Адуней апсуа-абаза конгресс йаланакIуа ан-абачва рклуб заман ауыра йгьнымхузтI, ужвы анхара джвыквнацIахтI. Ауаъа шIыцта йгIащтIырхыз уысхатI апхьартаква рпны арыпхьаща.
Барганджиа Саид
АААК йаланакIуа Ан-абачва рклуб коронавирус згIва ъагIаджвыквлыз йгIалцIла заман ауыра йгьнымхузтI, ужвы анхара джвыквнацIахтI. «АгIамта шIыц» йапхъахуз анйара апщаша, июль а 29 атшын агваны йакIвшатI, йаргьи апхьартаква рпны арыпхьаща йазынархан. Ауаъа дгIачважватI Апсны апны арыпхьара шIыцра алажьрала Аквта аунашвачпагIв Барчан Инна.
Ан-абачва рклуб анхара йшалакIу даквчважвауата Барчан Инна йгIалылкIгIатI щарда цIуата анчви абачви рыжвлара азкIкIра шатахъыз, ауи йаланакIквауа «йхътIыта ргвгIанаграква рхIва, ргвакъвпраква агIвырша» йауашын.
Анйара ахъа агIачважвагIв айшыста азцIгIара хъадаква гIалыргылтI: арыпхьара аргIапсща псах йшпауаш, ауи рыцIа йнардзата, асабиква уахьчIва йгIартахъхуш адырраква рнатуата йшпаучпуш?
«Йхъадата хIыззхъвыцуа ауыс хIачвымшвауата, айрышта ацIыхъва хIтагылра шатахъу акIвпI. Арыпхьара апны ауыжвгIанчIви амальква, ашвапхаква апхъапхъа йууырдырта, уацIыхъван абзазара йалажьра атахъыпI», – йылпхьадзитI Барчан.
Апсны апны арыпхьара шIыцра алажьрала Аквта аунашвачпагIв лынхарта даквчважватI. Ауи йгIалылкIгIатI аквта анхагIвчва адуней апны йгIадрысабапуа йапшым арыпхьара ашвапхаква шдырхъвыхуа, ажвапIта – финн, эстон, сингапур арыпхьащаква.
«ХIара араъа, Апсны апны, гIальаматхушызшва йыгIбауа зджьакI гIалхIххьатI. Сингапур йауу аъачIвагIагIвчва араъа йгIагIагтI. Швабыж хIайгвгъитI арыпхьарала [Апсны] а-Министерства арыпхьаща амаль шIыцква абзазара йалагIжьырныс йгIахIцхърагIушта», – лхIватI ауи.
Барчан Инна Сингапур апны арыпхьара аргIапсща шIыцта йшджвыквырцIаз, зхъа йахвиту къральыгIвата йъадзану асквш 45 руацIа «дахIвра ду йшазынадзаз, адуней йъкIвызлакIгьи йзынхуш, йызбзазуш гIвычIвгIвыс, къральыгIв дшщаквдыргылуа» лхIватI. Ауаъа йгIадрысабапуа амальква йрыщатапI йапшым арыпхьащаква – асабиква академия дырра йаццауата ахъаз йрымаджьащахъвахуш, хъвмаррата йырзалуаш аматериалгьи рытра. Гватра ду азалхпI ауат рпны азаджв азаджв дъайыздзыргIвуа, йацацхърагIауа, йалакIу, абайгвыгIвра зызбжьу агвып (акласс) щаквыргылра.
Анйара амщтахь агIачважвагIв йгIалылкIгIатI Ан-абачва рклуб йалакву ауыс джьгарта йшалачважвуз, азцIгIара щарда шлыртуаз, йламакIуата дара ргвгIанаграквагьи шырхIвуз.
«Са йшызбауала, ан-абачва ашIыцраква йырзыхIазырпI, йыртахъыпI. Анчви абачви йырбитI асабиква [ужвы] дара йшыртахъу апшта рдырраква штшауацIырымхуа. Сара йсыласхIвитI ан-абачва апхьарта шIыцква гIаныршара, архъвыхра шIыцква адгалра ауысква рпны йшхIыцыркIуа», – лхъвыцща хIыцагIвылшатI Барчан Инна.
