Апсны йаъу абыжьныхIвартакI (апсышвала Абжьныха) – ареспублика ашта апны апсуаква рдин йапщылата хвду ззырбауа шIыпIапI. НыхIвартипхьадза йара амаджьуси уысхагIв дамапI, ауи йалкIгIу амаджьуси уыснкъвгагIвчва рткъвым дауазара атахъыпI.

АныхIвартаква ахIагIараква рпны йандыргIалуан.

Дыдрыпщ-ныхIва Гвдауыта район йаланакIуа Ачандара кыт апны йаъапI. Араъа амаджьуси цIасква акIвдыршитI ЧычбаргIа рыжвла йауу ашогьанква. Дадрыпщ-ныхIва акIьышвхъа апны акIвын Апсны ауагIа р-Абашта айсра агIан йуагIа гIайхчарныс Анчва дъайыхIвуз Апсны рхъада Ардзынба Владислав.

Лых-ныхIва – Гвдауыта район йаланакIуа Лыхны кыт йаъу Лыхнашта тшшара апны йгылу Йшихдзу Анчва Йан Лычвхра акьльиса йадзхъу ныхIвартапI. Агвыргъьахъвква рагIан акьльиса апны Анчва тшанизынадырхара амщтахь Лых-ныхIва йазцитIта ауаъагьи йныхIвитI. Амаджьуси цIасква араъа йакIвдыршитI аныхIварта йахчагIву акыт абзазагIвчва – ЩакърылргIа рткъвым йауу ахъачваква.

Атурых йгIалахаз Лыхнашта тшшара сквшышвпхьадзара руацIа Апсны ашIыпIаква зымгIва йгIартыцIта ауагIа зкьыгIвпхьадзараква руысква йрылачважвата щаквыргылракI нарахвырныс ахъаз тшъазыркIкIуаз айззартан.

Елыр-ныхIва Йшиху Георгий йправослав кьльиса йадзхъу ужвыгьи ныхIвартакIпI. Ауи Очамчыра район йаланакIуа Елыр кыт апны йаъапI. Елыр-ныхIва нкъвызгауа ЩынкIвбаргIа ракIвпI. Йара аныхIварта швабыж йажвыпI, ауи ХI асквшышв агIан йдыргылыз Илор кьльиса ацкIыс щардала рыцIа йпасата йаъахьан.

Инал Квба бхъвы ПсхIвы кыт хвкилометркIла йачвыхъарата ащхъа хIагIаква рпны йаъапI. Араъа йшварацырныс йгьадрыхвитуам. Йгьауам араъа дауыш ухъуыргарнысгьи, йшакIвым тшучпарнысгьи. Апсуаква Инал Квба апны псауышвхIа ущуазтын утдзы рыцхIагIа шазгIаугуаш йазхъарцIитI.

Лдзаа-ныхIва Гагра район, Пицунда йаргвану Лдзаа кыт апны йаъапI. АныхIварта йауысхагIвпI ГочуаргIа рыжвла. Лдзаа-ныхIва пIатIу зквырцIауа аджьычIвбна ъагIайуа акIьышвхъа йыквгылапI. АджьычIвква заджвгьи йгьпидыркъуам, йара-йара йкIахIаз ацIлагьи заджвгьи дахьымсуата йъащтIу йшщтIу йгIанхитI.

Адагва-ныхIва Гульрыпщ район апны Цабал кыт хкилометркIла йачвыхъару ныхIвартапI. Абыхъв датшата ФачыгIвхъа-хIвагьи йапхьитI.

Лащкьындар-ныхIва йара ауаса йызпхьауа, Ткъварчал къала йачвыхъарам абыхъв апны йаныргIалпI. Араъа Анчвата йырпхьадзауа лапI (Алыщкынтыр). Совет заман агIан арачвагIацIхыгIвчва йрыкъалата йгIандыршаз Ткъварчал кьльиса гьтагыламызтIта – ауагIа ргвтыхъква аныхIварта йазыргун.

Апсны шабгу йырчIву абыжьныхIвартакI йырхъазымкIва апсуа жвларипхьадза дара рныхIвартачкIвынгьи (ажьира) рымахпI, ауаъа ткъвымла рныхIвараква акIвдыршалитI.

Асквш 2012 август а 3 агIан СогIым йакIвшаз айззара апны Апсны амаджьуси уыснкъвгагIвчва р-Совет гIандыршатI.