъала йшаъадзаз апшта шIыц-шIыц йылзырдзахуан.
Ари агIаншара асуратлента апшра>>
Ауыс дадынхалуищтара Ахба Диана ахIвсси ачкIвынчви йырзалхыз ауагIа хъвмаргаква рырхъвыхри ргIащаквыргылхри йырзынархата проект щарда адылгалтI.
Ахба Диана йазылкIкIыз апсыуа уагIа хъвмаргаква Санкт-Петербург амузей апынгьи йгIадырбатI. Ауи агIарбарта асквш 2007 агIан Апсны Республика а-Министрква р-Кабинет йгьи Апсны акъральыгIва музей рцхърагIарала йакIвшатI.
Датша проекткI йацыркIтI Апсны атшуацIнарыхра знархару ажвлара фонд «Амшра». Ауи йазынархата аъачIвагIагIвчва ъазаква асабиква уагIахъа хъвмарга шырчпауа йазырбжьун. Апроект «Абаза уагIа хъвмаргакви апсыуа уагIа хъвмаргакви рырхъвыхра, ррыхIаззыра» адылгалуата Ахба Диана «Алашара» адкIыларагьи дрыцынхатI.
«Абаза уагIа хъвмарга джьащахъвагьи гIахIрыбергьыльхтI, ауат рырхъвыхра йазынархата гIвыра кIьыда гIаквсцIатI, ауи амщтахь асквш 2017 агIан Согъвым апны йадыгIгалтI агIарбарта «Абаза йгьи апсыуа уагIа хъвмаргаква», – йгIалгвалашвахитI Ахба Диана.
УахьчIвала Диана архъвыхра нхараква акIвлыршаркIвитI, Апсны арайонква дгIарыкIвшитI, зынзаман йанчкIвыныз знапIквала хъвмарга зчпуз агIвычIвгIвыс ъазаква драбадыритI йгьи дрыцынхитI.
«Согъвым апны йгIау йауаштI арат ахъвмарга джьащахъваква йырзалхта тдзыкI, йъаныргIал йауаш пещкI. Ауи ауысла акъала амэр (асквш 2015 йгIашIарышвта акъала хъада аунашвахъцIарта йаунашвачпагIву Харазиа Адгур – аредакция ррытаразга) сйачважвахьатI, ауи ауыс йымаджьащахъвахатI, дазхъвыцырныс сйыргвыгъатI. Сшхъвыцуала, агIарбарта гIальаматра ду азрымазлуштI Апсны абзазагIвчвагьи ареспублика асасчвагьи, йауа ухIварыквын ахъвмаргаква ртурых ауагIа ркультура йахъвыпI, сквшышвпхьадзара апсыуаква йгIадзынгылуаз абанпараква ауагIахъа хъвмаргаква рчпара ацIасква йырзырбжьауамцара йгIамгIвайстI», – йгIалылкIгIитI Диана.
ЦIабыргыта, йгIахъыртIыз агIарбарта гIальамтра ду рызрымапI Согъвым абзазагIвчвагьи асасчвагьи. АгIарбарта апшгIвы Ирина йшылпхьадзауала, ари апш адугалра ахъазла сквшщарда уынхара атахъын, йауа ухIварыквын «ужвы апхъанчIви апсыуа йгьи абаза хъвмаргаква йызрыквчважвушта йгIанхаз ауагIа мачIпI».
«Квырмыш лзыхIчпитI апроект автор хIуагIа рыхъазла магIны ду зму ауыс ъалырхъйауа ахъазла. АгIарбарта швабыж йауацIыхпI, йгIацIанакIуа щардапI. Сара схъатала йджьасщатI ахъвмаргаква квпшыра зигIва щарда йъанадзауа, йгIазлырхуаз апкъыгIваквагьи араса йъащарду. Ауи азаман йщаквгылаз абзазаща йаквыргIапста ахъвмаргаква гIазлырхуаз апкъыгIваквагьи цкьан. Ауат уанырпшуа хIабадучви хIандучви рсабихъа уыла йуызгIацIажьитI», – араса лгвгIанаграква хIыцагIвылшитI Ирина.
Апсыуа йгьи абаза уагIа хъвмаргаква ргIарбарта май а 10-дза йакIвшуштI, ауи ашвква йызтахъу зымгIва рыхъазлагьи йтIыпI.
швталра йа тшаншвцIара атахъыпI.