«Агвы апхара» зхьзу ужвыгьи акциякI – къвльейсызта йбзазауа ауагIа гвчIагIв цхърагIарата чгIвычи щапIхъацIи рзышара – акIвшатI Апсны апны.
АмичIба Амра
«Агвы апхара» гвчIагIв акция апкъ йтата Апсны апны цхърагIара йазыбжу ауагIа чгIвычи щапIхъацIи рзыршатI. Ари ауыс Адуней апсуа-абаза конгресс, Трыквшта йту апсуа диаспора йгьи Трыквшта апны Апсны ахIвачIвыгIвчва руысхарта йадыргалтI.
Трыквшта йбзазауа хIабашталагIвчва АААК ЙхIаракIу асовет йалу ХIапIатI АхIмад йгIаджвыквцIарала гуманитар цхърагIара ду Апсны йапхъахауата йгьгIарщтиуам.
ЙгIашвгвалахIыршвахпI йара ауи апш акция пхатша асквш 2019 агIангьи йшакIвшаз. Ари азын йгIарщтийыз ахIапчыпква ршарныс АААК апхIвыс советкви репатриацияла а-КъральыгIва комитети йрыхъвдаквырцIатI, акомитет ацхърагIара ахъвыкI Сирии Трыквшти йгIартыцIта Апсны йгIайхыз атгIачваква йрырттI.
«Трыквшта йту апсуа диаспора гуманитар цхърагIара йапхъахауата асквш 2019 ахъа йгIарщтитI, ауи щардагIвы гIацIанакIтI. Ужвы щардата спорт щапIхъацIа гIарщтитI, йгIайтI ахъачваквагьи апхIвысквагьи рыхъаз ахарас пхаква, ажакетква», – атамам хIлырдыртI АААК апхIвыс советква рунашвачпагIв Ардзынба Гета.
Ауи цхърагIарала акция шгIаларгази ахьыз йгIанахIвауи гIахIгвалалыршвахтI.
«Акция ахъазгIваца «Агвы апхара»-хIва гьахьзым. РахIа йхъару апсуа кытква рбзазагIвчвагьи Трыквшта йту хIайщчва рпхара, ргватшныра, райгвыгIвра рылархIвитI. Ауи хIара апхъала апшта хIшаларпу, хIтурых аурала йщаквгылыз хIацзакIыра шаъаркIву йгьи йшымдзуаш гIаугвыннаргIвитI», – багъьата йазхъалцIитI Ардзынба.
Ауи йшгIахIалхIвызла, цхърагIара йазыбжу ауагIа зну ашвъаква АААК ашIыпIа хъвшараква рцхърагIарала йагвындыргIвытI. Атдзахьызкви ахьызкви йырхъазымкIва ауаъа датшагьи кIара анырцIун – ажва ахъазла, чгIвычати щапIхъацIати йынкъвыргауа ган-урата йрыму – ауи ацхърагIара дасу йшизалхызлушыз йахъвун.
Агуманитар цхърагIара агвныргIврала уыс ду рхатI апхIвыс советква.
«Йгьмайрам ауи аъарачIвы чгIвыча йзутуаш ануыргIалырныс – йалухырныс, квпщыра-квпшыра йуыркIьыдарныс, ахьызква рыквуыгIвныс. ХIара йгIахIцхърагIатI «Киараз» гвчIагIвчпара адкIылара абзихагIвчва («Киараз» Апсны апны къвльейсызта йбзазауа ауагIа йырцхърагIитI – аредакция ррытаразга). ХIара хачIвыта йхIыквын ацхърагIара ахъазгIваца йхIымшауата гIвычIвгIвысипхьадза дыззыбжу йхIрадзарныс. АпхIвыс совет йалу зымгIва гватшныта дасу йызбзихуш ачгIвычакви ащапIхъацIакви рзалырхуан, йазыркIкIуан.
Заджвы цхърагIара дазыбжата йуылшауа закIыла йпсы уанапылра уаъара гIаухъахIахитI», – лгвгIанаграква гIахIалхIвтI апхIвыс совет йалу Гвымба Аза.
АпхIвыс советква йадыркIылыз рахIа щарда йнадзуз агуманитар цхърагIара Ткъварчал йауырщттI. Ауи апхъала Ткъварчал апны йгIаныршу АААК ашIыпIа хъвшара аунашвачпагIв Аршба Белла арайон акытква рпны цхърагIара йазыбжата йаъакву рыхьызкви рхабаркви азылкIкIытI.
Пенсия йчIваххьаз Альберт Снегур йпа йхъазы дбзазитI, щарда мцIуата ауи йажвыз йан лдуней лхIваджьтI. ЙгIайцхърагIуш заъачвакIгьи гьизыгIанымхатI.
«Сара 44 зуру щапIхъацIа нкъвызгитI. Араъа ауи апш ура зму гьуауам, йгIаргквауа йрылазлитI. Абар, ужвы щапIхъацIа сымапI, – йгIахIгвынйыргIвитI ауи йуыс зкву. – Анчва дшвзыразхатI. Адиаспора йрылугьи а-Конгресс анхагIвчвагьи Анчва згIвадара ритыргIатI».
