Асабиква рхчара Адуней мшы агIан Адуней апсуа-абаза конгресс Согъвым апны йаднагалыз агвыргъьахъв ду сабита хышвыгIв райхIа гIанарайгватI.
Барганджиа Саид
Июнь а 1, асабиква рхчара Адуней мшы агIан Адуней апсуа-абаза конгресс Апсны арайонква зымгIва йгIартыцIыз саби хышвыгIв райхIа злаз гвыргъьахъв аднагалтI. Ауат йрылан Ареспублика саби реабилитация квта апны йзайъазаквауа, «Киараз» гвчIагIв адкIылари «Ашана» культура-гвчIагIвчпара фонди зхъпшылквауа.
Айззара акIвйыршун Апсны Республика апны гIатгара зму артист Жордания Джамбул. Ауи йакIвпI агвыргъьахъв шджвыквырцIауа йгIайззаз йгIарылазхIваз. Ауи амщтахь ауатыкв ркIытI Очамчыра апхьарта-интернат ргIахIвчва гвып. Ауат тынчта уызмыргылуа агIахIвра «Абазинка» гIадырбатI.
А-Конгресс архъйагIв секретарь Гицба Инар АААК ЙхIаракIу асовет аунашвачпагIв Эгьзакь Мусса йыхьызла йгIайззаз зымгIва драйхIвахIвуата асабиква анасып, абзира, амамыр бзазара шырзитахъу йхIватI.
Агвыргъьахъв асасчва йыззымпшуаз макъым согIата йырзалтI пычIвта араъа йырхIваз амакъымгIаныршагIв Гвынба Анри йалайцIаз, Очамчыра йауу ашвахIвагIв шIа Азизова Саида йылхIваз ашва шIыц «Имариам амҩа» («Ймайрам амгIва» – аредакция ррытаразга). Ауи ашва ари апхIвыспачкIвын лыхъазла Адуней апсуа-абаза конгресс ахIварала йыргIвытI. ЙгIашвгвалахIыршвахпI: Азизова Саида ашвахIварала «Орфей» анкъвакъвра апны АААК апсыуа бызшвала йагъьу ауарад ахъазла йщаквнаргылыз йазалхыз асогIа гIатылгатI. Ашва лхIвара апхъала апхIвыспа щарда цIуата йынкъвылгуз агвала – уагIа щардагIв рпахь лара лашва лхIвара – ъахъйаз збзиру зымгIва дшырзыразу ралхIвтI.
«Анчва дшвзыразхатI, сшвайхIвахIвитI зымгIвагьи! Адуней апсуа-абаза конгрессгьи ари агвыргъьахъв адызгалыз зымгIвагьи сальам расхитI. КIьыдата «анчва дузыразхатI» – йасхIвра стахъыпI Гвынба Анри. УгьгIасрыпхащарым», – длыргвыгъатI акомпозитор Саида.
Агвыргъьахъв йалаз ларпшыга щарда рызпшуан. Ауи апшта, апрограмма йалан апхьара сахIат джьащахъваква. Экологияла асахIат лырцатI Апсны АкъральыгIва музей апсабарала ахъвшара аунашвачпагIв Аланиа Тая, амгIва апны амгIвайсра ахабзаквала асахIат аднагалтI Согъвым ашIара атдзы.
Апсуари абзири рмагIны асабиква йрархIвтI «Алашара» апхьарта адиректор Пилиа Марии апсыуа бызшвали литературали арыпхьагIв Матуа Эсми. «Сальвадор» арт-студия арыпхьагIв Пинчук Яна асабикви ауат ранчви рабачви рыхъазла суратгIврала тшыбжьара сахIат акIвлыршатI. Секциипхьадза тып кIьыда азалхын, ауат агIарбагаквала йуызгIауан. Асабикви ан-абачви Адуней апсуа-абаза конгресс аволонтерквагьи рцхърагIун.
АРИ АГIАНШАРА АСУРАТЛЕНТА АПШРА>>
ЙалкIгIата йрымаджьащахъван асабиква аквагрим астудия. Ауат кьазу йгылын ршIахъаква бзи йырбауа амультфильмква рфырква рсуратква ангIарнырцIуш йазпшуан.
Агвыргъьахъв йалакваз асфальт апны сурат ргIвуан, дартс (ахрихыц хвыцква аущтра – аредакция ррытаразга), нерф (хъвмарга абджьар ъагIадрысабапуа йхътIу ауатыкв апны уыжвгIанчIви саби хъвмарща – аредакция ррытаразга), классики (апхъанчIви саби хъвмарща – аредакция ррытаразга) йхъвмаруан, хвыдъа йгIарыларшаз ахъгIара хьшвашваква, анартыхвчIчIква, датшагьи ашарабзараква рфун, ауи акIвымкIвагьи согIата гелийла йырчу ачырпIи зигIваква рырттI.
Ауатква анакIвшуз асцена апны аконцерт гьашIамсуазтI, ауаъа йгIахIвуан «Империя танца» («АгIахIвра аимперия»), «Путь танца» («АгIахIвра амгIва») гвыпкви «Апсны» брэйк гвыпи.
Агвыргъьахъв адгалра къару щарда аларцIатI Адуней апсуа-абаза конгресс йаланакIуа чкIвыныргIи пхIвысыргIи рсоветква.