ХгIвысабичва йрану йбергьльу апсуа журналист ДжьапIуа Арда арыпхьара апны апсахраква абзазара йгIанаргылыз уыста йылпхьадзитI.
«Ан-абачва – зымгIва ракIвмызтынгьи, сара арыпхьара ауысла сзайчважваквауа гIасахвпIта – йалыргата йгIахIгвынгIвитI [арыпхьара] аргIапсща щарда цIуата йпсахра шатахъу. Абзазара гьгылам, адуней апхъала йнаскIьитI, къраль щарда арыпхьара амагIны тшазырдыруата гватра ду азалырхитI, ахча щарда аларцIитI. ЙагIапI хIаргьи хIсабиква рарыпхьара хIуысква рапхъа йхIыргылырныс», – лхIвитI ажурналист.
Ауи йгIалылкIгIатI Ан-абачва рклуб анйара апны хъвыцра джьащахъва щарда шгIархIваз, Апсны апны арыпхьара шIыцра алажьрала Аквта анхарагьи магIын ду шаму.
«Сара цIабыргыта йыздыритI ан-абачва рыжвлара йауата щардагIвы йгвыргъьачIвауа арыпхьара аргIапсра псахрала йагъьу амальква гIалазгауа ауи Аквта йа ари ауыс апхъа йгылуаш датша гIаджвыквцIагIвчва гвыпкI штшрыдыркIылуаш», – кьангьаш гьазгIалгуам ДжьапIуа Арда.
Пачулиа Оксана амаль лымата АААК Ан-абачва рклуб апны анйаракIгьи гьагIвылщтуам. Ага лсабиква ужвыгьи апхьарта йымцузтынгьи ауат шалрыпхьуш уахьчIва дазхъвыцитI. Ауи йшылбауала, ужвы йщаквгылыз арыпхьара ргIапсра упсахырныс гьмайразлушым.
«Сара багъьата йгьсзыхIвушым хIапхьартаква ашIыцраква йрыдгылта зынла йгIадрысабапуа йалагушта. Са сшапшуала, апхъапхъа курсквакI, лагерквакI адгал йауашын – ан-абачва рсабиква ауаъа йдырцата, ажва ахъазла, сингапур арыпхьаща шаъу йапшырныс, ауи шынхауа гIаргвынгIвырныс ахъазла», – лхIватI Пачулиа Оксана.
Анйара шакIвшаз даквчважвауата АААК Ан-абачва рклуб аунашвачпагIв Квициниа КIама ауи «йалачпата, ауыс йазынархата» йшцаз гIалылкIгIатI.
«Ахъвыцщаква гьапшымызтI. Йаъан йщаквгылхьаз арыпхьаща йазгылазгьи, йаъан арыпхьара уахьчIва тшауацIнамхуата, ауи йшаъу йгIаныжьта амаль амамкIва, арыпхьара апны адгылща шIыцква уырзыпшгIара атахъыта йызрыбагъьузгьи», – лхIватI Квициниа.
Лара лхъатала ауи йшылпхьадзауала Апсны апны арыпхьара кризис йштагылу «ларбагIвыгадъагьи йубитI». Аклуб аунашвачпагIв йшылхIвауала, карантин йгIалцIла асабиква таразта йъадзадымрыпхьуз асквшыкIи бжакIи руацIа арыпхьара апны йаъу, апхъала уыла йгIацIамшвуз бжара щарда тшгIахъыртIытI.
Ан-абачва рклуб Адуней апсуа-абаза конгресс а-Дискуссия клуб апны йазалху проекта асквш 2019 ноябрь агIан анхара джвыквнацIатI. Аклуб гIари дызму дзачIвызлакIгьи далал йауитI. АдгалагIвчва йшырхIвуала, ауи ахъазла йатахъу закIзаджвыкIпI – «азыгIальаматри гвышхвари». Аклуб апны апсихологква, апедиатрква, асабиква бжьарала йапшым аъачIвагIагIвчва йрынйалитI.
швталра йа тшаншвцIара атахъыпI.