ЦхърагIара задзаз Поляков Геннадий, Ванхольская Лиля, ШакIайа Людмила, Акаба Клара йайчважвазшва йацшIакIта йаразакIы рхIвун: «Анчва дшвзыразхатI аткъварчалква ъагIашвгвалашваз!» ЗныкI абзазагIвчва щардагIвыта йъатаз, рачва ъагIацIырхуаз, тшауацIыхра змаз акъала Апсны ауагIа р-Абашта айсра агIан заджвгьи дызтымцIуа-дызгIатамылуа йгIакIвдыршан йрыман, ауи амщтахь фыр-къала хьзы ахьырцIатI, ауаса уахьчIвала ауаъа ауагIа рбзазаща агъьчIвра йазыбжата йаъапI. Ауи тшазидыритI Ткъварчал район аунашвахъцIарта ахъада Дочиа Исидоргьи.
«СгвыгъитI знымзара-зны хIбзазаща анадзара щтIыхIхта гуманитар цхърагIара хIазыбжахымкIва хIцушта. Сара йстахъыпI Апсны къагIауата, акъральыгIва абзазагIвча йыртахъу азынархъауата йаъазларныс. УахьчIвала хIшбзазауа хIбзазитI. Анчва дырзыразхатI Ткъварчал йахъазымкIва Апсны шабгула ари апш уыс адызгалыз зымгIва. Ауи цхърагIара дупI, йаргьи, ажва аламкIва, йыззалху дзачIвызлакIгьи йзынадзуштI», – йхIватI арайон ахъада.
АуагIа йырцхърагIауа цхърагIара драдзара, йгьи ауатла угIашIамсра
АйхIара адуква рыхъаз чгIвычали щапIхъацIали йалаз агуманитар цхърагIара аныршуз АААК апхIвыс совет йалакву йапшым ауысхартаквакI рынхагIвчва кIьыдата гватра рзалырхырныс йаквыркIтI.
Ауи апшта йазалхыз согIа рзыргатI Гвдауыта аковид чымазагIвтари СогIвым
АшIашIкIгIара згIваква райъазарти.
«ХIсанитаркви хIдезинфекторкви швабыж йыргвапахуштI йшырхъмаштылыз рбарыквын. Ауат, цIабыргыта, швабыж йгIапситI, уахъгьи тшынгьи ахъвшара къапщы апны ачымазагIвква йырхьпшитI, ачымазагIвтара алдыргитI, ахъвшара апны шцкьазлуш йахъпшылитI», – лхIватI АшIашIакIгIара згIаква райъазарта ахъвшвтйырта аунашвачпагIв Гулиа Александра.
Агуманитар цхърагIара йауата согIа рзыргатI СогIвыми Гвылрыпщи рпны йаъу 13 сабигIзартакI ртехник нхагIвчва айцIбачвагьи асабиква йырхьпшуа апхIвысквагьи.
СынчIва цхърагIара зтра атахъу йрыларцIатI СогIвым, Калдахвара, Очамчыра рпны йынхауа атдзы-интернатква рынхагIвчвагьи СогIвым АцхърагIара апхьарта йыцIу ацIайквагьи.
«Трыквшта йту апсуа диаспора йгIарщтийыз ацхърагIара лкIгIара зму хIысабиква рыхъаз магIын ду амапI, йауа ухIварыквын, ауат рыуа щардагIвы рыцхIата йбзазауа атгIачваква йгIарылцIтI, ауат рыхъаз ауи цхърагIара щарда йнадзитI», – лхIватI СогIвым АцхърагIара апхьарта адиректор гIзара-бжьара нхарала йтарагылыгIв Антиа Астанда.
Апхьарта апны апычIв классква азрыпхьауа Квасиа Ирина йгIалылкIгIатI рыжвла ъану рпсадгьыл йацхърагIауа абашталагIвчва «разыра ду шырквнагауа».
Йалырхта йадыркIылыз ахIапчыпква йара ауи апшта агIвычIвгIвыс кIьыдаква йырзалхта йырзырщтитI Гвада, Арасадзыхь, Гвып, Атара, Кындыг кытква рбзазагIвчва, Каман кьльиса ажвлара, Апсны амсылманква рунашвахъцIарта йалакву. Швабыж йазыбжадзата ацхърагIара радзатI СогIвым, Чанба йурам апны зтдзы блыз атгIачва, датшагьи зхъахIараква мачIу атгIачваква.
АААКи Трыквшта йту апсуа диаспори йадыргалуа «Агвы апхара» гвчIагIв акция цIаста йщаквгылхьатI. Ауи апхъала хъвы-хъвы йшаз, йауацIыхыз акция асквш 2019 агIан Апсни Къарча-Черкес Республики рпны йакIвшатI, ауи агIан зхъахIараква мачIу атгIачваква саби чгIвыча рзыршатI.
швталра йа тшаншвцIара атахъыпI.