Июль а 23 атшын Апсны АкъральыгIва баракъ Амш йбергьльу апсыуа ашвахIвагIвчви агIахIвчва гвыпкви ргвыргъьахъв концертла йдыртлапIатI. Агвыргъьарамш андыртлапIуз атшын йакIвшатI «Согъвым-Эскищехир-Черкесск-Амман» телебара айчважварагьи.

Апсны ауыжвгIанчIви КъральыгIва баракъ асквш 1992 июль а 23 атшын ареспублика ЙхIаракIу а-Совет ащаквыргылрала йдрыбагъьатI. Ауи апсыуа уагIахъа ркъральыгIвара ащаквгылра, атшауацIыхра агIамтаква йырдамыгъапI. Акъапщ швыга чваквпшыра шкIвокIвала йалачпу йхътIу анапIсаргвыцIа Апсны паштахIыгIва азаман йгIашIарышвта йщаквгылуаз Апсны акъральыгIвара йадамыгъапI, жвыгIв сквшышвкI гIацIанакIитI. Быжьба йнадзауа аудзышва йгьи ашкIвокIва чвахIваква йгIадырбитI ашIари агвбайари. АнапIсаргвыцIа ахъахьла быжьйачIвакI йгIадырбитI Апсны атурых апны йхъадаз абыжьхаквкI: Садзен (Джигетия), Бзып, Гумаа, Абжьыуаа, Самурзакан, Дал-Цабал, ПсхIвы-Аибга.