Апсны йапхъахуз апрезидент дангIадрийызищтара сквшы 79 ъацIыз йазынархата Адуней апсуа-абаза конгресс асквш 2024 агIан Ардзынба Владислав йхъмаштылра ахъвлапын айчважвара ргIапсра амата йакIвнаршатI. Айчважвара йалан ажвлара йгьи аполитика уыснкъвгагIвчва Джьынджьолиа Сократ, Чрыгъба Вячеслав, Хашыг Руслан, Таниа Астамур. Ауат зымгIвагьи гIамта ауыра Ардзынба Владислав йыцын, йбзазара йауата, йара йпщылата йджьащахъву, йнашхыйу, йхъыччахъву гIаншара щарда рдыритI. Анйара мурадта йаман ймайрамыз аунашваквала, айгIайраквала, апсуа къральыгIва шщаквгылуаш азхъацIарала йырчвыз Ардзынба Владислав йбзазара амагIны гIарбара.