Адуней апсуа-абаза конгресс ауысхагIвчва СогIвым Арайон шIыц апны йаныргIалу аллея апны ужвыгьи чамхIа ларцIатI. Акциягьи йара аллеягьи арайон йауата Апсны ауагIа р-Абашта айсра йаладзкваз йырзынархапI. Апсны Республика Ахъахчара а-Министерства акъральыгIва архив ашвъаквала АААК йшщаквнаргылызла аквырджькви апсуакви райсра Арайон шIыц йауаз айсчвата 76-гIв, ауат ракIвымкIвагьи амамыр бзазагIвчва йрыуата быжьгIвы аладзтI.

Ачвахъабага аллея гIаныршара ауыс а-Конгресс йалу аджьгарква йгIаларгатI. АААК агвыпи арайон абзазагIвчви ацIлаква сынчIва агIапын йларцIауа йалагатI.

АААК архъйагIв секретарь Гьыцба Инар акция Арайон шIыц апарк хъада апшцIа шабгу шгIацIанакIуа гIаликIгIатI. Йара ауи апшта ауи дацIачIвагъватI йапхъахуз ацIлаква анларцIа амщтахь АААК анхагIвчва арайон абзазагIвчва рахьыла йгIатыцIуата разыра ажва щарда шгIарадзаз.

«ХIара ауат йрапшу ажваква магIын ду рзыгIбитI. ЙгIалагIгаз ауыс ауагIа рпсы йаргванта йгIацIцIтI: апарк хIрыпшдзара йахъазымкIва йаладзыз хIычкIвынчвагьи рыхьызква ауыла йхIхIвитI. АбзазагIвчва хIгIаджвыквцIара йъацыркIыз хIайгвыргъьитI», – йгIацицIахтI Гьыцба.

Ауи йхIватI а-Конгресс цIлата йларцIуш гIалырхырныс Апсны абнархIара наука-рхъвыхырта станция аъачIвагIагIвчва шгIарцхърагIаз. АцIлалацIара апны ашIыпIа бзазагIвчви йаладзкваз рзаъачви йырхъазымкIва 5-хауа атдзыунашвахъцIарта анхагIвчвагьи шгIарцхърагIауа. АААК архъйагIв секретарь йшихIвазла, акция ужвыгьи йгьалымгастI.

«АцIлаква анлахIцIара амщтахь цIлипхьадза адзхъа айсра йаладзкваз рыхьызква зну агъвква хIыргылуаштI. Агъвква ауат йырквнадыргаз артшхъвагаква рсуратквагьи рнызлуштI. Ужвы ари асахIат хIара айсра йаладзкваз ртгIачваква ауыс шагвынхIыргIвуашла хIрангIалитI», – уыста йырпыру даквчважватI Гьыцба.

Арайон шIыц апны щарда цIуата йбзазауа ХIаджьымба Борис а-Конгресс агвып дшырзыразу йхIватI.

«Сара сныбыжьла снаскIьахьан къарула сгьшвызцхърагIум, ауаса сгвыла сшвыцпI. Насып Анчва йгIашвитыргIатI. Ари ауыс ахъазла швабыж хIшвзыразпI! Анчва двшвзыразхатI!» – йхIватI ХIаджьымба.

Арайон шIыц датшагьи абзазагIвкI – Зантариа Рустам – йсабиква йыцта ари апарк апны щардала дшамдалауа гIахIайхIвтI. Ауи АААК агIаджвыквцIара хвду азыйбатI: апарк апшцIа агъьчIвра йахъазымкIва ауи ауагIа кIара днардыруатагьи йалтI.

«Сара гвылагьи псылагьи ари ауыс йацскIитI, йауа ухIварыквын, жвасквшапхьадзара анагIвсрагьи зхъа щтIазцIаз хIайсчва рыхьызква ауагIа йрылазлара, йгIарзыршIыцхлара атахъыпI», – йхIватI ауи.

Адуней апсуа-абаза конгресс агъвква рыргылра уыжвласыла йалагуштI. Ауи ауыс йызтахъу дзачIвызлакIгьи дзалалуаштI.