Адуней апсуа-абаза Конгресс ЙхIаракIу асовет аунашвачпагIв Эгьзакь Мусса октябрь а 7, Адуней апсуа-абаза Конгресс сквш 30 анахъыцIуа атшын, ауагIа тшырзынайырхатI:

Атурых йгIацIанакIуала йгIауахырквын сквш 30 гьгIамта дууым, хIара хIыхъазла ауи уыста йхIхаз хIалапшхта апхъахьыла хачIвыта йлыхIхуаш хIазхъвыцырныс швхIаусыгIвапI.

А-Конгресс Апсны йалахьхуш анщаквгылуаз асквш 1992 агIан ажвлара йгьи акъральыгIва уыснкъвгагIвчва дуква йгIандыршатI. Ауаъа йгIашIарышвта хIара хIатгIачвакIта хIуагIахъа адызкIылуаш, хIабашталагIвчва рыжвла ъану рпсадгьыл йгIайхырныс ахъазла аъащаква гIаныршара йацхърагIуш, хIцри бызшва, хIгвбайара, хIцIасква гIащаквыгIжьуата акъральгIв жвлара рыбагъьара йгьи тшауацIнарыхра йахъвуш апроектква йащтацауата йхIырхъйитI.

Апсны ауыжвгIанчIви турых апны, йалкIгIата – адуней апны апсахра дуква аныншауа, хIуагIахъара гIахчара апны уыс ду ахитI Адуней апсуа-абаза конгресс.

УахьчIва хIара хIакIвпI йзыхъвдакву хвы зквцIауачву хIапхъанчIвиква ртынха йхIыщтагIайуаш абанпараква йрызгIаныгIжьырныс. ХIабадучва йхIзырхчаз адырракви агвбайари сквшышвпхьадзарала йщаквгылыз хIуагIахъа руасаражвра, ркъару рылапI, хIара ауат акъраль апхъаланаскIьара йшазынхIырхуш апш йадхIкIылитI.

ХIара апсуакви абазакви адуней шабгу апны йъанызлакIгьи рыжвла ъану рпсадгьыл апны йыншауа цбызшвакIла йшзапшуаш, руагIа ртурыхи рцIаскви шырзырдыруаш, дара шзабадыруаш, йхъадахугьи – а-Конгресс ауысхартаква ъанхауа ашIыпIаква рпны йдырхъйауа апроектква йшызрылалуаш апшта аъащаква гIанхIыршатI.

ХIара йхIмурадпI хIабашталагIвчва ъабзазауа атыпква зымгIва рпынгьи хIуысхартаква гIахъхIтIырныс.

Абарауасамцара хIара хIацыта акультура, арыпхьара, аспорт уысквала цхIа хъхIцIумца Апсни Абаза уагIахъа ъабзазауа акъралькви ращтаныкъвара багъьата йщаквзыргылуаш къарута хIалуаштI.

ХIара акъраль арымчри атшауацIыхри йырзынхауа, йацасуа хгвыппI.

ХIара апсуа-абаза уагIахъагьи Апсны Республикагьи рдахIвра йащатазлуш ауагIахъара – цри бызшва, йпасарайу акультура, йбайу ацIасква – шракIву дасузлакIгьи йъагIайгвынгIвуа ргIапсра щаквхIыргылтI.

УахьчIвала хIара щатата хIызквгылу хIабадучва йгIандыршаз акIвпI. ХIа йхIборчпI ауат руасаражври рымчи хIрыквыргIапста джьгарта хIынхарныс, адуней хIкультура рылагIгара ахIатырла рыцIа хIгвыпшката, хIцриква, апхIвысква, асабиква, ахIбачва хIрызбзита хIызчпауа хIуагIа рцIасква хIхчарныс.

ХIгвбайари хIцIаскви анхIхчауа хIара адуней йазхIырхIитI, агIвычIвгIвара ртшауацIыхра хIкъару алахIцIитI.

ХIара багъьата ауи амгIва хIтагылата хIцитI, зымгIвагьи тшгIахIыдыркIылта ауагIахъа цIаскви акультури зыщату дуней хIыцгIандыршарныс йаквгIазшIыхIтитI.