Апсны Республика АкъральыгIва банк ахабар аргатI ачвахъабага банкнотква «Владислав Арӡынба» ргIацIщтра шджвыквырцIауа.
Барганджиа Саид
АкъральыгIва банк йазалху асайт апны ахабар шаргауала, ауи зноминал апсар 500 йнадзауа ачвахъабага банкнотква «Владислав Арӡынба» ргIацIщтра джвыквнацIуштI. Абанкнот Абашта айсра апны Апсны абзазагIвчва йгIатыргаз АйгIайра йахъыцIуа асквш 25 йазынархапI.
Аюбилей банкнотква ргIацIщтра сентябрь а 29 атшын йаквдыршватI, ауи атираж апхьадзара 10000 йнадзуштI. Рноминал хвыла абанкнотква ахвгIара-тира апны йгIарысабап йауаштI. Датшатагьи ауат гIарысабап йауаштI йазыркIкIуа пкъыгIвата, инвестиция амальла йгьи тезаврация амальла (ахчаква тлашIа гIаныршарала йангIарысабапхауа – аредакция ррытаразга) рноминал ахв йаквымшвауа пхьадзарала.
«ЙгIацIцIуа абанкнотква хвгIара-тира амальта йгIарысабап йауаштI Россия сомла йрыбагъьу рноминал хвыла: апсаркI Россия Федерация а 10 сомкI йраъарата. Араъа йгIалкIгIара атахъыпI абанкнотква атичIв пкъыгIва пшцIыщтыртаква рпны йгIарысабап йшамуаш (аюбилей банкнотква ргIарысабапра гIвына амапI – аредакция ррытаразга)», – араса йгIанахIвитI Апсны АкъральыгIва банк асайт ахабар апны.
АкъральыгIва банк аунашвачпагIв Барателиа Беслан йшихIвауала, ачвахъабага банкнотква ргIацIщтра закIытагьи йгьаквымшвушызтI Россия а-Гознак рцхърагIарадъа.
«Ага кIьасата тшырзынахIырхазтынгьи, Гознак йхIыцыркIтI йгьи гIамта айшысдзала анадзара швабыж йхIаракIыта хIахIвара дырхъйатI. Ауи ахIатырла зджьара йгIанымхауата швабыж хIырзыразпI», – йхIватI Барателиа.
Абанкнот абамби йгIалху ашвъабыгъь шкIвокIвала йгIацIырщтуаштI ачваквпшыра удзышва-гIвабджьазшва йаъата. Акупюра аквпшыра йадынхалтI асуратгIвгIвчва Джапуа Батал йгьи Каитан Тимур.
Апахь тланыкъва апны йхъаду асурат Апсны Республика йапхъахауа апрезидент Ардзынба Владислав йпортрет акIвпI, ауи йацIагIвпI «Владислав Арӡынба», ауи йаццауата хъарачIвыла йгIарбапI АйгIайра абаракъ щтIызхуа апсуа абджьар къаруква райсыгIвчва. Асурат йацIачпапI апхъанчIви апсыуа рыпшдзага.
Ащтахь тланыкъва апны йхъаду асурат Апсны Республика акарта акIвпI, ауи йацта йгIарбапI Апсны акъральыгIва герб аныта абагъьата йаквщтIыху ауыхвара хIагIа зквылуа Апсны акъала хъада Согъвым архитектура адкIылра ахвага.
Ачвахъабага банкнотква Апсны апны йапхъахауата йгIацIырщтуаштI. Апсны Республика АкъральыгIва банк акIвпI Абашта айсра апны Апсны абзазагIвчва АйгIайра ангIатырга амш аюбилей йадахIвуата ачвахъабага банкнотква ртираж агIацIщтра йагIаджвыквцIагIвхаз.
швталра йа тшаншвцIара атахъыпI.