Гагра район йауу йкъвльейсызу, саби щардагIв зму атгIачваква Асквш шIыц райшва злахъыргIвуш АААК ахьыла йгIарадзатI.
Кирвал Камила
Адуней апсуа-абаза конгресс Апсны асоциал къвырльыкъвхарта ахъпшылра йацIу йкъвльейсызу, саби щардагIв зму атгIачваква фачIви хъагIари согIата Асквш шIыц ахьызла йырзыршатI. ЦхърагIара радзатI Гагра район йауу, Гагра, Цандрыпщ, Гьаджьрыпщ, Махадыр, Лапстархта, Алахадзыхь, Бзыпта рпны йбзазауа атгIачваква.
Ауи акция унашва ахъызцIуз ажвлара рабадыррала АААК аъачIвагIагIв Хагба Изольда йшылхIвазла, кIара йазыбжу ауагIа гIаддырдырырныс а-Конгресс йгIацхърагIатI Гагра район а-Социал къвырльыкъвхарта.
«ХIара акъвырльыкъвхарта анхагIвчва тшырзынахIырхатI ауи апш цхърагIара йазыбжу атгIачваква зну швъа гIахIыртырныс. ХIгвы йтаз ари акIвын: агвыргъьахъв ангIаргванхауа атгIачва къвльейсызква Асквш шIыц ахьызла фачIвыла йадыгIгалырныс. ХIара ауат атгIачваквагьи агвыргъьара шырзынадасуаш ауысла хIгвква багъьазара хIтахъын. А-Социал къвырльыкъвхарта швъа гIахIнаттI, ауи анхагIвчва атгIачваква йрачважватI, ауат рыцIа йыззыбжу афачIвква гIаддырдыртI. ХIара асабиква хIыргвыргъьара ахIатырла хъагIарагьи ацхIцIатI», – лхIватI Хагба Изольда.
Ашвъа тгIачва 39 аншвалтI, ауат сабита 110-гIвы рыгIзитI. АААКи а-Социал къвырльыкъвхарти ауыс бзита йагвындыргIвын афачIв мартанква йыззалырхыз рпны мшкIыла йнадырдзатI.
Гагра район а-Социал къвырльыкъвхарта социал нхарала аъачIвагIагIв ахIба ЛакIойа ХIамида а-Конгресси дари йапхъахуз рацынхара сабапра шалаз гIалылкIгIатI.
«Асабиква ануыргвыргъьауа гвапагIарапI, йалкIгIата – Асквш шIыц ангIаталуа. ХIара цхърагIара щардала йзадзауа атгIачваква хIымапI. ЙаъапI збаргвыраква йрыквымчважвауа, йпхащауа атгIачваквагьи. ХIара йхIборчпI ауат йрапшу гIахIхIырдырта хIрабадырныс», – лхIватI ЛакIойа.
Ари азын фачIвы зквшваз Шатковская Марина цIыпх кIара налахвныс гьлымуытI. Ауаса уахьчIва ауи лтгIачва руыс баргвдзахан агвыргъьахъв агIаталымта афачIвква йыртахъдзата йгIарадзатI. Марина ууыс анхIатлу заджв дгIауцхърагIарквын гвыргъьарата йапщылу лдыритI. ЦIыпх ауи лара а-Социал къвырльыкъвхарта дырцхърагIауата тгIачваквакI фачIвгьи согIагьи рылттI.
«ХIунагIва закI гIвназтын хIара йхIхIвитI: уахьчIва хIа йхIфуш хIымапI, йызмам йрышвтырквын рыцIа йагъьхапI. Асквш шIыц ангIаталуа ацхърагIара зынгьи йгьчIыдам. ЙалкIгIата асогIаква асабиква райгвыргъьитI. Асабиква ангвыргъьауа хIара ахIбачвагьи йхIынасыппI», – лхIватI Шатковская.
Ауи АААК ЙхIаракIу асовет аунашвачпагIв Эгьзакь Мусса «хвыцгьи дугьи йдйырбаз аджьащахъвара» ахъазла дйызхIвахIвтI.
ХвгIвысабичва зму Шамба Лиана ауат лаща дгIалцхърагIауамцара лара йлыгIзитI. Асквш шIыц гIадзауата атгIачва руыс баргвдзахатI. Лиана Асквш шIыц асабиква райшва йыквлыргылуаш гьлымдыруазтI, ужвы ауи дгьахъгвыргIвахуам.
«АцIайква Асквш шIыц сахща лпны йапылырныс бзи йырбитI, ауаса ужвы асогIаква рбарыквын рпны йгIанхарныс рыцIа йгIалырхуашзапI», – лгвы гIвитI ан.
Агвыргъьахъв ахьызла лсабиква торт рзылрыдзуаштI Нубарян Мануш. Ауи лтгIачва гьызгIвадамта заджвгьи дгьзынхум. Ауи йгIалцIла Мануш йамгIанцхърагIаразлакIгьи дайгвыргъьитI.
«ЙаъапI асабиква йыртахъу анхIзымхвгIауа. Ауи ргвы йаситI, ауаса хIуыс зкву гIаргвынгIвитIта тшгьдыргвыжвкIуам, – нашхыйадза лгвакъвпра хIыцагIвылшатI Нубарян. – Ужвы асабиква тхаджьуаштI, айшва бзи рзыхъыгIгIвуштI».
Адуней апсуа-абаза конгресс анхара апны агвчIагIвчпара гватра ду азалхпI. Асквш 2021 агIан а-Конгресс Гагра арайон чымазагIвтара аковид хъвшара, Гвдауыта аковид чымазагIвтара фачIвыла йырцхърагIатI. Асквшква 1992-1993 рагIан йакIвшаз Апсны ауагIа р-Абашта айсра агIан Гагра ангIадырхвитх амш йадахIвуата а-Конгресс Гагра къала апны йгIаныршу айсра аныкъвадыкъваква рреспублика адкIылара ахъвшара аветеранква цхърагIара днарадзатI.
швталра йа тшаншвцIара атахъыпI.