Ахваша февраль а 22 атшын Москва апны йдыртлапIатI Апсны ауагIа руысагIв Гулиа Дырмыт йхъыцIуа асквш 145.
Барганджиа Саид
Февраль а 22 Москва апны Апсны ауагIа руысагIв Гулиа Дырмыт йхъыцIуа асквш 145 йадахIвуата литература-ршIыйара хъвлапны акIвшатI. Ахъвлапын адыргалтI Россия Федерация апны йаныргIалу Апсны Республика рхIвачIвгIвырта йгьи Москва апсыуа диаспора (МАД).
Ахъвлапын дгIадгылтI Россия Федерация апны йазалху хъвдаквцIара нкъвызгауа Апсны Республика рхIвачIвгIвы Ахба Игорь. ЙгIачважвара апны ауи йшгIаликIгIазла, ауысагIв Гулиа Дырмыт апсыуа гIвыри алитератури рыщата ъащтIайцIаз йахъазымкIва ауагIахъа театр атурых ахъагьи джвыквицIатI.
«Гулиа Дырмыт уыжвласыла зысквш 100 хIыртлапIуш апсыуа бызшвала йапхъахауа агазет «Апсны» дагIаныршагIвыпI. Апсыуа литература йадынхалуаз ари агIвычIвгIвыс гвымчIва йбзирала хIкъраль акультура тшахадыргIвазарныс рылшатI адуней ахъахьла къраль щарда рбзазагIвчва. Апсны йгIайуа йалагатI апхьахьаква, агIвгIвчва, асуратгIвгIвчва. АуысагIв йгIвыраква апхьартаква рпны йддырдыритI, Гулиа Дырмыт йыхьыз зхъхIвалгIу КъральыгIва согIат щаквдыргылтI», – йхIватI ауи йабашталагIв ду йгIатгараква ахъвлапын асасчва йгIадйыргвалашвахуата.
Ахъмаштылра хъвлапны апны йащтагIайуата йгIачважваз атурыхдырра наукаква рдоктор Анчабадзе Юрий йшихIвазла, зымгIва рацкIыс йхъадата ауысагIв Гулиа Дырмыт йгIатгараква йрыуапI «Апсны атурых мгIва апхъахьыла йахьъамгIвайсуаш ъайзыгIарбаз».
«Ауи ауат рылибгIатI (амгIваква – аредакция ррытаразга) Европа адырранкъвгара, агуманизм, адемократия щатата йыззалыз ажвлара йгьи акультура гIаншараква. Абарыла ахъа джвыквылтI хъвдаквыщт ду змаз ауи йынхара – алфавитгьи, уысара дугьи, прозагIвра цIолагьи ауагIа йырзыгIанзыршаз», – йхIватI Анчабадзе.
АтурыхдырыгIв йгIацицIахтI Гулиа Дырмыт йпсадгьыл дшапатриот дууыз.
«Ауи йуысара тшазынархара «Сыхаара сыԥсадгьыл, иҟалазеи, закузеи...?» (апсыуа бызшвала йгIаныцIитI «СхъагIара, спсадгьыл, йгIаншайа, йачIвыйа?..» – аредакция ррытаразга) дзачIвызлакIгьи йбзазара ашIйырпшуамцара йпсадгьыл дазынхара атахъыпI, ауи дъазшIнатуа апны абзири акъагIари йрылайырхIауамцара», – араса акIвпI апхьахьа йшипхьадзауа.
Агвыргъьахъв хъвлапны йалан ауысагIв Чачхалиа Денис, Россияла гIатгара зму артистка йгьи Апсны ауагIа рартистка Гицба Алиса, аскрипач Абрамян-Эшба Виктор, адуней анкъвакъвраква рлауреат Барганджия Амра, амузыкант Цвижба Абзагв.
Апсыуа литература ащатащтIацIагIв, ауи апатриарх, Апсны ауагIа руысагIв, арыпхьагIв, апхьахьа, абызшвадырыгIв Гулиа Дырмыт асквш 1874 февраль а 21 атшын
Гульрыпш район йаланакIуа Уарча кыт апны дйытI. Асквш 1912 агIан ауи Тифлис апны (Тбилиси – аредакция ррытаразга) йапхъахауа апсыуа книга «Ауысакви амшыркъваракви» гIацIищттI. Гулиа Дырмыт гIвыра ду щардагьи наука нхара бзидздзагьи дыравторпI. Ауи йакIвпI Согъвым арыпхьара семинария апны йапхъахауа адрама гвып «ШыйачIва» гIанзыршаз. Ауи йгIаджвыквцIарала, Апсны акытква рпны йгIахъвмаруан асквш 1921 агIан йгIаншаз йапхъахауа апсыуа театр труппа. Асквш 1919 агIан Гулиа Дырмыт апсыуа бызшвала йапхъахауата йгIацIцуаз агазет «Апсны» даредакторхатI. Асквш 1967 агIан Апсны апны йщаквдыргылтI Гулиа Дырмит йыхьыз зхъхIвалгIу акъральыгIва согIат. Хысквша рпны зны ауи асогIат рквнадыргитI алитература, азъазара йгьи архитектура апны гIатгара зму ауысхагIвчва.
швталра йа тшаншвцIара атахъыпI.