«ХIара абгата йхIылахIхIвитI асабиква шракIву хIуачIвымш зпщылу, йаргьи хIгвы аквкIта ауат рыхъазла хIынхитI. ХIгвыргъьахъв уагIахъа фгIвы ахъыхIауата йаъапI, ауи апрограмма ауагIахъа гIахIвыщала анкъвакъвра, апсыуа уарадквала йалу аконцерт алапI», – йхIват АААК йалу ЧкIвыныргIа рсовет аунашвачпагIв Торчуа Леван.
Торчуа йшихIвазла, ан-абачвагьи асабиквагьи агвыргъьахъв йазыбжадзапI, йауа ухIварыквын ари йапшу алалраква Апсны апны ауи апшта йгьщардам. «Агвыргъьахъв йгIацIанакIуа, ауи анкъвакъврата, асабиква рыхъаз тшыбжьарата, ларпшыгата йалу гIаупхьадзарыквын асабиква рхчара Адуней мшы артлапIара дара ахвыцквагьи ауат ран-рабачвагьи рыхъазла рахIа йджьащахъву ауысква йрыуата йалитI», – йгIаликIгIатI АААК йалу ЧкIвыныргIа рсовет аунашвачпагIв.
АААК ахьызла Торчуа агвыргъьахъв адгалра апны йгIарцхърагIаз а-Конгресс йагIвзахаз йгьи йызцынхалауа чкIвыныргIа йырзынарху аполитикали спортли АкъральыгIва комитет, «Открытая ладонь» («ЙхътIу анапIсыргвыцIа») жвлара адкIылара, Зантариа Резо, Отырба Денис, Таниа Саида, Ардзынба Ручиса дшырзыразу йхIватI.
АААК апны йгIаныршу АпхIвысква рсовет йалу Гвымба Аза агвыргъьахъв анадыргалуаз АААК ауысхагIвчва асабикви ауат ран-рабачви ртахъыраква гIаргвынгIвуата ауыс йшадгылыз гIалылкIгIатI.
«ХIара зымгIвагьи хIаныпI йаргьи бзидздзата йгIахIгвынгIвитI асабиква айгвыгIвра раура ъатахъу рунагIва апны йшахъазым – йъабзазауа акъала апынгьи ауи шрауа рылархIвара атахъыпI. Асабиква рдуней мамырзара даргьи йгвыргъьауа йбзазара атахъыпI. Анчва хIизыразпI уахьчIва хIадгьыл апны ари апш гвыргъьахъв ъахIзадгалуа. АААК йалу АпхIвысква рсовет апрограмма шбайазлушыз апшта йрылшуз рчпатI. ХIара йхIгвапапI ари агвыргъьахъв адгалра хIхъвгьи ъалу», – лхIватI Гвымба.
Ауаса зымгIва рацкIыс ари айззара йайгвыргъьуз ажва аламкIва дара асабиква ракIвпI.
«Сара агвыргъьахъв мамагьи папагьи сыцта сгIайтI. Араъа зджьара йгIанымхауата йкьахвпI. Сара зымгIва швабыж йсгвапхатI», – лхIватI пщысквша йырту Согъвым абзазагIв Сангулиа Мия.
Ага рсабиква аныла-арыла йрыщталта йгIаркIыхуамцара йгIапсазтынгьи йразыта йгIанхатI ан-абачвагьи.
«Анчва дырзыразхатI Адуней апсуа-абаза конгресс ауысхагIвчва хIсабиква араъа лахIварата йрауыз ахъазла. Ауат насып раудзатI. Ари гвыргъьахъв гIальаматпI, ауи йапшкву щардазларныс хIтахъыпI», – лхIватI лпа Кирилл длыцта агвыргъьахъв йгIайыз Осиа Хамида.
Агвыргъьахъв ъадзакIвшуз асасчва хвыцква йрыцхъвмаруан асабиква бзи йырбауа амультфильмква рфырква Микки Маус, асльан Алекс, Кунг-фу Панда, Бамблби трансформер рапшта йгIвычаз гIвычIвгIвыскI йаъара йнадзуз акIьанджьква, алабачIвырква йрыквгылата йныкъваквауа, афокусник.
Агвыргъьахъв алалра йалакваз датшагьи согIакI рызпшуан – швъабгъьыла ларпшра. Асабиква ауи йайгвыргъьадзатI.
Асабиква рхчара Адуней мшы рахIа щарда зхъыцIуа адуней гвыргъьахъвква йрыуапI. Ауи асквш 1925 агIан асабиква йыртахъула йнахъауата йчпара ауысла Женева апны йакIвшаз Адуней конференция апны йщаквдыргылтI. Ауаса йапхъахауата йдыртлапIарныс анрылша сквш 25 анцIых – асквш 1950 агIан акIвпI. Ауищтара ауи ансисквша йакIвшитI. Асабиква рхчара амш – ауи ахъаз асабиква йырзалху йгьгвыргъьахъвым, ауи асабиква рхвитнагIаква хчара, ауат насып рымата йгIадзынгылра, йапхьара, бзи йырбауа ауыс тшадыркIылра, апхъахьылагьи даргьи аны-абахата ркъраль йакъральыгIвхара шатахъу гIахIгвалазыршвауа уыспI.
хороший праздник!
Очень фееричный день получился! Спасибо!
швталра йа тшаншвцIара атахъыпI.